Na fa’ailoa e se tasi na va’ai-tino i lenei fa’alavelave ananafi, o le so’ona saoasaoa lava ma le le-tausisi i tulafono o le ‘auala, na mafua ai ona feto’ai ta’avale nei e lua i luma o le maota o se aiga i Vailoa i le taeao ananafi. 

O le ta’avale-la’itiiti la’upasese mai le Fale-Taa’avale o le State Cabs ma se ta’avale o le ituaiga o le Pajero IQ lea na fetoa’i.

E taunu’u atu sui o le Samoa Observer, ua ‘auina atu mo togafitiga i le falema’i le ‘aveta’avale o le Pajero IQ ma se tasi sa la to’alua. Na ta’ua fo’i e latou sa iai i Vailoa, e matua sese lava le ‘aveta’avale o le tama’i-ta’avale la’upasese. 

“O le tama’i-ta’avale e sau mai ga’uta i le ‘auala i Vailoa a’o le Pajero e aga’i mai Vaitele i Apia,” o le fa’amatalaga lea a le molimau.

“Sa tatau la ona tu le tama’i-ta’avale ae tu’u le avanoa i le Pajero peita’i e leai se mea fa’apena na tupu. Na fa’asasa’o mai lava le taxi mai Vailoa e le’i tu’u-avanoa, soso’a ai loa e le Pajero. Moni la e sese le tama’i-ta’avale, ae na ta’ua e molimau, e fai fo’i lava si saoasaoa o le  Pajero ia, e sili atu i le saoasaoa fa’atulagaina.

 “E saoasaoa fo’i le sau a le Pajero ia, ma ‘ou fa’apea ai e ona le ‘aveta’avale, ae leai,” o le molimau lea a se tasi sa i le taimi na feto’ai ai ta’avale.

“E fai a si laiti tele o le ‘aveta’avale ma lana pasese, na la o-mai, pe 18 i le 19 tausaga le matutua, ma o lo’o lavevea uma.

“E laki lava ona e na ona gaui o lima ae i la’u lava va’ai o lo’o manu’a mitimiti.” 

“Na ‘ou fesili i le ‘ave-ta’avale pe ona, ae fai mai e leai, na ona le-lava.”