Asia e le efks a Saoluafata le nofoaga o le fa’amoemoe

Tusia Deidre Fanene ma Fa’aliliu e Maiava ,

142 Hits

LE ‘AUTALAVOU A LE EFKS Saoluafata, i sa latou fa’afiafiaga fa’aEvagalia mo fanau o lo’o tausia i le Nofoaga o le Fa’amoemoe.

LE ‘AUTALAVOU A LE EFKS Saoluafata, i sa latou fa’afiafiaga fa’aEvagalia mo fanau o lo’o tausia i le Nofoaga o le Fa’amoemoe.

O le aoauli ananafi, o se taimi fiafia na fefa’asoaa’i ai mo’omo’oga ma fa’amoemoe lelei, i le Nofoga o le Fa’amoemoe a le To’omaga mo E Puapuagatia. Sa asiasi atu le Ekalesia Fa’apotopotoga Kerisiano Samoa mai Saoluafata, i le Nofoaga o le Fa’amoemoe e fa’atino ai ni pesepesega ma siva fa’aleAgaga mo fanau o lo’o tausia ai i lea nofoaga. 

Na fa’ailoa mai e le Peresetene o le To’omaga mo e Puapuagatia, o Siliniu Muliagatele Lina Chang e fa’apea, o le ulua’i taimi lenei ua asiasi atu ai se ekalesia fa’apea i lo latou nofoaga. 

“Na fa’afeso’ota’i mai a’u e le Susuga a Limu Samuelu i le Aso Tofi talu ai, ma talosagaina ai pe mafai ona omai e asiasi mai i le Nofoaga nei,” o lana fa’aaliga lea. 

 “Na saunoa mai le Faife’au, sa matamata mai lava i polokalame e nisi sa asiasi mai i fanau nei ma a’e ai sona finagalo, e tatau fo’i ona omai latou e asiasi.

“Fai mai, ona o ia o se tama ma o se faife’au fo’i, o se mea lelei tele lea, o le ‘aumai o tupulaga talavou ma le A’oga Aso Sa e feiloa’i i nai fanau o lo’o tausia i’inei ma fa’afiafia ai mo latou.”

Na fa’aopoopo mai fo’i, o se aso fa’apitoa lea mo fanau i le Nofoaga o le Fa’amoemoe. 

“E naunau lava e fia va’ai i nisi e asiasi mai i’inei.

“E maua ai se avanoa e feiloa’i ai fo’i i nisi tagata ‘ese ma fa’amasani iai, ae maise ia latou iloa fo’i, o lo’o alolofa ma manatu mai tagata o le atunu’u ia latou ma fa’amalosi’Au atu fo’i iai, e le o le i’uga lea o le lalolagi mo latou, ae mafai lava ona maua o avanoa e toe amatalia ai nisi suiga fou o o latou olaga.” 

Na fa’afetaia e le Fa’afeagaia o Limu Samuelu, le galuega o lo’o fa’atinoina e le tama’ita’i peresetene ma le aufaigaluega a le To’omaga, o le va’aia lelei lea ma le tausia o fanau nei.

“Lea matou te iloa lelei, e le faigofie la tou galuega o lo’o fai,” o lana saunoaga lea. 

“I le saunia o mea uma mo fanau nei, le va’aiga o latou e pei lava o a tou fanau moni, lea ua fa’aalia lo tou alolofa ma lo tou agalelei ma e momoli ai la matou fa’afetai tele lava ia ‘outou uma.”

E afe-faselau tala le tupe sa foa’ina atu e le Fa’afeagaiga ma lana Ekalesia e fesoasoani ai mo le fa’atinoina o nisi vaega o mana’oga o fanau uma o lo’o tausia ai i lea nofoaga.

© Samoa Observer 2016

Developed by Samoa Observer in Apia