O foliga va’aia

Tusia Fa’aliliu e Maiava ,

116 Hits

Toe mafaufau tasi lava…O le tausaga e 1830 na malaga ai Joe ma nofo i se taulaga la’iititi i Massachusetts i Amerika. Ui o ia o se ali’i agalelei, e fa’amaoni ma o se tagata-nu’u lelei fo’i, ae mai lava i le aso na nofo ai i le taulaga lea, sa feagai lava ma fa’afitauli – sa foliga e te’ena ma le-fiafia iai tagata, ma a latou va’aia Joe o aga’i atu, e vave lava ona ta’ape ma taumafai e o-‘ese.

E o’o lava i fa’amalama o lona fale, na ta’ei ona e tau’ai e nisi i ma’a i le po.

Na fa’aauau pea ona to’amalie Joe ma taumafai e fa’agalogalo mea-leaga ua na va’aia. A’o le isi aso, sa savalivali atu ai i le ogatotonu o le taulaga, ae ia fa’alogoina se tasi o pa’o’o atu i ona tua. E faliu ane, ae osofa’i loa e isi au-ali’i.

Na taumafai Joe e tete’e atu ma  fusu ai loa ma le vaega lea, peita’i ona e to’atele, na tigaina ai si ali’i ma toso-fa’atātā ai loa i le falepuipui. Na pepelo e le au-ali’i ia le vasega o leoleo, o Joe na amatā le vevesi, ae na tete’e Joe na te le-totogia se sala talu ai, e leai sana mea-sese na faia, ma i’u ina loka ai loa i le falepuipui. 

A’o i lona potu i le falepuipui, na amata ona tusia e Joe tusi e ‘ave i lona aiga, e fa’amatala iai le mea moni ua tupu ae maise le le-sa’o-sa’o o tagata ma la latou va’ai i ā ia.

Na ‘ave e lona atali’i tusi ia i se Ofisa o se nusipepa i totonu lava o lea a’ai ma e le’i ‘umi, a ua fa’asalalau fa’alaua’itele e le tele o nusipepa i le atunu’u aoao, fa’amatalaga a Joe e uiga i le moliaga ua fa’asalaina ai o ia. O le finau atu la ma le lē-fiafia o le mamalu o le atunu’u, na faia fa’amalosia ai e ta’ita’i o lea taulaga se fa’ai’uga, e fa’asa’oloto Joe.    

Ae mālie la, ona na soifua pea Joe ma matauina isi  Peresetene Amerika e to’alua na soso’o ai, fa’atasi ma nisi o ali’i-iloga i Amerika atoa, latou te faia pea le mea lava lea e tasi na tu’ua’ia-sesē ai ma molia o ia. Talu ai, o le vaitaimi lea i Amerika, e talitonu le to’atele, e na o tamaloloa e sele-mama a latou ‘ava ma leai ni soesa, e fa’aaloalo ma amio-lelei, a’o Joe Palmer, na fai ma nifo-tulimanu, ona e fai lana soesa! 

E moni lava ma fa’amaoni: “E le mafai ona e iloa se tusi lelei i lona fa’ava’a.” A o le fa’anoanoaga tele lava lea, ona o talitonuga o nisi tagata, e gata lava i fafo – i le pa’u o le tino.

E talitonu lava ma mulimulita’i i tala a isi tagata, sese pe sa’o, ae le se’i mafaufau lelei muamua ma tu’u-mamao le silasila i le mea moni ma taua i le soifuaga nei. O se fa’ata’ita’iga lelei lava lea, le tama’i-taulaga a Joe, “ua ta’ita’i ai e le tauaso le isi tauaso.” Ae fa’afetai, ona e  mamao atu le silasila a Joe. Na ia silafia lelei, e le o lana soesa lona tagata-moni, a o lona fatu ma lona tagata atoa.

 “’Aua le fa’atagaina isi e pulea lou mafaufau.” ‘Aua fo’i le fa’aseseina ‘Oe pe ‘avea lou sa’olotoga e te mafaufau lelei ai mo ‘Oe lava, e fa’amautuina ai lou loto i mea moni e te soifua lelei ai. E le gata o le mea moni lena, a o lou tiute fo’i lea ma lau matafaioi.

Na faia tatou uma i le fa’atusa o lo tatou Matai, o le tino, agaga ma le mafaufau e faia ai le filifiliga tonu. Ae a pe a manatu tasi i molimau o le soifuaga o Iesu, o ana a’oa’oga, o vavega, Lona Maliu ma Lona Toetu mai, ia manino lelei ai le tulaga’ese o lou soifua i Ona ala. Toe mafaufau tasi lava…

© Samoa Observer 2016

Developed by Samoa Observer in Apia