Ta’utino Takam e fa’ate’i Parker

Tusia Liam Napier - Stuff ma Fa’aliliu e Maiava ,

180 Hits

Ua ta’utino le ali’i o Carlos Takam, e sili le fa’atali se’ia o’o i le maea e iloilo ai mea-faigaluega atoa fo’i ma va’aiga-iloga o lona fuaitino ua iai nei, e fa’ailo ai le tulaga maualuga o ana tapenaga ua iai, e fa’afetaui ai Lupesoli’ai La’auli Joseph Parker. 

O se va’aiga na maofa ai le vasega o tusitala-Aukilani, ina ua fa’aaliali maso o le tamaloa i le Aso Lulu.

E fai si mamafa teisi o le ali’i-Farani (na fanau i Cameroon), pe fa kilokalama (110 – 106) a’o aga atu mo le fusu’aga i le Aso 21 o Me i Manukau.

E leai se tasi na fusu muamua ma Parker (i ana fusu’aga e 18 na manumalo uma ai), e fa’apea sona fuaitino. 

E le-lelei tele le nanu a Takam, ae na matala lelei ma manino ina ua fesiligia i le ta’uga-sa’o o lona fa’ai’u. Na matala lelei le tali, “T…KO”.

O se tali e mautinoa, e le so’ona faia e se tagata fa’apea. Ua 25 ana paga-oti, mai fusu’aga fa’aporofesa e 35, e aofia ai faia’ina e lua ma le tutusa e tasi. O le ali’i 35 tausaga lea, e tasi le tulaga e maualuaga ai ia Parker i fa’atulagana a le Vaega o le WBC ma le IBF i le paga-mamafa a le lalolagi, ma e fa’amaonia ai lona lelei tele i le maea.

Ui e faigata ona tautala i le gagana Peretania, ae na manino lava ona mana’oga mo le fusu’aga i le fa’ai’uga o le vaiaso. 

O lana fusu’aga aupito taua lea (pei fo’i ona fa’anaunau iai Parker), e mautinoa ai sona avanoa e lu’i ai le ali’i-Egelani- o le siamupini fo’i lea o le Lalolagi (IBF), o Anthony Joshua.

Na fa’amaonia e Takam, ua i se tulaga malosi ma aupito lelei ana tapenaga, e fa’alua koleniga i le aso i se ‘umi e lua masina sa tolauapi ai i Farani ma le-popole ai i le fusu’aga lea, ui e fai si ‘umi atu o Parker , e u’umi ona lima ae maise fo’i le faia i ona fanua o le fusu’aga.

“’Ou te le-popole i na mea, a o le a silasila lava i le mea o le a o’o iai,” o lana fa’aaliga lea. “E le matua ‘umi na’ua Joseph Parker, na ‘ou va’ai iai ananafi.

“E mamafa lava ia te a’u so’o sa’u fusu’aga, ae moni, o la’u fusu’aga tele lenei. E fa’apena fo’i ia Parker, o se lu’i tele fo’i mo ia aua ‘ou te lelei atu i lo ia. Na ‘ou sau ‘ou te malo. Sa’o o se tama-fusu lelei, ae, ‘ou te malo ai.”   

E le’i mana’o Takam e fa’ailoa mai ana fuafuaga ua fa’ata’oto mo le fusu’aga ae o lo’o naunau e ‘alo’alo’ese ma so’a-vavave a Parker ma taumafai fo’i e fusu-i-totonu. O lo’o talotalo ia fusu atu Parker ma u’u atu.

“’Ou te le talanoa atu i le itu lena i le taimi nei. O le a fa’ate’ite’i. ‘Ou te fiafia tele i se tama-fusu e savali mai ia a’u. Manaia tele pe a fa’apena i le Aso To’ona’i.”

Na fesiligia fo’i pe malo ia Parker i se tu’i-oti, ae tu’u-sa’o mai lava le tamaloa Cameroon ma fa’apea: “O le a tou silasila lava iai.” 

Na manumalo Takam i le ali’i-Amerika o Tony Thompson ae faia’ina i le 2014 i le Rusia o Alexander Povetkin ae na ia ta’ua, ua masani i fusu’aga tetele fa’apea ma e foliga mai, o lo’o to’ato’a lelei lava si ali’i e fa’afeto’ai le vave ma le malolosi o a’ao o Parker.  

Na fa’amanino mai e le Fa’atonu a Takam, o Christian Cherchi, mafuaga e talitonu ai, e sao lana tama ma o’o atu e lu’i ia Joshua.

“O se tama-fusu lelei Parker ma o le su’ega lelei lava lea e iloa ai pe ono avea ma numera tasi e lu’ia Joshua,” o le fa’aaliga lea a Cherchi.

“E le’i fusu muamua Parker ma se tagata pei o Carlos. A ua leva ona feto’ai Carlos ma isi e lelei atu. Sa fusu i luga o le TV i Kanata. Sa fusu ma Thompson i Pale, fa’apena fo’i Povetkin ma ua masani i le maualuga lena. 

 “O le fusu’aga ma Joshua mo le Fusi o le lalolagi (IBF), o le fusu’aga iloga lena o lo’o tuli-mata’ia i le taimi nei. Ua manana’o uma tagata e fetaui ma Joshua i le taimi nei, ua le tulitulia Tyson Fury ona o Joshua le tama-fusu aupito ta’uta’ua i Peretania i le taimi nei.” 

Na mamafa ma tele tu’i Takam na mafatia ai Povetkin peita’i, na vave ona sela ma oti ai i le ta’amilosaga 10. Na toe manumalo i isi ana fusu’aga e tolu mulimuli ai, peita’i e ui i sona lelei, o le a le-aloa’ia i Niu Sila nei i le fusu’aga ma Parker. 

 “O tu’utu’uga sa latou tu’uina atu mo matou, o le ‘aumai lea o le fusu’aga i Niu Sila nei, ae sa matou manana’o e fai le fusu’aga i Farani talu ai, e iai lava nai a’afiaga pe a fusu i isi atunu’u ‘ese,” o le tagi-talatala lea a Cherchi. “Ae na mana’o lava Carlos e o-mai, tusa lava po’o a pefea e ono tutupu.

“O lo’o manatu uma tagata, e manumalo Parker ona e fai si vavave o mea-faigaluega pe a latalata atu iai Carlos, ae o le a silasila lava iai.”

© Samoa Observer 2016

Developed by Samoa Observer in Apia