‘Afiafi Fa’aleAiga’ e sami ai taunu’uga lelei

By Fa’aliliu e Maiava 13 May 2016, 12:00AM

O le po o le Aso Lulu, Aso 04 o Me 2016, sa toe talimalo ai fo’i le Vaega o To’omaga mo e Puapuagatia (SVSG), e fa’amanatu fiafia se “Afiafi Fa’aleAiga”, na faia i le Maota mo Tupulaga a le EFKS i Sogi. 

O le fa’amoemoe o lea mafutaga, e fa’amanatu fiafia ai le fa’ai’uga o nisi o polokalame faufautua sa fa’atinoina e le To’omaga, mo ali’i sa molia ma tu’uina atu e le Fa’amasinoga mo Aiga, ona o a’afiaga i sauaga i totonu o aiga.

O le Fa’au’uga Lona 4 lea ua faia mo ali’i ma tama’ita’i sa fautuaina mo polokalame nei a le To’omaga.

Mai le latalata i le to’aselau o ali’i ua ‘auai i polokalame fa’aFaufautua nei na amata mai le fa’ai’uga o le 2015 e o’o mai ia Aperila 2016, e lalata i le 80 o latu nei, e toe fo’i atu lava e momoli le fa’afetai ona o le lagolago a o latou ta’ito’alua ma fanau, sa tutu-malosi e tapua’ia i latou a’o ‘auai i le fa’atinoga o a latou polokalame.

O le Afioga a le Fa’amasino Sili, Pātū Tiāva’asu’e Falefatu Sapolu sa fofogaina le saunoaga-‘autu o lea fa’amoemoe, sa fa’atumulia i le mamalu ‘ese’ese o le ‘au-vala’aulia, o aiga, uo fa’apea vaega sa lagolagoina polokalame a le To’omaga.

Na manino fo’i i lea aso, le fa’ananau o le atunu’u e tutū-fa’atasi mo le fa’amutaina o sauaga fa’asaga i tina ma fanau.

Na talia fiafia e le vasega o ali’i sa fa’au’u i lea aso, le aogā o polokalame-faufautua sa ‘auai, ma o nisi o latou sa to’atutuli ai lava ma fai ta’utinoga i luma o ta’ito’alua, ae fa’ai’u ai lea fa’amoemoe manaia i sausaunoaga a le Fa’amasino Sili, le Vaega o Fa’amasinoga ae maise o le ‘au-vala’aulia ma aiga sa fa’aalia lo latou fiafia tele ona o ali’i-fa’au’u ua toe fuata’ina lo latou soifua. 

Mo le Vaega a le To’omaga, o le fiafiaga sili lea, ona ua silafia le aoga tele o a latou galuega fa’atino, e fa’afiafiaina ai o tatou tagata ae maise o le si’osi’omaga o aiga Samoa. 

Seanoa fo’i le fesoasoani mai o pa’aga ma vaega sa lagolagoina le Polokalame Faufautua a le To’omaga, e le mafai ona ‘ausia le taunu’uga aoga ua va’aia nei.

By Fa’aliliu e Maiava 13 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>