TALA FAASOLOPITO O SAMOA MAI LE AMATAGA

193 Hits

O le Aso To’anai talu ai -na ta’ua ai le faamaonia e Alii & Failauga o Atua, Aana, Tuamasaga, Manono ma Savaii, e ala i se Fono sa fai i Vaiala, le tofia aloa’ia o Mataafa Iosefo e suitulaga ia Malietoa Vaiinupo, e avea ma Tupu o Samoa, ona ua afu lona soifua ma ua faagasegasea -talu lava ona taliu mai lona faaaunu’ua- i Samoa, i le Aso 11 o Setema 1889. 

Peita’i, a’o le’i faia lea fono i Vaiala, e i ai le fono sa fai i Perelini ma sa lote ai mataupu tau Samoa. O se fono taua lea fono talu ai -o faaiuga na fai ai -e uiga ese ae lē lelei. E le’i auai Samoa i lea fono, ona e le’i valaauina o ia.

O le Fono lea i Perelini na fai ai se tulafono mulimuli, o ona aiaiga e le’i malamalama i ai Samoa. Ua ave Samoa e Malo Tetele i lalo o le latou lava pule, ma ua ta’ita’ina ai Samoa e pei o se tauaso i le ala ua faasino mai mo i latou.

Ae ui o lea, o alii na faia lea tulafono, o le itu i le amiotonu, e tatau ona faailoa atu- o le loto leaga lea i le sa’olotoga o tagata Samoa ma lo latou tuto’atasi na mafua ai. E manino lelei ma malamalama le uiga o a latou upu.

Na amata le latou tulafono mulimuli i ni upu susua ma le faatosina loto e faapea- o lo latou faamoemoe e tasi, o le manuia o lenei atunuu puapuagatia-ona soso’o ai lea ma lo latou faalauiloa mai faalaua’itele e faapea-“ua aloa’ia e Malo Tetele le Tuto’atasi o le Malo o Samoa ma le aia tatau a ona tagata -e filifili ai so latou lava alii poo se Tupu e tusa ai ma latou lava tu ma aganuu.

E i ai se isi lava mea e sili atu ona sa’oloto ma talafeagai i lo lea? Ma e ui lava ina sa lē popona Samoa i nei aiaiga talafeagai, ae na latou filifilia lava lo latou Tupu i se fonotaga tele a o latou ta’ita’i, tamālii ma failauga.

Ae o le mea uiga ese, ina ua mae’a ona faaalia manino lea aia tatau sa’oloto mo tagata Samoa, sa faaaoga loa e Siamani lea tulafono mulimuli na fai i Perelini- ma faaalia ai e faapea o “Malietoa Laupepa” lea sa avea ma sui Tofia e fai ma Tupu i le aso 12 o Iulai,1881,ma sa aloa’ia e Malo Tetele e Tolu, o le a tatau ona toe aloa’ia nei -e tusa ai ma le faataunuuina o ia pule, se’ia vagana ai ona ua tonu i Malo Tetele e tolu -e ala i se maliega ‘autasi i se isi faiga e ese ai,ua tatau nei ona faailoa atu e faapea, “ Ia tofia loa lē suitulaga ia te ia -e tusa ai ma le tulafono ma aganuu a Samoa. 

O le mea lea, i le aso 8 o Novema a ua ua ono vaiaso talu ona lē toe avea Malietoa ma Tupu, faatasi ai ma le tofiga o Mataafa, sa tuuina atu e sui o Malo Tetele i Samoa se faasilasilaga faalaua’itele o loo i ai se parakalafa mulimuli, e ui ina e le o ta’ua i totonu o le Feagaiga, ae o loo tausia pea e avea ma mea lilo o lenei feagaiga, o lea sa tapā ai tagata o Samoa ina ia faatinoina loa ni fuafuaga e aunoa ma se faatuai, e tusa ai ma aganuu a Samoa, ma e tatau ai, mo le toe avea o le Alii o Malietoa Laupepa ma Tupu o Samoa.

“O lea valaau faaaloalo na tuuina atu ai i tagata Samoa se uiga e le o mana’omia ma le uiga moni o lea upu, ma e le o faamamaluina foi e Webster poo Johnson, ae sa auai Malo Tetele e Tolu i se valaaulia a se Malo itiiti ma le faatauvaa, ma ua le mafai ai ona faatuatuaina faamaumauga masani o le kanona- ma ua lafoa’ina. 

O le faauigaina moni o lea fuaitau o le feagaiga e faatoa mafai ona mautinoa e ala i le sailia o le faamoemoe moni o Malo Tetele. O le mea lea, o le upu “valaauina” o lona uiga moni- o le faatonuga; ae ua na o se totini lima veloveta lea o loo natia ai le lima o le meli o tulafono fai faamalosi. Talu ai ona o lea ua manino mai o le aano moni lea o le fe’au i tagata Samoa, o lea na latou tali atu ai i le talosaga, pe afai e le o se faiga na fai ma le loto i ai, faatasi ai ma le matua usita’ia. 

E leai se sauniga tele na fai i le aso 2 o Oketopa, ae o le mea mautinoa, e tele fono sa fai i le tele o itumalo, ma o le aso 5 o Tesema na tuuina atu ai e sui o Ofisa Konesula le isi faasilasilaga, le sa ta’ua ai e faapea,”

Talu ai ona ua faailoa mai, e faapea i le tausisia o le tusi valaau o loo i totonu o a matou faasilasilaga faalaua’itele o le aso 8 o Novema, ma ua toe avea ai Malietoa Laupepa ma Tupu o Samoa, e lana lava itu, ma talu ai ona ua matou iloa fo’i e ala i tusi na auina mai e tamalii ia o loo fono nei i Lufilufi, ma o loo faaalia ai le aso 1 o Novema, ma se tusi o le aso 12 o Novema, na saini e le Alii o Tamasese, e faapea ua latou loto foi e talia Malietoa Laupepa e avea ma Tupu o Samoa, o le mea lea, o i matou ua saini i lalo o sui o Siamani, Peretania Tele ma le Iunaite Setete o Amerika, e ala i le tuuina atu o i matou i le faatinoina o faatonuga na auina mai ia i matou mo le faamoemoe o matou Malo, matou te folafola atu ai e faapea:”Ua aloa’ia e afua atu i le taimi nei e Malo o Siamani, Peretania Tele ma le Iunaite Setete o Amerika Malietoa Laupepa e avea ma Tupu o Samoa.”

© Samoa Observer 2016

Developed by Samoa Observer in Apia