O LA’U TALA FO’I

13 May 2016, 12:00AM

1. Matauina i Tala Fou le tagi talatala a se tasi o Faife’au o le Ekalesia Faapotopotoga Kerisiano Samoa i Samamea Fagaloa-ona e faapea ua le talafeagai le faiga ua faamalolo ai o ia ma lona faletua.

O lea la Faife’au ma lona faletua e faapea ua 18 tausaga talu ona la galulue i Samamea-ae ua faate’ia i la’ua i le motusia faafuase’i o le latou feagaiga ma Samamea. O le faaaliga la a lea Faife’au i le Samoa Observer e faapea-o i la’ua sa fai le la malologa mo le ono masina e pei ona masani ai-ma o le taimi tonu lea na logo atu ai ia i la’ua lea faaiuga a le nuu.

I le taimi nei la-o lea ua sailia e lea Faife’au se fautuaga faale-tulafono-ona o lona taofi-‘o se faate’aina lea e le talafeagai! Ia –afai ua motusia le feagaiga a lea Faife’au ma le afioaga o Samamea-o le upu moni-e tutupu lava mea faapenei-ae afai e talitonu lea Faafeagaiga-o le Atua na tofia o ia mo lana galuega-o lona uiga la-e ui ina matuitui ma tiga le mea ua tupu-ae o le mea sili- e le’i aveeseina oulua e le Atua-ma o le upu moni-e i ai le isi galuega e ave oulua e le Atua lua te galulue ai mo ia!

Afai la ua e saili fesoasoani i le tulafono-e na o se faamanatu atu lava-o Iesu e ana le galuega sa oulua galulue ai- “e le’i tali atu i se mea leaga e tasi na fai e tagata ia te ia-aua o le Fu’a taualuga o lona finagalo atoa-“ia o’o atu le fe’au o lana faaolataga i le lalolagi uma! O le a la sou taofi?

2. Matauina foi i Tala Fou fai mai se tasi ulutala-“Ua matua mautinoa lelei e le Faia’oga Fou o le Manu Samoa….”! Afai la o se mautinoa tau taaloga-o le a la lea mautinoa? A toe faaupu ona faapea lea-“ua mautinoa e le Faia’oga fou o le Manu Samoa-e le toe o’o le Manu Samoa i tulaga faaletonu sa i ai?

O le isi fesili- “e faapefea ona mautinoa pe afai e le o faia ni tapenaga? E faapefea ona mautinoa pe afai e le o mafai ona avanoa mai tama tuai o le Manu Samoa –mai kalapu i fafo o loo taaalo ai- e taaalo mo le Manu Samoa?

Ua loa ona silasila Samoa i lana Manu Samoa talu ona faavae mai-o loo lava foi ma totoe le silafia o le atunuu i vaega uma o loo faaletonu ai. Afai la o loo tumau pea ia faaletonu aemaise ai o ia faafitauli-e faapefea la ona fai mai ua matua talitonu atoatoa le faia’oga fou o le Manu Samoa? O le a sou taofi? 

3. Matauina i Tala Fou le faasea ma le fiapoto o se alii mai fafo lea na o mai i Samoa nei ma le isi tamaitai-fai ai a la faiga tau faasese tau tupe. O lea alii ma lea tamaitai-sa talosagaina talu ai nei le Faamasinoga ina ia faataga i la’ua ona toe fo’i atu i o la atunuu se’i vaai o la aiga-ae o lea ua molia i la’ua i Samoa nei-ona o ia faiga pi’opi’o.

O lea la ua mae’a ona fai le faaiuga a le Faamasinoga Sili-ma teena ai le la talosaga, ae o lea ua faaali mai lona fiapoto i le faaiuga-ae pi’opi’o ma gaoi! O le a la se mea e tatau ona fai i nei ituaiga o tagata mai fafo e o mai i Samoa nei-taulamua i faiga pi’opi’o!

Faamata o iloa e lea alii ma lea tamaitai-o lea foi e faatali Samoa poo afea o le a ave ai i le Faamasinoga faiga pi’opi’o a le Malo o Samoa-lea e faitau miliona ma miliona tupe a Samoa ua maumau ai?

Afai la o tagata pi’opi’o faapenei mai fafo ia e o mai fai mea leaga i Samoa ae fia faaali mai lo latou poto-o le fesili- “O le a le pogai ua le ave ai loa lenei alii ma lea tamaitai i le falepuipui e pei o isi tagata Samoa-pe afai ua faamaonia e le Faamasinoga a la solitulafono?

E manaia ona ave e loka i le Pa Sima-ona uma ai lea o le fiapoto-ae faatali se’i alu i Peretania-ona fai ai lea o lona poto! O le a sou taofi?

13 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>