TALATUU MA TALA O LE VAVAU NA FAAMAUMAU E PAPALAGI

248 Hits

O LE TALA IA TUIMANU’A:  O A’ega-uta ma A’ega-tai o le ulugalii lea sa nonofo i Manu’a, ona faaifo lea o Sa Tagaloa-a-lagi i Sauā ma le Ao-ona ave lea ia Galea’i le Ao. Ona fanau lea o Aga’etai o le tama.

Ona alaga lea o le Ao o Galea’i i le tama o Aga’etai- o le Alii muamua lea o Manu’a uma lava. Ona maliliu lea o matua o le Tama-a ua Tupu Galea’i i Manu’a. Ona faamavae lea o Sa Tagaloa-a-lagi o le a toe foi i le Lagi.

Ona fai lea o le mavaega: ‘A e nofo-ia ‘aua ne’i tatalaina lou Ao, ae ia faapulou pea i lauu’a-ma ia e fai atu i lou nuu -ia to se fale i Lefagā. A uma le fale-ia tuufua pea i aso uma. Ona faapena lava lea ona fai.

Ona toe faaifo foi lea o Sa Tagaloa-a-lagi i Lefagā i le fale tuufua ma nonofo ai. Talu ai ona o Sa Tagaloa-a-lagi na fai atu ia Sa Tagaloa- ‘E toe o ane e ave ifo le isi Ao’-o le Tuimanu’a lea; ua ave ifo ai ma le ‘aumaga a Tuimanu’a, ave ifo ma mea o le Lagi; ave ifo ma Pāpā.

Ona toe faapea lea o Sa Tagaloa-“Tatala ese le Ao o Galea’i.” Ona aveese lea o le lauu’a sa ufita’i ai le Ao o Galea’i-ua na ona alii a ua le toe mamalu. Ona usu lea o Galea’i ia Valooleto’elau le afafine o Tuiosana ona faae’e lea o le gafa o le tama.

Ona fai atu lea o Sa Tagaloa ia Galea’i- e aumai le tama-ona aumai lea o le tama ia Sa Tagaloa. Ona potopoto lea o Sa Tagaloa uma; ua faaloaloa o latou lima i luga o le ulu o le tama ma latou ususū faa-sefulu.

Ona faapea lea o a latou upu: “Ua alaga Papa ma faae’e le Ao-o le a igoa oe o le ‘Tuimanu’a’. O Tuimanu’a muamua lava lea. Ona si’i ai lea o le tama i Aga’euta; si’i foi ma le fale e nofo ai le Tupu. Ona Tupu ai lea o ia i Manu’a.

Ona fai ai foi lea ma Tootoo latou te vagaia le Tupu. Ona usu lea o Tuimanu’a ia Malamaosaua le afafine o Tutuimatagi faaee le gafa o le tama o Li’amatua-lea na toe faae’e i ai Papa ma le Li’aitiiti. Ona maliu lea o le tamā o tama o Tuimanu’a, ona faae’e lea o Papa ia Li’amatua.

O le Tupu lenei na puupuu lana nofoaiga ina ua oti-talu ai ua na tu’u le mavaega. Ona fasi ai lea e Saualii a’o toli laga’ali, ina ua alu i le avā a lona uso. Ona faae’e lea o le Ao ia Li’aitiiti ona avea lea o ia ma Tupu ina ua Tuimanu’a.

Ona usu lea o Tuimanu’a Li’aitiiti ia Mainavasa le afafine o Tuioto’a i Fale’ulu i Ta’ū. Toe usu ia Fuaolelea le afafine o Vaafulu i Aualuma i Fitiuta. Ona nonofo lea o nei tamaitai ia Tuimanu’a Li’atiti. Ona fanau lea o Mainaivasa o le tama-ona o ai lea o le alii ma lona atalii i Fitiuta.

Ua foi mai le afiafi. Ona tago lea o le alii-ua faaui lona Ao, ma ua tuu i lalo o le niu, ae a’e i luga o le niu. Ona tago atu lea o le tama i Ao ua sola ma ia i le fale o lona tina i Fale’ulu. Ona alu ifo lea o le alii i lalo ma tuliloa lona atalii, a ua le maua.

Ona alu atu lea o le alii o nofo mai le tama i le fale. Ona fai atu lea o le alii-“Sau ia oe-sa e lamatuāpola i Ao, o le a faaigoa oe ia Tuitagovale ma Tuitafea ma Tuileāu; a’o Ao-aumai ia te a’u. Ona avane lea o Ao i le Alii.

Ona ma’i lea o le alii-ua vaivai. Ona fai lea o lana mavaega ua faapea:”O Ao na- a’o a’u ua ‘ou vaivai. Afai ou te oti, o sē e muamua fanau o oulua-ia alaga i ai Ao ma faae’e i ai Papa, aua o tamaitai nei o loo totō i la’ua.

Ona oti lea o le alii. O tamaita’i nei e masina faatasi. Ua o’o i le po ona taufai faatiga lea o i la’ua. Ona nati atu lea o la aiga ia faamalosi, ne’i avea Ao e se tasi.

Ona mua’i fanau lea o le tama a Fuaolelea le tama’itai Fitiuta, a’o le aiga ua pisa ma fesu’ega’i solo se popo e ta’ele ai le tama. Ae fanau loa Mainaivasa o le tama-ona alaga loa lea i ai o Ao ma Papa. Ona faalogo atu lea o le Faletolu-ua alaga Papa-ona o atu lea ua ave le tama i Ta’ū.

Ona Tupu loa lea o le tama i le Faletolu, ma ua si’i mai foi ma le Fale’ula. Ona vagai ai lea ma nofo ai le Tupu- o le Tupu muamua lava lea o le Faletolu. 

© Samoa Observer 2016

Developed by Samoa Observer in Apia