O pasi a e lelei a pasi, e ala a ona faaletonu pasi o le mitavale - Tuilaepa

Tusia Ilia L. Likou ,

91 Hits

Palemia Afioga Tuilaepa Dr. Sailele Malielegaoi.

Palemia Afioga Tuilaepa Dr. Sailele Malielegaoi.

O le tele ai o ripoti e fa’a’atatau i se silasila a le malo i  pasi o lo’o ua feamalagaa’i ai le atunu’u o se tasi lea o vaega na saunoa i ai le Palemia Afioga Tuilaepa Dr. Sailele Malielegaoi i le polokalame o le 2AP ma le Palemia ina ua fesiligia le tulaga o pasi laupapa o loo femalagai ai le mamalu o le atunuu, i lona tulaga saogalemu ma le tele o faalavelave ua tula’i mai ai.

O se ripoti oto’o mai le Ofisa So’oupu i lea fa’atalatalanoaga na fa’ailoa ai e Tuilaepa e fa’apea o ‘pasi a e lelei a pasi, e ala a ona faaletonu pasi o le mitavale’

 

2AP ma le Palemia:  O le feagai tonu o lou afio i lou valaulia i Nauru, ae tupu loa le faalavelave i le pasi laupasese i Puipaa ma Faleula, ua toe asiasi ai finagalo o le toatele i le saogalemu o pasilaupapa, lea foi sa i ai le finagalo ma faaiuga a le Pulega o Felauaiga i luga o laueleele ia avesea…. O le manatu o le toatele fai mai e lelei a, ae oo loa lava ina tupu ai le faalavelave e matuā lamatia ma aafia le soifua o tagata, esese mai la ma le pasi lea uamea lea e aumai mai fafo. O lea se toe silasila i ai a le Malo i lea tulaga?

 

Tuilaepa:  E eseese a manatu, ia auā e manatua ua tele a tatou pasi e faapena, o lona uiga la a faatatia atu nei se polokalame e faasa ai i le masina fou, o lona uiga o lea a le toe feoai nisi.

A’o se mataupu o lea a e liuliu malie i ai ia manatu o le Malo. O pasi a e lelei a pasi, e ala a ona faaletonu pasi o le mitavale; ia o le mea lea na ou vaai i ai i le pasi lea na lavea, e ova ma le 100 mita le mea na taavalevale atu ai le pasi ua ova ma le saoasaoa.

O le tulaga la lena e ala a na leaga le pasi, o le faaletonu o ave taavale, ave ma le le mafaufau. A’o le mea tonu la e tatau ona fai ma silasila toto’a i ai ia i le vaega lea e vaaia ia mea tau taavale afi, auā e o lua a le mea lea o le mitavale ma le tausaga.

Ai seiloga e fai se tulafono a le 30 tausaga ma aga’i atu i luga aua nei toe tago i le pasi, ia pei e faatulaga faapena auā e solomua a i le autalavou, leai se faautautaga, soona ave le mafaufau o pasi.

Ia ma le aoga foi lena o lea e manaia ai si a ta talanoaga lea i le leitio, o lea e faafogafoga mai le lautele o le atunuu, o e tietie pasi; O fea ea tou te nofonofo ai? a le a vaai atu ua saoasaoa le pasi, fai atu outou i le ave taavale. Sole! Tuutuu i lalo le alu o le taavale.

Ae a soona tele vave a le pasi ae nofonofo a, o lea foi e i ai le tiute o tagata e feoai i pasi matuā faatu lelei ai le pasi ae otegia le ave taavale, a ma logo i ai e o atu loa a lipoti i leoleo pe lipoti i le ana le pasi.

Tasi na mea o le isi taga ia e…

 

2AP ma le Palemia:  Ae aua le polea le ave pasi?

 

Tuilaepa:  Ia e manatua foi, o lea o le fautuaga e tuuina atu e fai atu i le ave pasi, taofiofi lau taavale aua le soona saoasaoa. Ia e leai a se mea e tatau ai fua ona pole fua le ave pasi e leiloa foi pe lelei lima o le ave pasi latou, e fai foi ma le fuafua.

 

2AP ma le Palemia:  O le a se silasila i ai, ona foliga mai e le’o lelei ona faatountonu tulafono e avagaa ai tagata e ave pasi, auā o le mea lea e fai mai ai isi, e supakako, supakako a le isi te’i ua vaai atu ua oso mai le pasi ua ave pasi mai?

 

Tuilaepa:  Mea lena e tatau ona vaai i ai le LTA, i le tagata lea e tatau a ona faamalosia le… e tusa a pe supakako, ae a fai a e lelei le faautautaga o lana avea o le taavale, e leai se mea e… ia la avane ai le supakako ma isi tagata a’oa’oina ae lavevea a taavale.

Ia o le mea a lea o le mitavale ma le onā, auā o mea a na e lua e tupu ai faalavelave, mitavale ma le onā, a le onā i le pia onā i mariuana.

 

2AP ma le Palemia:  O le isi itu Lau Afioga, ia ua leiloa foi e tagata, e i ai isi taimi fai mai ua sa le laau pese, i le taimi nei la ua toe laau pese uma a le tele o taavale ua faalogologo, ua leiloa la e le tagata le faalogologo mai a le ave pasi, i le fai atu o tagata e tuutuu i lalo le leo o le pasi. O le a se silasila i ai i nei mea?

 

Tuilaepa:  E leai o mea a na ia mo le faautautaga tatau, auā e tusa a pe leotelē le, auā o le mea mo’i a e taga a le laau pese e faalogologo ai foi tagata ma ti’eti’e i le pasi, ia ae aua le soona faaleotelea, o le tulafono lena aua le soona faaleotelea, ae le afaina a le leolaititi.

Ia ma e le taofia le, tusa a poo le a le telē o le leo o le laau pese, a ē loto a e faatelē atu lou leo i lou valaau atu ai, e telē atu a le leo o le tagata nai lo le laau pese.

© Samoa Observer 2016

Developed by Samoa Observer in Apia