Tele aseta fa’aleagaina

By Ilia L Likou 13 March 2018, 12:00AM

E tusa ai ma ripoti mai le afa o Gita ua mavae atu nei ua fa’ailoa mai ai le faitau miliona o aseta fa’aleagaina a le E.P.C. mai lea afa mata’utua.

O lea tau faatusatusa na saunoa i ai le Afioga i le Ofisa Sili o Pulega a le Faalapotopotoga, Afioga Tologata Tile Leia Tuimalealiifano i le feiloaiga ma le Vasega o Tusitala ma Au Faasalalau.

I le saunoaga a le Palemia Afioga Tuilaepa Dr. Sailele Malielegaoi ma le au faasalalau, na pueina i le Lagoto Beach Resort, ina ua mae’a le asiasiga a le Kapeneta ma Sui o le Komiti o Faalavelave Faafuase’i lea na latou asia le motu i Savaii, e silasila ma maimoa i aafiaga na aafia ai le motu mai le afā o Gita na ia saunoa ai e fa’apea;

Tuilaepa: O lea e i ai le isi vaega o le Kapeneta o loo ta’ita’i e le Afioga ia Fiame le Sui Palemia, o loo asiasi la latou i le Itu Salega, faatasi ai ma isi sui o le Komiti o Faalavelave Faagfuase’i.

O lea la o le a toe fo’i e pu’e le vaa; Salelologa mo Apia, ae o le vaaiga a le matou vaega lea sa asiasi mai i le itu lenei, o loo matauina ai e le tele a ni mea faaleagaina i Savaii nei.

Matou te le’i vaaia ni tulaga o le afaina o poumoli, o le tulaga foi o faatoaga, ia na’o nai ‘ulu aemaise a Safotu, ia ma fa’i e le tele, e pei a na’o ulu ia na aafia o lona uiga o le matagi lea e aafia tele ai ia le tulaga o laau totō.

O le faamoemoe la o lea ua mae’a ia Upolu, ia lea foi la ua fa’ai’ui’u ia Savaii nei, e ia le faamoemoe o le vaiaso fou e tatau ona taoto ai le ripoti a le Ta’ita’ifono a le Komiti.

A o le tauā o le oo mai o le Kapeneta; ia te a’u Sui Palemia ma Minisita, e tatau a foi ona matou vaai, ina ia le faalagolago tasi i ni ripoti, a’o le vaai toe silasila foi i ripoti o faamaumauga o mea faaletonu, o le itu ia e tauā e mautinoa ai ia le atoaga o le aafiaga o Samoa ona o le afā o Gita.

E faafetai ai i le alofa o le Atua ona ua vave ona alu ese le afā ma ἰ tatou.

Ia ma o lea la e taatia mai, e le tele ni mea na faaleagaina i le atunuu atoa, aemaise a la mo mea o le fa’i, masalo o le fa’i a ma le ulu lea na pito aafia aemaise ia faatoaga tetele, o nisi o nei faatoaga matuā tetele a toe fua lelei fa’i, ia a lea ua toe taia e le matagi, o nisi o fa’i o lea faatoa ia le totō oga fou, ia ou te lagona e ono fua mai le vaega lena i le taulotoa’iga o le tausaga e le’o afaina e le matagi.

O le faapuupuuga la lena o le matou talanoa atu, e oo foi i falema’i sa asia e leai se mea o faaletonu, a faapena foi i faaleaoga i le vaai atu lea i fafo, atonu e i ai a foi le faleaoga o loo sao atu le susū i mo mea o faamalama o lea e tatala, auā o le tasi a lena mea masani ona faatamala ai ia tatou i taimi o afā e galo le malosi o le matagi ae le tapunipunia ia faamalama ia ona sao atu lea o le vai i totonu o fale ma afaina ai ia potu.

Ia o le talanoa atu lena e tusa o le asiasiga, ae faafetai tele foi ia te outou le media i le mafai ona auai mai e mafai ona outou pueina ma faamaumau ia taualumaga o le asiasiga a le Kapeneta i Upolu ia faapea foi ma Savaii.

Fesili:   Lau Afioga ua e ta’ua le tulaga lea o aafiaga o fua o faaeleeleaga, fa’i ma ‘ulu aemaise o loo faaoga e le Malo ia faamaumauga nei e toe atia’e ai le fofoga taumafa aemaise le tulaga lea o oloa, o le tele o seleni o loo maua e le aufaifaatoaga o le faatauina atu lea o le ‘ulu, fa’i lea ua ave faaaisa foi lele i atunuu i fafo?

Tuilaepa: O mea a ia e ono tupu, e le faapea o afaina uma ‘ulu a le atunuu, e na’o nisi o ‘ulu ae le faapea o aafia uma ia ‘ulu; o lona uiga o la e tele a le vaega la e tutu pea.

A’o le luitau la mo tatou aiga, aemaise ia polokalame a Pule Nuu poo Sui o le Malo, e tatau ona unaia pea le polokalame o le totōina o ‘ulu. O le tauā o le itu lea o ‘ulu, ona o lea ua mafai ona tatou gaosia le falaoamata mai le ‘ulu.

Ia ma le lona lua, o le ‘ulu o loo i ai le tulaga foi lele e le’o i ai le property lea o le gluten (gluten free) e toatele a tagata e fia tausasami ai i taumafa faapena. 

E le faapena la le falaoamata foi lea e aumai i isi atunuu, a’o le falaoamata lea e gaosi mai le ‘ulu, o le faalaoamata lena o loo moomia tele e tagata foi lele o loo fai ma mata’itu lelei a latou taumafa ina ia aua ne’i afaina le soifua maloloina.

Lave: Lau Afioga o le isi tulaga ua maitau atu ua toatele nisi pei ua nofo faatalitalimai mai le Malo pe maua atu ai se fesoasoani, a’o lea e maua atu pei o aafiaga o maota ma laoa pei e manu’a mitimiti ona o lologa, O le a se fautuaga a Lau Afioga?

O le…..sa ou faamalamalaina le mea lea, o la e maua uma a e atunuu i fafo, auā e ala foi ona maua fesoasoani ona o fesoasoani e maua mai i atunuu i fafo, o la la e maua uma mai a le latou.

Ia e manatua mo mea o le tala o le tau, ua iloa uma a e le lalolagi le malosi lea na o’o i ai tatou, faatusa la i mea la e agi i o, e o’o i luga i le ova i le lua selau ia maila i le itula, ia a o tatou pe na’o tolu sefulu ea i le lima sefulu, o la latou te iloa, a faatulaga o le tasi lea e i ai tatou e le’i; na pa’i i le lua ae see ese loa ia le matagi ma tatou ma aga’i atu loa i Toga.

Ia e le’i tatitai o’o tatou i le tulaga foi lele e mafai ai ona faaosofia le agaga foa’i i le tele o Malo.

E.. o la lava e tapena le ripoti e le’i o’o atu, ia ae a maua la ia ni nai fesoasoani, ia masalo na’o ni nai mea foi ie e faaleleia ai lea vaega o le Malo. A’o mea a ia o tagata ta’ito’a tasi foi leia, ia e sea sea a, ailoga e mafai ona tatou maua ni atunuu e fia aumaia ni taga araisa.

I te’i ua ma’umau le faatalitali a o le taimi a lenei e amata ona fafai le maumaga latou ina ne’i te’i ua ai e manu alii.

Fesili:   Lau Afioga, e ese mai i vaega ia sa faaleagaina e le matagi, o le isi vaega sa maitauina o loo faatino lava ia galuega i auala galue, o loo galulue ai konekarate e faaleleia auala; O le a se saunoaga a Lau Afioga i lea tulaga?

Tuilaepa:   Ia o le….. auala ia o loo faagasolo pea, taipei la o i Pu’apu’a lea sa tatou asia, e silasila foi i uta i auala ma le faagasologa o le auala, o le vaega lea o tiute foi ua uma ona tuu atu konekarate e faatino e latou.

O lona uiga la, auā e i ai a le polokalame e le o taofia le polokalame na o auala, la e mafai a ona faagasolosolo auala, e tusa ai ona faasolosolo mai i polokalame a le Matagaluega o Galuega.

Ia lea la sa tatou matamata ai i le faagasologa o auala o loo manaia a le sologa lelei, lea tatou te o atu a o loo pisi mai ia loli i le lauga o uta, ia ae le gata i lena o isi foi masini o loo galulue pea i le faaleleia o auala lea sa tatou maua mai, a ona o le vaega na sa, ua le’o toe alu tatou i mea sa i ai i aso la, sa na’o o le Ofisa o Galuega.

Ia ona o mai loa lea o le Ofisa o Galuega na o le tasi a si mea fai a la e le’i taitai le atunuu, a o le taimi la lenei, ua vaevae ia konekarate i vaega eseese o le atunuu, e le ai a la se mea e faatali ai fua leisi i leisi.

Pau a le mea na ona leaga a o uma loa e tau fai gaioi uma a i le taomi e tasi.

O fuafuaaga na o lea ua tatou alu ai.

Aepeitai, e tusa ai ma ripoti a le Ofisa So’oupu na  fesiligia ai le Afioga i le Ofisa Sili o Pulega  i a Tologta i se tau faatusatusa o vaega o le eletise sa faaleagaina i totonu o le atunuu, ona o le afa o Gita.

“O le tau faatusatusa lava lea a le EPC o lo o i ai i le taimi nei, a o se taimi o i luma o le a iloa sa’o ai le tau atoa o vaega sa faaleagaina e le afa,”na saunoa i ai Tologata.

“O le tau faatusatusa lea a le EPC e aofia uma ai vaega e pei o le toe faaleleia o fale afi, laina faatasi ai ma pou e le gata o totonu o Upolu ae faapea foi i le motu tele i Salafai.

Galuega a le Faalapotopotoga o le Malosiaga tau Eletise na faasolo ina ua maea le afa o Gita.

“O le taimi lenei o loo faatupeina lava e le Faalapotopotoga le toe faaleleia ma le toe tosoina o laina eletise.”

“Ae a fai e i ai se fesoasoani mai se isi paaga, o se tala fiafia lena mo i matou, peitai o le taimi lenei, o loo faatupe lava e le Faalapotopotoga.”

Na saunoa foi Tologata i galuega sa faatino e le EPC ina ia vave ai ona toe maua e le mamalu o le atunuu le eletise i se taimi vave.

O ia galuega na faagasolo lea i le toe faaleleia o nofoaga o loo gaosia mai ai le eletise, e pei o le nofoaga i Afulilo, Lalomauga, Samasoni, Fale o le Fe’e ma Alaoa.

O le tele o ia afi e faasafua maia le eletise i nuu ma afioaga e pei ona saunoa Tologata, na faaleagaina ona o tafega ma lologa, peitai ua mafai ona toe faaleleia ma toe ola atu le eletise mo le mamalu o le atunuu.

Na saunoa Tologata, ua toe faasopolia uma nuu ma afioaga i Salafai i le eletise talu mai ona maea le afa o Gita.

“O le faigofie o le motu tele i Salafai, ona e le’i tele se faaleagaina o le motu i Salafai e le afa o Gita.

“Peitai o totonu o Upolu, e i ai nisi o vaega e lei oo atu i ai le eletise, ona o nisi o vaega na tuga le faaleagaina e le afa.”

Nisi o le aufaigaluega a le EPC i le faatinoga o le latou galuega toe faaleleia i poumoli.

Faagasolo pea galuega a le EPC e ui ua lata ina pogisa le atunuu. ō

Na momoli mai foi vai malu i puega i le mamalu o le atunuu, ona o le tuai na toe faaola atu le eletise i maota ma laoa.

“O le galuega lava ia a le Faalapotopotoga, e taumafai lava ina ia toe faafo’i atu le eletise i se taimi vave lava.”

Ae a fai o lou maota po o lou laoa e le i oo atu le eletise ae o lo o ola le eletise a lou tuaoi, e fia faailoa atu, atonu o le laina lea e agai atu i lou maota ma lou laoa, o lo o iai se galuega o lo o faatino ai.

By Ilia L Likou 13 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>