Le Toa e le-fefe

298 Hits

O LE A TAUVA MA LE PALEMIA: Tu’ulā Kiliri Lafi Tuitui.

O LE A TAUVA MA LE PALEMIA: Tu’ulā Kiliri Lafi Tuitui.

Ripotia e PaiMulitalo Ale 

Fa’aliliu e Maiava

 

O le sui-fa’atu o le a fa’afetauia nei le faipule aupito malosi i Samoa nei, o le Palemia fo’i o le atunu’u, o Tuila’epa Sa’ilele Malielegaoi, ua mautinoa, o se tagata-toa e tele le-fatu.

Ae le o se tagata fitifiti le Afioga a le Faipule fa’aolioli o le Itumalo o Lepa, o Tu’ula Kiliri Lafi Tuitui. 

Na fa’aalia e le sui-fa’atu lea o Lepa, e talitonu lava ia, o lona taimi lenei e fa’alele ai fulu ma tatala le ‘ato-au, fa’atasi ma le fesoasoani mai Le Atua, e matua talitonu ai, e mafai lava ona tusi-a’ao Le Atua ia Tavita, e ta’oto ai Koliata.

E le gata ua fa’ailoa mai lona tauva ai i Faiga Palota, o ia o se sui o le Vaega Fa’a’Upufai a le Tautua Samoa, a ua mae’a fo’i ona resitala aloa’ia i le Aso Gafua ma o le aso la na ta’ua ai, UA SAUNI.  

E leai  sona finagalo e faia ni fa’aaliga e ta’u-mamaina ai le o le a le Iloilo i le palota.

“’E ta’utino lava le solo a le tamaloa, e le mafai ona ‘ou fa’afaia’inā le Ali’i Palemia a o le fesoasoani lava o Le Atua ma Lana ta’ita’iga, e mafai ai so’o se mea,” o lana fa’aaliga lea.  Saunoa le sui-fa’atu, e fa’aaloalo tele i le Palemia ma na te fa’afetaia Lana Afioga ona o mea lelei uma ua ia faia mo le itumalo i tausaga e tele ua mavae.

“E leai sa’u tala (leaga) ia Tuila’epa. ‘Ou te fa’aaloalo tele iai aua o ia le faipule o le matou itumalo ma o le ta’ita’i fo’i o le tatou atunu’u.”

“Ae pule lava ia po’o a ana saunoaga e fai. Pe si’i a’u i luga, ato i lalo, soli i vae ma fe-ato solo i ‘autafa, e le afaina.”  

Na ta’ua e Tu’ula, e le’i sauni e fa’ailoa mai ni ana fuafuaga mo le lumana’i ae maise fo’i ni mafuaga ua mana’o ai e finau i le palota.

Pau le mea sa na ta’ua, e iai ana fuafuaga mo mea e mana’o e fa’atino, pe a manumalo. 

Ua silia i le lima tausaga o tapenapena mo le Faiga Palota lenei.

Sa tatalo ia “Yahweh” mo lana ta’ita’iga ma le malosi.

O “Yahweh” o le ‘upu Eperu mo Le Atua.

“O Ia lo’u malosi ma lo’u fa’atuatuaga,” o lana fa’aaliga lea. “’Ou te to’atuli ma tatalo i le Atua i ao ma po ta’itasi mo Lana lagolago ma Lana fesoasoani. Sa ‘ou ‘anapogi fo’i ma tatalo mo le aso lea.” 

Na te’ena e Tu’ula nisi tala fa’apea, o lo’o una’ia malosi o ia e le Itu Agai, ina ia tauva ma le Palemia.

“E leai ma se tasi na fai mai ‘ou te alu i le palota,” o le saunoaga lea a le sui-fa’atu.

 “Ua leva ma ‘umi se taimi sa ou tapena ai. Ua silia i le lima tausaga na ‘ou galue ai ae taula’i pea le va’ai i le palota.” 

Na ta’ua fo’i, o le tauva ma le Palemia e le faigofie ona ua silafia, o lo’o iai le malosi ia Tuila’epa, ma e tamaoaiga fo’i i so’o se mea. 

O Tu’ula sa galue i le Fa’alapotopotoga o le Malosi Tau Eletisi (EPC) mo le iva ma le ‘afa tausaga, i le Vaega o Inisinia ma Mita.

Tu’ulā is the eldest son of LafiTuitui and FaapitoFiliPe’epe’e of Saleapaga, Vailoa Aleipata and Avao Savai’i. 

Na fa’amavae Tu’ula i le 2007 ma fa’atuina loa lana ulua’i pisinisi, le K1 Car Wash i Vaimoso, soso’o ai le Kamupani Tau-Eletise, le K1 Electical Company.

O ia o le alo matua o Lafi Tuitui ma Fa’apito Fili Pe’epe’e o Saleapaga, Vailoa Aleipata ma Avao i Savai’i. 

Ua fa’aipoipo ia Carolyn Tuitui ma e to’alima o la alo. 

O ia fo’i o se sui o le Fa’apotopotoga e ta’ua o le Netzarim Religion e faamautu i Niu Sila.  

 

 

© Samoa Observer 2016

Developed by Samoa Observer in Apia