Pule fou mo le Pulega o Uafu a Samoa

290 Hits

Ripotia e Lanuola Tusani Tupufia

Fa’aliliu e Maiava 

 

Ua iai nei le Pule fou mo le Pulega o Uafu a Samoa (SPA). 

O ia lea o Aiganala’avasa Uialatea Asofa Fereti mai A’ele-fou.

O lea tofiga na fa’amaonia mai ananafi e le Sui-Pule o le Pulega, o Mautanoa Mapusaga Tanuvasa.

Na fa’ailoa mai i le Samoa Observer, sa tu’uina atu i le vaiaso talu ai se Pepa mai le Kapeneta e fa’amonia ai le tofia o Aiganalaavasa i le avanoa.

E foliga mai o le a fa’atoa amata aloa’ia Aiganalaasava i lona tofiga fou, i le amataga o Mati, e suitulaga ai i le Pule Sili talu ai, o Tufuga Fagaloa Tufuga.

O Aiga o lo’o galue nei o le Fa’atonu o Fela’ua’iga ma ‘Au’aunaga Lagolago a le Ofisa o Tokelau i Apia.

Ina ua fa’afeso’ota’i atu e le Samoa Observer ananafi, ae saunoa mai Aiga, o le a fono muamua ma le Komiti Fa’atonu a le Pulega o Uafu i le vaiaso fou, e talanoaina ai lona tofiga. E le’i finagalo le Ali’i e talanoa fa’alaua’itele mai i lona tofiga fou. 

O le Pule Sili fou, ua lima tausaga o galue o le Fa’atonu o Fela’ua’iga mo Tokelau. 

I luma atu, sa galue ai i le Kamupani a le Pacific Forum Lina ma le Polynesian Shipping Ltd.

E silia i le sefulu tausaga o galuega o ia i le vaega o fela’ua’iga i va’a. 

© Samoa Observer 2016

Developed by Samoa Observer in Apia