O LA’U TALA FO’I

13 February 2016, 12:00AM

1. Matauina  i Tala Fou fai mai ua teena se tusi faamaonia e galue ai se tasi o tamaitai Loia e tusa ai ma ona faiva i totonu o Samoa. O lea tamaitai o se tasi lea o Loia Tamaitai iloga a Samoa ma ua leva foi ona tautua mo tagata o le atunuu i lea matata.

O lea la tulaga e peiseai e mafua mai le Sosaiete a Loia o Samoa.

E tusa ai la ma se tusi na sainia e le Sosaiete a Loia i Samoa na maua mai e le Samoa Observer mai le Failautusi a le Sosaiete a Loia o Tafailagi Peniamina-fai mai e le o tausisia e Leulua’ialii ma lona Fesoasoani  le Tulafono ma le Tulafono a Loia ma Faiga Masani Tau le Tulafono (Lawyers and Legal Practice Act 2014. Ia-e aliali mai la e o’o lava ia i latou e gafa ma le faatinoina o le Tulafono o loo i ai foi o latou eseesega-ma o ia la eseesega e tatau ona vave fo’ia-ona mafai ai lea ona fo’ia le tele o isi faafitauli. O lona uiga-o loia e tatau ona faia le faataitaiga i tagata o le atunuu! O le a sou taofi? 

2. Matauina pea i Tala Fou-e le o mafai lava ona faaitiitia le toatele o fanau o loo auina atu i luga o ala tetele-e faatau atu oloa ina ia maua ai se tupe e tausi ai o latou aiga! O lona uiga la-e matua leai lava se taimi o le faigamalo o loo tuuina atu e fo’ia ai lenei faafitauli-se’ia vagana ai lava le popole i le faiga-palota i le masina fou!

Afai la o lea foi o le a fai le isi faiga-palota-o lona uiga-o le a tulai mai foi se isi faigamalo –ae le o mafai lava ona fo’ia lenei faafitauli o loo tatou faafesaga’i pea i aso uma.

Afai la e leai se mea a le malo o loo faia mo lea faafitauli i le taimi nei-o lona uiga- a toe tulai mai foi pe a uma le palota- e leai ai lava sana mea e fai i ai! Afai la e leai se mea a le malo o faia i lea faafitauli-e faapefea la ona latou faia se faiga e fo’ia ai lea faafitauli i le taimi nei-ae o lea ua toeitiiti 40 tausaga o latou pulea le atunuu-ae leai se manuia o le atunuu o maua ai. A toe faaopoopo atu la i ai ma le faitau miliona ma miliona o tupe a le atunuu ua goto i le moana sausau talu ai faiga pi’opi’o a le Malo- e faapefea la ona tatou faapea e manuia ai le atunuu?

O le mea lea-palota i le mea e ola ai-ae le o le palota i le mea e oti ai! Ia e manatua lau fanau ma lou aiga i le taimi e te palota ai-aua a sa’o lau palota-ona manuia lea o lau fanau ma lou aiga! O le a sou taofi?

3. I le taimi nei ma le agai atu o le atunuu i le faiga-palota-ua matua le mautinoa lava pe o ai o tautala i le mea moni a’o ai o loo tautala faa’ole’ole! Ua le mautinoa foi poo ai le Sui Faatu e mata’u i le Atua a’o ai e le mata’u i le Atua! Aisea?

Leaga foi ua o’o lava I le Palemia ua na o le talanoa lava ma le Atua i le tele o taimi-ma o mea uma lava na te faia-o le Atua lava e tuua’ia! O ana faaiuga fai- fai mai e mai le Atua! O le itu la e ofo ai- a fua i le anoano o faiga pi’opi’o a lana faiga-malo-ma taupulepulega leaga a tagata faigaluega o le Malo-ailoga e mafai ona tatou faapea o ni mea ia mai le Atua?  O le tulaga lea ua i ai nei ta’ita’i o le Malo o Samoa-ua fai le Atua ma o latou fala se’ese’e-o soo se mea sese lava e fai -e fai mai lava o le Atua!

O se tulaga mata’utia lea ua i ai nei le Malo o Samoa-masalo ona ua faavae i le Atua-ua pogai ai! Ae lelei ona faamanatu atu pea i le Palemia ma lana faigamalo le Tulafono a le ATua-“Aua e te ta’u fua le suafa o Ieova lou Atua….! O le a sou taofi? 

4. Matauina foi le tete’e malosi o le Palemia i le talosaga a le Tautua Samoa Party ina ia faatu se Vaega e Tete’e atu i Faiga Pi’opi’o! Afai la o faiga pi’opi’o e inosia e le Atua lea o loo faavae ai Samoa-o le a le pogai o le tete’e o le Malo i lea mana’oga o le Tautua Samoa Party?

Afai la e pei ona fai mai le Palemia-o loo i ai lava faiga e faatino ai lea fuafuaga e pei o le Komesina o Sulufaiga ma le faatu o se Komisi Su’esu’e-o le a la le pogai o le faatuai o lea fuafuaga? Afai la ua uma ona faamaonia e le Palemene le Lipoti a le Pule ma Su’etusi Sili ma le Lipoti a Alii Ofisa o le Palemene e uiga i isi faiga pi’opi’o- o ai la lea na te taofia le tuuina atu o lea mataupu ina ia suesueina e le Faamasinoga? O le tali o le Palemia-ae o le taimi tonu lava lenei e tatau ai ona fai faamasinoga o lenei mataupu-a’o lei faia le faiga le Palota! O lona lelei-o le a iloa lelei ai e le atunuu tagata pi’opi’o –ona latou le toe palota lea i ai-ae palota mo tagata faimea tonu! O le a sou taofi? 

13 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>