Le tama’ita’i Samoa moni

By Sarafina Sanerivi 13 January 2017, 12:00AM

“O so’o se tama’ita’i Samoa lava  e ao ona malamalama  lelei i lona tulaga e tu ai i totonu o lona aiga, nu’u ma le ekalesia.” Sia Efi Ofoia, 34 le matua o Salani Falealili. I le fa’atalatalanoaga ma Sia i le aso ananafi na ia fa’aalia le taua o le sao o le iloa lelei e so’o se tama’ita’i o lana tu, savali i so’o se itu na te fa’atinoina.

“Aua fo’i e pei o tama’ita’i latou te fa’ailoa atu le aulelei ma le maopopo ma le matagofie o le aganu’u i le tele o vaega aemaise lava i totonu o afio’aga ta’itasi.

“I a te a’u ia o so’o se tama teine lava a ni matua Samoa moni lava, e pei o fanau teine lava e ave ai lo latou fa’amuamua.

“E fa’atonu fo’i le fanau tama , ia manatua o fanau teine o lo latou i’oimata e fa’apelepele i ai.

“Ia ona amata mai lava lea o le olaga o le tama teine, ia e fa’atonu i le lalagaina o ietoga, o fala ma so’o se vaega.

“Aua fo’i a matua ane e iloa fa’atino vaega nei a matua ma fai sona to’alua a alu i le aiga o le a nofotane ae e iloa ona fa’atino tiute nei.

“E le gata i lena so’o se tama’ita’i Samoa lava, e iloa i ona la’ei ma o se tasi lea o vaega ua le toe maua  e le tele e tama’ita’i o le atunu’u.

“O le tala masani lava e iloa fanau teine e lava lelei mafutaga ma matua i o latou ofu po’o la’ei masani ai Samoa.

Ae o nei aso ua tele le suiga.

“Aua e ta’utino atu pea ia o nei aso , ua le kea lava le isi tama’ita’i i ona ofu e fai e tiga lava ona fesaga’i ma tuagane ia ua la’ala’a lava ma le ofuae vaepupu’u i totonu o le fale.

“Ua tu’usa’oloto lava e matua, ua leai se fai i ai, ia alu e fai lelei sou ie i so’o se mea e te alu i ai.

“A’e alu i le fale o le matai, fale o le faife’au ma isi , ia fai lelei o outou lavalava.

“Ua leai se va tapuia, ua leai se fa’aaloalo, ma i a te a’u ia o nisi o taimi e ta’u mai lava i lavalava o le tama’ita’i le lelava lelei o mafutaga ma matua ia po’o matua fo’i ua leai se una’i o fanau i le olaga fa’asamoa moni.

“E le gata la i nei vaega, ae o le gagana , e ao ona silafia lelei vaega nei.

“Atonu ua fa’apea isi, ia ua uma fo’i tou aso, ae ou te iloa o nisi nei o tulaga ua fai ma fa’atupu fa’alavelave i le fesagaiga a aiga.

“Ae o le teine ma le tama’ita’i Samoa moni, ia  e le tauilo lea tulaga, i le savali, tu tautala ma le aganu’u.

By Sarafina Sanerivi 13 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>