Ua pulepule le aganu’u – Savea

By Sarafina Sanerivi 13 January 2017, 12:00AM

O lea le finagalo fa’aalia ma le talitonuga o le tamā i a Savea Noveeli, 56 le matua o le soifua o Salelesi i le fa’atalatalanoaga ma le Fofoga o Samoa i le aso ananafi.

O lea fa’atalatalanoaga na ia fa’aalia lea tulaga ua fai ma popolega i le taimi lenei ma o se itu e ao ona toe silasila toto’a i ai pulega a ali’i ma faipule aemaise le lagolagosua a le malo ma tagata uma.

“Ia a o tatou maitau lava i le taimi lenei ua matua’i leai lava ma se toe mamalu o le tele o vaega o le aganu’u e pei ona sa sau a’i Samoa i aso ua alu.

“Ua pule lava le tagata ia i si ana valivali i ai, e pei ua i ai le tulaga fo’i lele e pei ona fa’atalatalasua ai e fa’apea e – e sui lava faiga ae tumau fa’avae.

“Ia e leai se na mea ua toe i ai lenei taimi ua sui atu a faiga ma sui atu ai lava ma le mau fa’avae e pei ona i ai le atunu’u o Samoa.

“E o’o lava i totonu o nai o tatou aiga ia ua leai se namu lelei na i ai le tele o mafutaga a matua ma fanau, le mafutaga fo’i lea o le o’o le afiafi fai lotu fa’atasi.

“Le olaga fo’i lea a o’o i taimi na ona talatalanoa lea o matua i fanau, o lea itu e ao ona fai ae o lea le vaega e le tatau ona fai.

“E o lava fanau e fai gugu mea uma ae o nei aso, ia o lea ua tatou tau fai molimauina le mata’utia ma le saosaoa o le tele o olaga a fanau ua puapuagatia ona ua leai se mafutaga lea.

Na ia ta’ua o le isi fa’afitauli i le aganu’u ua amata ona tala i tua le tele o suafa o matai a aiga.

“Ia a maitau lelei lava, ia o lea le tulaga a fia matai a lea tagata ua sau ua fai lona matai, e aunoa ma se tulaga fo’i lea o le silafia o le uiga tonu o lona matai.

“Ma o lea ua o tatou molimauina le tele o saofa’i e pei ona ua mae’a atu nei.

“O se itu taua ae ao ona toe silasila lelei i ai, ina ne’i alu alu nai vaega o le aganu’u mou atu, ona o tatou toe su’e togafiti lea mo se fofo ae ua tuai.

“Ae o lea lava le tulaga e ao ona toe silasila i ai, aua ua pei ua sau lava le taimi ma ona suiga ae le tatau ai ona sui tu ma aganu’u na sau ai le atunu’u i le tele o tausaga ua mavae.

By Sarafina Sanerivi 13 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>