Fa’ailoa i le Palemia, ua tatau ona malolo

196 Hits

Palemia, Tuilaepa Sailele Malielegaoi ma Afualo Dr. Wood Salele.

Palemia, Tuilaepa Sailele Malielegaoi ma Afualo Dr. Wood Salele.

Ripotia e Deidre Fanene

Fa’aliliu e Maiava

 

Ua tatau i le Ali’i Palemia ona malolo. 

O le fa’aaliga lea a le Minisita Fa’aolioli o Tupe a le Vaega a le Tautua, o ‘Afualo Dr. Wood Salele, lea e talitonu, ua mo’omia e Samoa se ta’ita’i fou.

“’Ou te manatu ua o’o i le taimi ua tatau ai ona se’e ‘ese le Ali’i Palemia ma le tofi ae fa’aalu ona taimi o totoe i nisi vaega e fa’afiafia ai lona soifua,” o le fa’aaliga lea a ‘Afualo. “E aga’i pea i luma le atunu’u. E ao ona tatou manatua, ua na o tatou o ni mea-faigaluega, mea-faigaluega mo le atunu’u. 

 “’Ou te fia fa’amanatu atu fo’i i le Ali’i Palemia ma le Vaega a le HRPP, ‘upu o lo’o i le Tusi Pa’ia. E manino lava i le Tusi o Fa’ata’oto 29: 18 e fa’apea “A leai se fa’aaliga, e fa’asalalauina le nu’u.” 

O le finagalo o ‘Afualo, e moni ua tele galuega a le Palemia ma lana faiga-malo ua faia mo le atunu’u, a ua leai nisi a latou manatu ma fuafuaga fou.

“O le mea lea ua tatou va’ai so’o iai (mai le malo), e le o ni mea fou. Na o le toe tilotilo lava i a latou faiga-fa’avae ua fia tausaga o iai.” 

O le sui-faipule mai Salega, o se tasi sa a’oa’oina fa’apitoa i le fa’asoasoaina tatau ma le fa’atatauina o tupe, o le fa’aalia o lona finagalo, e tali-fuaitau ai i saunoaga a le Palemia fa’apea, e vaivai tele fuafuaga a le Vaega a le Tautua sa faia fa’atatau mo Faiga Palota o loma nei. Na tu’ua’ia fo’i le Palemia le Tautua, ona o le fa’ata’ita’i I fuafuaga fa’ata’oto a le malo.

Peita’i, e le ‘auai le finagalo o ‘Afualo. 

 “O se va’aiga fou lea ma mafaufauga fou a le Vaega lenei,”o lana fa’aaliga lea e uiga i faiga-fa’avae na fa’alauiloaina i le vaiaso talu ai, lea e fa’a’autu lava i avanoa tutusa mo tagata-nu’u Samoa uma. 

I se toe tepa i galuega fa’atino a le HRPP i le tolusefulu tausaga ua mavae, na ta’ua e ‘Afualo, ua tele atina’e ua latou fa’atino mo le atunu’u, i tulaga o le fausia o fale a’oga ma fale-tetele. 

Peita’i, e matua fa’aletonu lava ma le-lelei pe a fua i le soifuaga e laugatasia ai le lautele o le atunu’u ae maise le atina’eina o tagata ta’ito’atasi.  

“A tatou nonofo lelei e Iloilo toto’a le silia i le tolusefulu tausaga o le pulega a le HRPP, ona iloa lelei lava lea, e le tatau ona o’o Samoa i le tulaga o iai nei. Sa tatau ona matua sili mamao atu ma lelei le atunu’u lenei.

 “O le tulaga tonu lava lea o lo’o matou taumafai e fa’atino aua, i nei tausaga e tele, a silasila i tulaga o iai nei tupe-fa’aagaga i fafo, lea e ta’ua so’o e le Ali’i Palemia, e na o se vaega lava e tau-fa’amautu ai, o lo’o va’aia lelei ia tupe e le Faletupe Tutotonu.

“A ua fa’ateleina atu fefa’ataua’iga i fafo e ala i tupe-fa’amomoli mai aiga nai lo se isi lava taimi. O le mafuaga, ona o lo’o alolofa mai pea o tatou tagata e lafo mai tupe i aiga.

“O tausaga uma lava, e silia i le limaselau miliona tala tupe e lafo mai aiga Samoa i fafo. O se matua tupe tele lava.

“Ae a silasila la i le taimi nei, i le paleni o tupe totogi, a to’ese la tupe fa’amomoli mai le aofa’iga, e mautinoa lava e leai se tamaoaiga o Samoa.

 

 “’Ou te iloa lava, ana fa’apea o Tuila’epa o se ta’ita’i mataala, na te ‘ave lava le fa’afetai i aiga-Samoa i atunu’u i fafo, o lo’o fesoasoani mai pea ia Samoa.”

Na ta’ua fo’i e ‘Afualo, o le fuafuaga a le Tautua mo Faiga Palota, e le na o ni “mafaufauga”

“Ua loa o matou iloilo toto’a iai i le lima tausaga ua mavae nei ma matou iloa ai, o le tulaga lea ua tatau ona iai lo tatou atunu’u.”

“’Ou te fia fa’amanatu atu lava i le mamalu o le atunu’u e aofia ai ma le Ali’i Palemia ma latou o lo’o tu’u-fesilisili pea pe fa’afefea ona matou fuafua e fa’atupe mea uma nei i le lima tausaga o muamua a’o lea ua matou ‘ave le fa’amuamua i mana’oga patino e pei o a’oa’oga, le soifua maloloina ma isi vaega taua.

“O le ‘autu lava, a tula’i mai le vaega lenei, o le a amata loa ona atuna’e faiga-fa’avae aua e tatau ona avea ma tulafono e maua ai le taimi e tilotilo ai i isi vaega o lo’o va’aia e le malo ona o le tele o nei vaega, e le o manino mai i le taimi nei.

 “O le ta’ua o ia tulaga, ua matou talitonu ai, o lo’o lava ma totoe tupe o lo’o i totonu lava o le tamaoaiga lautele e fa’atupe ai lea va’aiga mamao. A’o tatou aga’i atu mo le isi lima tausaga o muamua,  o le a matou fa’amautuina lava i le tausaga lona lua po’o le lona tolu, o le a fua mai nei fuafuaga uma ma o le a manuia ai tagata-nu’u o Samoa uma, ae le o le Tautua.”

A o le fa’aleagaina ma le ta’u-mamaina e Tuila’epa o le latou fuafuaga, na ta’ua e ‘Afualo, e le o se tulaga e fa’ate’ia ai. 

“E iai taimi e matua fa’aletonu ai ma le-fa’atuatuaina le Palemia,” o lana fa’aaliga lea. “’Ou te iloa, o le tele o taimi, e fai mai o matou e valea ae le o malamalama, o ia la e fa’avalevalea.

“Ana o ia o se tasi e loloto le tofa, e le so’ona saunoa fa’apea ma va’ai-maualalo i isi tagata aua, o le poto lena fa’aleAtua. A’o le mea lea ua tatou va’aia i le Ali’i Palemia, e matua leai lava o se tofa o iai.” 

“O la’u fesili la, o fea e ‘aumai ai lona poto lea? E mautinoa lava, e mai tevolo. E foliga mai, o ia le tevolo lea e tu’u-alaga nei ma leotele a’o lea lava tatou te fa’aaloalo iai, o ia o se ta’ita’i.

© Samoa Observer 2016

Developed by Samoa Observer in Apia