Sauni Samoa mo le Fusu’aga Tele

185 Hits

Lupesoli’ai La’auli Joseph Parker.

Lupesoli’ai La’auli Joseph Parker.

Ripotia e Maddison Clarey

Fa’aliliu e Maiava

 

Ua toe tasi nei le vaiaso, taunu’u le fa’amoemoe ua leva o talia e le atunu’u aoao – le fusu’aga tele a Lupesoli’ai La’auli Joseph Parker.  

O le Aso To’ona’i nei, e to’ai taunu’u ai i fanua, le ali’i-fusu Samoa ua 23 tausaga o le soifua, fa’atasi ma lana vaega atoa, mo le la fusu’aga ua leva o fa’atalitali iai lona atunu’u, e fetaui ai ma le agavale mai Amerika, o Jason Bergman, i le Aso To’ona’i i tua atu. 

O lea fusu’aga, ua fa’aigoaina o le “Fusu’aga Tele i le Parataiso”, o lo’o tapenaina e le Vaega a Duco Events, ma o le a fa’atinoina i le Malae Ta’alo i Tuana’imato. 

Na fa’ailoa mai e le Fa’atonu o le Duco Events, o David Higgins i le Samoa Observer ananafi, ua leva ona tapena fiafia mo le o’o mai i Samoa. Ua na mautinoa fo’i, o le Fusu’aga i le Parataiso, o le a manuia fo’i e pei o le tulaga lelei sa iai le malaga mai a le ‘Olopeleki i le tausaga talu ai, ae maise o le fa’amautuina o le tulaga talimalo o Samoa, i ta’aloga tetele fa’apea e mo’omia tele ai fa’asalalauga i TV ma satelie i le lalolagi atoa. 

“Ua talia lelei ma aloa’ia le fusu’aga lea e le Fa’alapotopotoga o Fusu’aga a le Lalolagi, ma e miliona ma miliona tagata matamata o le a fa’atalitali mai mo le i’uga e o’o iai,” o le fa’aaliga lea a Higgins. 

 “O Samoa o se atunu’u ua maoa’e le tula’i mai e ui o se tama’i-motu o le Pasefika ae maise i tulaga tau-ta’aloga. E ui e le to’atele na’ua le faitau-aofa’i o ona tagata, a ua to’atele naunau tama-sasa’o e fananau mai ai, e pei o David Tua am Maselino Masoe. O le tulaga lava lea, ua leva ai ma tatau ona talimalo Samoa, i lana ulua’i fusu’aga fa’ava-o-malo lenei, lea o le a fa’asalalauina i tulimanu uma o le lalolagi.”

Ae le faigofie le talimalo ai Samoa i fa’amoemoe tetele fa’apea.

“Moni o le ‘aumaia o se fusu’aga tele fa’apea e le-misia ai le tele o mau tapena ae maise o lu’itau ‘ese’ese e ao ona fa’amalieina,” o lana fa’aaliga lea.

“Peita’i, o le a alu i tala-fa’asolopito lenei fa’amoemoe  ma o se tulaga lelei tele mo le si’itia o le igoa o Samoa e fusu’aga ma ta’aloga fa’ava-o-malo, o tulaga tau-turisi ma fa’ailoa atu ai fo’i le gafatia e tagata Samoa, ona fa’atinoina fa’amoemoe tetele fa’apenei.” 

Ona o ia tulaga manuia,  na ta’ua ai e Higgins, le naunau o le latou vaega e fuafuaina nisi fusu’aga fa’apenei e faia mai i Samoa i le lumana’i.  

 “Na alo lelei le Duco e tapena le fusu’aga lenei i le tolu tausaga talu ai ma na ‘ou matua fiafia ai lava, ona o lo’u asiasi so’o mai ai i Samoa nei. E tele lava isi vaega tau-ta’aloga e tatau ona fa’ao’o mai i Samoa nei, e mautinoa la, e toe o’o mai fo’i i se isi taimi e le mamao tele.” 

A’o le’i o’o i le aso o le fusu’aga, o le a fa’atino e le Vaega a Duco se a’oa’oga ma se koleniga e ‘auai ai ma Joseph Parker, e avea o se taumafaiga e fa’afo’i ai le fa’afetai mo le mamalu o le atunu’u. 

E faia lea fa’amoemoe i Tuana’imato i le nofoaga e faia ai le fusu’aga. O le koleniga lea, e mo fanau a Samoa o lo’o fiafia i le ta’aloga ae maise tupulaga talavou, o lo’o fufusu pea e maua ai se isi fesoasoani fa’aopopo mai le ali’i-siamupini. 

O le “Fusu’aga i le Parataiso”, o se taumfaiga fo’i e una’ia malosi ai le fe’au, o le taofia o sauaga i le lotoifale o aiga. 

“’Ou te iloa o le fusu’aga lea, o le a momoli atu ai fo’i ma mana’oga ma fa’aosofia ai le atunu’u, ina ia “taofiofia pea ia mea o fusu’aga i totonu o le maea, e ui o se ta’aloga,” o le fa’aaliga lea a Higgins. 

Ua salalau i le atunu’u aoao, tala o le fusu’aga lea a le alo-fusu o le atunu’u.

Na ta’ua e latou o lo’o tapenaina le fusu’aga, ua mae’a ona fa’atau nofoaga – laulau ta’ito’atele. O le pepa maualalo lava, e $50.00.

O le afiafi lea o le fetaui ai Lupesoli’ai ma le ali’i e 31 tausaga mai Amerika, o Jason Bergman ma afai e manumalo ai Parker, o le a tele sona avanoa e ono fusu ai mo se fusi o le paga-mamafa i le lalolagi.

O le a fa’asalalauina tu’u-sa’o le fusu’aga i Samoa nei e le TV 3 i le Aso 23 o Ianuari, a’o sauna fo’i isi fusu’aga tetele a le paga-mamafa lava e faia i Niu Ioka i le fa’ai’uga o le vaiaso nei. O le a mafai ona maimoaina ia fusu’aga uma i le TV3 i le po o le Aso Sa nei.

E taua tele le taunu’uga o ia fusu’aga mo Lupesoli’ai, e tau fuafua ai se isi ana fusu’aga i le lumana’i, a’o mata’itu sona avanoa mo le fusi o le lalolagi. 

O lo’o galulue nei le TV3 e fa’aleleia uma a latou feso’ota’iga e le gata i Upolu nei, a’o Savai’i fo’i ina ia mautinoa le lelei o le silasila a le mamalu o le atunu’u aua le tapua’iga a le alo o Samoa.

O le a fa’apea fo’i ona fa’asalalauina tu’usa’o i Niu Sila le fusu’aga e avea o se faiga e tosina mai ai maketi tauTurisi mo Samoa ae maise lava, o le a to’atele le lalolagi e fia tulitulia le fusu’aga a Parker, lea e tulaga-tolu i le lalolagi, i fa’atulagana a le Fa’alapotopotoga o Fusu’aga a le Lalolagi. E mautinoa lava, o se fusu’aga o le a maimoaina e le lalolagi atoa. 

Ua fa’atauina nei pepa-ulufale i faleoloa uma a le Digicel.

© Samoa Observer 2016

Developed by Samoa Observer in Apia