Mana’omia le toe fai o le auala

By Deidre Tautua-Fanene 12 December 2017, 12:00AM

O Pasi Lualua o se tamā mai le afioaga o Tuanai.

I le la faatalatalanoaga ma le Fofoga o Samoa sa ia ta’ua ai le telē o le faaletonu o loo i ai auala i Tuana’i.

Sa ia ta’ua fo’i ua leva ona ave le talosaga a le afioaga i le malo ae ua oo mai lava i le asō e leai lava se mea ua tino mai.

“O lenei ua toe i ai le isi nofoaiga fou a le tasi pulenuu fou a’o lenei lava e le’i toe faia le auala lenei.

“Ua fai si umi talu ona ave i totonu le matou talosaga ae peitai e leai lava se mea o tino mai.

“O le talosaga sa faaulu i totonu e le matou pulenuu muamua sa i ai lea ua uma atu lana nofoaiga a lea ua sau leisi nofoaiga fou o lenei lava e faatali le toe faiga fou o le matou auala.”

Sa ta’ua foi e lea tamā e tele lava ina omai le au fai auala fai ae e uma lava timuga ma toe foi lava i le mea tuai le auala.

“E omai lava le au faiauala tanu ona manaia lea ae a oo la i taimi o timuga o iina e iloa ai le tulaga sa faia ai le auala.

“E sau lava le timu toe tafi uma ese lava le iliili lea sa tanu ai ae tu mai lava le auala tuai.

“O le talosaga a le nuu i le malo e faamolemole e manaomia e Tuanai le toe faaleleia o auala ona ua tele aiga o loo nofoia lenei nofoaga ma ua toeititi tofu taavale uma aiga.

“A tuu ai lava faapea o le a tele taavale o le a faaleagaina ona o le tualaga o le aua o loo i ai nei.

“Ua faigata le soifuaga o loo I ai nei ae a faaopoopo mai foi la ma le toe faiga o taavale ua faaleagaina ona o le auala ua telē ai lava ma le faafitauli.

“E tele le aoga o le taavale ona o le tele o matou e mamao i uta le nofoaga o loo I ai matou faatoaga e manaomia foi la le taavale e o ai I uta I le maumaga.

“O le augani la a lenei auauna I le malo e toe tagai ane I le talosaga a si o matou nei nuu e faatatu I ona auala ua fia faaleleia.”

By Deidre Tautua-Fanene 12 December 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>