O lo’o iai lava le mativa i Samoa

Tusia Vatapuia Maiava ma Sarafina Sanerivi ,

218 Hits

Le tama ia Tovi’o ma nai ona alo.

Le tama ia Tovi’o ma nai ona alo.

O Tovi’o Fesola’i o se tamā e 29 tausaga mai le afioaga o Lealaoali’i i Faleasi’u. 

O lona finagalo, o lo’o iai lava le mativa i Samoa, ae e le pei o le ituaiga mativa o lo’o maua i isi atunu’u. 

Tovi’o o lo’o alala ma lona aiga ma nai ona alo e to’atolu i lo latou fale i Lealaoali’i. 

O ia o se faima’umaga, ma na ia ta’ua e ui lava o lo’o iai le mativa i Samoa, o lo’o iai lava auala e maua ai mea e tausi ai aiga.

“Ia te a’u lava ia, o lo’o iai le mativa i Samoa, ae a tilotilo foi iai, e le’o pei Samoa o isi atunu’u i fafo. 

“O le ala lea e fa’afetai ai i le Atua ona o lona alofa ma lona agalelei ia Samoa. Auāe tusa lava poo le a le faigata o le olaga, e alofa mai pea lava le Atua ma foai mai mea e tausi ai aiga ma fanau.

“E manaia lava le olaga i Samoa aua tusa lava poo le a le faigata, o lo’o maua lava i laufanua meaai aua le tausiga o le fanau.”

Na ta’ua e Tovi’o, e moi lava e faigata, ae o lo’o ia taumafai lava ina ia manuia si ona aiga. 

“E lima vaivai lava si o matou aiga. 

“Ae o le ala lea e fa’amalosia ai au ou te galue ma le malosi, auā e leai se mea e maua ma le filemu.

“Ua taugata lava le soifuaga i le vaitau lenei. O le mea moni lava lea. 

“Ae e le avea la lea ma ala tatou te nofoa’i ai ma fa’alagolago i isi. E tatou te taufai galulue uma aua a le galue ma afu le muaulu, e ola falolo aiga ma fanau.”

E le gata i lea, ae na ta’ua foi e Tovi’o e tele lava fa’afitauli o lo’o feagai ai ma nai aiga i nu’u i tua.

“O lo’o iai lava nai aiga o lo’o fia maua se suavai. E tele foi o aiga o lo’o utiuti la latou fa’asoa ma o le ala lea e faigata ai le olaga moi latou. 

“Ae o le fofo lava o lea fa’afitauli o le to’aga e fa’aaoga tatau taleni mai le Atua aemaise o ana meaalofa ina ia maunia ai aiga, nu’u, ekalesia aemaise o le atunu’u.

“O si o matou aiga, o le ma’umaga lava ma fuala’auaina o lo’o fa’amoemoe iai mea e fai i totonu o le aiga.

“E sili atu ia a’u lea nai lo’o le faigaluega i totonu o le ofisa. O le fai ma’umaga, e mafai lava ona e alu fa’atau fua o fa’atoaga i aso uma, ma maua mai ai seleni. E maua ai foi ma meaai e tausi ai fanau e aunoa ma se tupe e fa’aalu ai.

“Ae a faigaluega, e se’iloga lava e oo i le vaiaso totogi fa’ato’a maua foi se tupe.”

© Samoa Observer 2016

Developed by Samoa Observer in Apia