Ua telē le suiga i amioga a le tupulaga

By Sarafina Sanerivi 12 December 2016, 12:00AM

Ua fa’afagogotagiao lava i le fa’afofoga a le atunu’u i finagalo o le atunu’u e tusa ai ma le tele o suiga o le olaga i Samoa i le vaitau lenei. 

E ese’ese foi lava la tulaga e fa’aalia ai finagalo o le atunu’u i vaega ua suia o le olaga i totonu o Samoa. 

Ae mo le tamā ia Kaio Le’a mai le afioaga o Nono’a i Saleimoa, o lona finagalo, o le itu ua mautauina le telē o le suiga o amioga a le fanau.

“Ua fai lava si saoasaoa o le olaga i lenei vaitau.

“Ua tele lava ina aafia ai le fanau ma ua tele ai fa’afitauli e tutupu mai i le tupulaga talavou. Ma e le’o se tulaga lelei lea i se vaai.

“Ua tutusa lava tama ma teine i le vaitau lenei. Aemaise lava le tulaga i le tagofia lea o le ava malosi. 

“Ua tauau ai ina faigata ona fa’atonutonu amioga a le fanau.”

Na ta’ua e Kaio, o le faigata o amioga a le fanau e amata mai lava i le la’ititi o le tamaititi. 

“E amata mai lava i totonu o aiga, fa’asolo atu ai lea i aoga. O totonu la o aoga lea e pei e atili tupu ai le fa’aletonu auā foi e ese’ese lava tamaiti ma o latou si’osi’omaga, e mafai ai la ona aafia ai amioga a isi tamaiti mai i isi tamaiti.

“E le umi a ae leaga atu ai ma le amio a le tamaititi lea sa lelei ina ua alu i ta’aiga ma fa’ata’ita’i fua i isi tamaiti.

“Fai fai lea o amioga le talafeagai ma fa’atupu fa’alavelave solo i nofoaga faitele ona le manaia loa lea i se va’ai ma se fa’alogo.

“E le toe natia lava le tulaga lea i le to’atele ma le anoanoa’i o i latou o feoa’i i tai e aunoe ma ni galuega ma fa’ama’imau ai o latou taimi.”

Na ta’ua e Kaio, o lo’o tele lava mea e tatau ona fa’aaoga tatau ai le malosi ma le taimi o tupulaga talavou.

“A ua le maua galuega, o lo’o iai lava isi tulaga e mafai ona fa’aaoga ai a latou taleni mai le Atua.

“Ae laga o le taimi nei, ua tele lava ina le fa’alogo fanau i se upu e avatu e matua.

“Tau feololo nei o le malosi o faiganu’u a matai ma ali’i o nu’u ma alalafaga.

“O lea foi e iai saofa’iga a aumaga ma aualuma e mafai ona fa’aaoga iai le taimi pe afai ua leai ni galuega. E taua lava le fa’aaoga tatau o le malosi.”

E le gata i lea, ae na ta’ua e Kaio, o le fa’amalosia lea o le aia tatau a le fanau o le isi lea tulaga ua mafua ai ona suia amioga a le fanau.

“Ua tele lava ina fa’alala i luga le aia tatau a le fanau. A ote atu le matua pe sasa foi ua o ave o latou matua i leoleo.

“Ua le toe pei o la aso e sasa lava ma fa’atonu le fanau pe a sese.

“O le ala foi lea sa lelei ai amio a i latou ua matutua i lenei vaitau, ona o le sasa ma le aoa’i a matua.”

Ae ui i lea, na ta’ua e Kaio, o lo’o sologa lelei lava le olaga i nu’u i tua. 

“Ua tutusa lava le atina’e o nu’u i tua ma nu’u o lo’o latalata i le taulaga. O mea lava o lae ua maua i Apia ua maua foi i tua nei.”

By Sarafina Sanerivi 12 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>