Se toe tepa i tua i le olaga sa iai

By Vatapuia Maiava ma Sarafina Sanerivi 12 November 2016, 12:00AM

Ua le toe tutusa lava le olaga o iai i le vaitau lenei pe a fa’atusatusa atu i aso ua mavae.  O le finagalo lea o tina ia Lealofi Tuaoimaali’i, e 80 tausaga mai le alalafaga o Tufulele. 

“E le’o toe tutusa lava le olaga i aso nei ma aso ua tuana’i. 

“O aso ua tuana’i, sa faigofie lava mea uma, ae peita’i sa faigata ona maua se tupe.  

“E o’o lava i se $10 e faigata lava ona maua. Ae peita’i o nei aso, ua tele lava ina su’e gofie tupe ae ua taugata lava le olaga ma oloa.  “Ae ui lava ina su’ega gata ni tupe i na aso, sa maua lava le fiafia auā sa tele lava ina fa’alagolago i le fa’ato’aga e maua ai mea’ai.”

E le gata i lea, na ta’ua foi e Lealofi o le isi fa’afitauli i nei aso, o le anoanoa’i lea o fa’afitauli e tula’i mai.  “O nei aso, ua tele le mau fa’afitauli ma mea ua tutupu mai i nei aso. Ae le’i fa’apena i aso ua mavae. 

“O le mea lea ua iai, ua le misi lava le ta’avale a leoleo e tate va’ai ai o pasi ifo i luma o le auala, ia ae iloa mulimuli ifo o nisi foi o fa’afitauli e tutupu mai i le tupulaga. 

“O la aso, o le pulega lava a matai e fo’ia fa’afitauli i totonu o le nu’u. Ma e seāseā foi lava iai ni fa’afitauli e tutupu mai.”

 Ae peita’i na ta’ua e Lealofi, e ui lava i le tele o suiga ua iai, o lo’o sologa lelei pea lava le olaga i totonu o Samoa.  “Ia ua faigata lava nei aso mo au ona ua le lava foi le malosi. Ae o le olaga ia, o lo’o manaia lava le olaga o Samoa i lenei vaitau. 

“E maua lava lota fiafia pe a vaai atu i le fanau ua asiasi mai. E to’afilemu foi lava le olaga iinei i le matou nu’u.  “Na pa lava le faigata o le maua ai i ma’i o le tino ma ua le mafai ai ona savali. Ae o lo’o manuia pea lava mea uma.

“Ana fa’apea foi o lea e maua le malosi, semanu foi e maua mai au o lo’o vele le vao i autafa o le fale ma fai feau e masani ai. “Ae o le fa’afetai lea i le Atua, ona o nei aso e tele ua foai mai o au.”

By Vatapuia Maiava ma Sarafina Sanerivi 12 November 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>