“Fa’aaoga tatau lou malosi,” Konelio

Tusia Vatapuia Maiava ma Sarafina Sanerivi ,

139 Hits

FINAU MO SE LUMANA’I MANUIA: Le taule’ale’a ia Konelio Fiapa’itasi mai le afioaga o Lotoso’a i Saleimoa.

FINAU MO SE LUMANA’I MANUIA: Le taule’ale’a ia Konelio Fiapa’itasi mai le afioaga o Lotoso’a i Saleimoa.

E tofu lava le tagata ma taleni na foa’i mai e le Atua. E tofu foi i tatou ma o tatou vala’auina. Ae e fa’amoemoe le fa’atinoina ma le fa’ataunu’uina o ia vala’auina i tagata ta’ito’atasi lava. 

O le finagalo lea o le taule’ale’a ia Konelio Fiapa’itasi mai le afioaga o Lotoso’a i Saleimoa. 

O Konelio e 20 ona tausaga, ma o lo’o aoga nei i le aoga matātā ese’ese a Don Bosco, o lo’o ia tauaveina ai le mataupu fa’aeletise. 

I se fa’atalatalanoaga ma le Fofoga o Samoa, na fa’alia mai ai le manatu o Konelio e fa’apea, “E le’o toe faigofie lava nei aso.”

“Ua faigata lava nei aso mo le tele o aiga i totonu o Samoa. 

“E leai lava se mea e maua ma se filemu.”

Na ia ta’ua foi, ua tele lava fa’afitauli e mafua mai i tupulaga. 

“Ua faigata lava le olaga o tupulaga i lenei vaitau. Ua tele lava ina fa’aaoga sese le malosi ma fa’atupu fa’alavelave solo ae le o e fai ni feau a aiga. 

 “Tatou vaai ai foi i le to’atele o fanau e va’aia pe le fa’atupu o le vevesi i nofoaga faitele ma a’afia ai nisi o tagata, ae o lea e iai mea e tatau ona fa’aaoga ai le malosi. 

“Ou te talitonu lava a’u ia o le mafuaaga lava o le tula’i mai ai o nei vevesi ona o le saoasaoa tele o lenei talutalu foi i mea tau tekonolosi ma initaneti. 

“Ua a’afia ai mafaufau o le tupulaga ma o’o ai ina tula’i mai ai uiga e le talafeagai. 

 “O le tele o fa’afitauli e tula’i mai e mafua mai i le initaneti ma feau tusitusia. O nisi foi e mafua mai i faiga uo a tama ma teine.” 

Ae peita’i na ta’ua e Konelio, e pule lava le tama a le lo’omatua ia i ana mea e fai. 

“Ia te a’u lava ia, e sili atu lo’u sau e fa’aaoga lelei le taimi e fai ai feau o le aiga ma fesoasoani i mea e fai i totonu o le aiga, e maua ai le filemu ma le manuia. 

“Sa iai le vaitaimi sa ou nofo ai ma le aoga, peita’i e va’ai lava ma le alofa le faigata o le olaga i lenei vaitau, pei o le ala lea na mafua ai loa ona toe manatu ou te alu i le aoga, ina ia maua ai se lumana’i lelei mo au ma lo’u aiga. 

“O lo’o soifua pea matua o nai ou matua, ma o lo’u fa’anaunauta’iga o lo’o iai, ina ia tauia lo latou alolofa mo i matou le fanau ma ia fai sa’u tautua mo le aiga.

“O le taimi la lenei, o lo’o o’u tauaveina le mataupu o le fa’aeletise i le aoga matātā ese’ese i Don Bosco, ma o lo’u tausaga muamua lenei. 

“O le mea moni lava, o si o matou aiga o se aiga lima vaivai ma e ausage fo’i. E ui foi lava ina ou aoga, e fa’aavanoa lava le taimi ou te sau ai i le ma’umaga ma fesoasoani i si o’u tamā i le faiga o mea’ai ma le va’aiga o le ma’umaga.

“E faigata fo’i le aoga, ae o le naunautaiga lava lea e iai ina ia i’u manuia ina ia mafai ona ou taui atu le alofa o nai ou matua.”

© Samoa Observer 2016

Developed by Samoa Observer in Apia