Galue malosi e tautua lona aiga

By Vatapuia Maiava 12 September 2016, 12:00AM

Na uma aoga a Sinapati Le’aupepe i le 18 o ona tausaga ae galue loa o se fai fa’ato’aga aua le tausiaina o ona matua ma le aiga i le afio’aga o Sala’ilua, Falealili.

E le gata i lea, ae na fa’amalosia o ia e tu’u le aoga ona o le va’ai alofa i le leai o se isi e faigaluega ma ono maua mai ai se tupe aua le tausiga o lona aiga.

 “Na ou faia le filifiliga lea, ina ia lava ia lea aoga ina ua ou va’ai atu ua amata ona le a’ua’u le fa’asoa a matua i le tele o taimi, ” Sinapati Le’aupepe.

 “Na ou iloa le taumafai ai o nai matua e tulei la’u aoga, ae ua ou iloa lava e a’u ia o lo’o i ai se isi mea e fa’aaoga lelei ai lo’u malosi fa’atama talavou.

“E moni lava a alu i le aoga…ia e maua le poto ma le atamai, maua galuega lelei, tupe….ia ae le’o a’u lenā, o a’u lava ia, o lo’u agaga ia mafai ona ou fesoasoani i lo’u aiga.

 “Ua atili ona fa’aosofia lo’u alu e fai la’u ma’umaga ona o le telē o lo matou fanua…aua ou te iloa na o le fitu lava masina e tōtō ai la’u ma’umaga, ia la’u mai loa le meamata iinei i le maketi e fa’atau ai.

Na  fa’ailoa e  Sinapati, o lana fa’ato’aga o lo’o tausi ma ola ai lona aiga i le taimi lenei.

 “E to’aiva tagata o si o matou aiga, ia ae leai se isi o faigaluega…o lo’o ola i le taimi lenei i tupe maua mai i le fa’ato’aga.

 “Ia o le galuega lenei,  e sau mai lava i le Aso Gafua e tau i le Aso Sa…o le la’u mai o talo , luau…aua le fa’atauina atu i le mamalu o le atunu’u.

 “O tupe mo le lotu o se tulaga lelei tele, aua tatou te tau fai talitonu uma, o ala nei o fa’amanuiaga mo lo tatou ola – o le tautua ma atia’e le Ekalesia a le Atua.

O lana fautuaga i tupulaga talavou o le atunu’u –‘omai e fa’ataitai ona lafo le vao ma tago i le ‘oso.’

 “Ma’imau le ola ma le malosi alu vale e feofeoa’i ai fua ma fa’atupu vevesi solo ai fua, ae ua le fa’aaoga tatau e tautua ai aiga ma matua.

 “O le tautua ai i aiga ma tausi matua, o se itu e ao ona ave ai le fa’amuamua i taimi uma lava.

O le fa’afitauli o lo’o feagai ma le aiga – o le leai lea o se suāvai.

 “O lo matou nu’u olo’o i ai lava le fa’aletonu tau i le suāvai.

 “O le naunautaiga lava, o se tane vai, sa taumafai lava e tau sefesefe nai tupe ia e le mafai ona maua se tupe ona o le tele o mea fai.

“E sau lava le tupe ua leva ona fa’atalitali atu fa’alavelave ma le mau mea e alu sa’o ai.

By Vatapuia Maiava 12 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>