Ua le faigofie nei aso!

Tusia Vatapuia Maiava ma Ilia L Likou ,

117 Hits

Le tinā i a Mouena Nansen.

Le tinā i a Mouena Nansen.

O le aso ananafi na maua ai e le Fofoga o Samoa le avanoa e fa’atalatalanoa ai le tinā i a Mouena Nansen o le afio’aga o Vaivase-Tai.

O le 56 ai o tausaga o lona soifua, ua le avea lea ma mafua’aga e fa’avaivaia lona ola finafinau e galue pea aua le tausiga o lona aiga.

O lea fa’atalatalanoaga na faia i le Maketi i Fugalei.

“Ua faigatā lava nei aso e pei ona ua feagai ai ma i matou o le ‘au fai maketi i’inei , ma ua le tutusa tupe maua e pei ona i ai tausaga ua te’a,” Mouena Nansen.

“Ia o le mea lea ua i ai, ua soli le Aso Pa’ia a le Ali’i ona o le manatu lava i  le tausiga o aiga, e mo’i lava i aso o le vaiaso, ae pei lava o le Aso Sa e tau feololo ai nai fa’atau.

“O lenei vaiaso na maua tupe, ia na taumafai lava e fa’asoasoa ina ia mafai ona fa’amalieina nisi o vaega aua le aiga.

 “O lenei vaiaso, na paū lava le tupe maua , ona ua tau leai  ni tagata fa’atau, ia ma e le taitai ona lava le fa’asoa mo le aiga.

 “O le taimi lenei, ia o lo’o i ai le matuatausi a le aiga nei, ma e le gata i lea ae o le fanau i aoga…ou te ta’utino lava o le tupe o lo’o maua e matua’i le mafai ona feauauta’i ai le fa’asoa.

 “E pei o le mafua’aga lava ou te mana’o ai lava ina ia galue pea…e mo lo’u aiga ina ia aua ne’i ola falōlō.

 “E i ai lava nai fa’alavelave, ia ae ou te laki a’u ia aua e leai ni mea fai o le lotu o lo’o auai ai, o le Lotu Mamona lea.

 “Aua na’o o le sefulua’i lava.

O le fa’afitauli o lo’o ia maitauina pea – O le taugatā o le soifuaga o lo’o ua i ai nei.

 “O le tau o mea’ai lea ua i ai, ia ua matua’i  alu i lugā, aua o le itu mautinoa e le mafai ona tatou ola e aunoa ma se mea’ai, e i ai lava nai faleoloa o lo’o tau paū ae o isi lava e fa’a-taugatā.

O lana talosaga i le malo, ‘Fa’amolemole se’i toe silasila ane i le tau o le tele o oloa, ua maualuga lava!

© Samoa Observer 2016

Developed by Samoa Observer in Apia