E afua mai mauga le manuia o le nu’u – Moananu
O lea le talitonuga maumautūtū o se tasi o tamā matua o le afio’aga o Mulifanua, Moananu Fano Paniani, ua 79 nei le matua o lona soifua i le fa’atalatalanoaga ma le Fofoga o Samoa.
“O le ala lea o lo’o manuia ai lava si o matou nu’u nei, leai se mea e gasē.” Moananu Fano Paniani.
“E pei ona outou silafia ai, ia o lo’o galulue vaega uma i totonu o le afio’aga mo le manuia lautele o ona tagatanu’u uma.
“O se tasi o pine fa’amau o la’u fa’amatalaga, o le vaiaso na te’a nei na tufatufa ai e le Komiti a Tinā tanevai e 41 mo lo matou afioaga nei, ma o ni fa’amanuiaga fo’i lē ‘au maua mo si o matou nu’u.
“O i’inei e le tau fa’amatalatalaina fa’amanuiaga ma le filemu o mea uma, aua e mamalu faiganu’u, o vaega’ese’ese e galulue mo le lelei lautele o tagata uma.
“E leai lava ni fa’afitauli o feagai ma matou i tua nei, e i ai lava mataupu masani, ia o na mea uma e talanoaina …ia e mo le lelei aga’i luma o le afio’aga.
Na ia fa’ailoa i le Fofoga o Samoa, o le tufatufaina ai e le Komiti o le afio’aga o tanevai o se fa’afetai sili lea.
“Ia ua outou silasila atu i ai i tanevai e pei ona ua fa’asafua nei mo le to’atele o aiga o si o matou nei nu’u, o tinā lava.
“ Oka! Oka, se matagofie o lenei fa’amoemoe.
“O le fa’ailoga o le manuia o se nu’u, e fiafia tagata uma.
“O le itu fa’afiafiaina o le ave ai lea o le fa’amuamua mo tinā ma tamā matutua o le afio’aga.
“Ia, o lea fo’i ua laki atu ai ma lo’u tamā, ma e le na’o a’u o lo’o manuia ai ma lo’u aiga atoa.
O lona talitonuga, “O le olaga lava ia i Samoa ia e tau le mana’omia fua ni tupe.
“O le uiga o la’u fa’amatalaga o lo’o mafai ona ou ola ma ou soifua i le si’osi’omaga o lo’o tatou i ai.
“O lo’o tatou molimauina le fuata ulu i taimi uma, o talo, fa’i ma nisi o vaega o lo’o maua fua mai le lau’ele’ele e aunoa ma se tupe e fa’aalu ai.
“Afai fo’i ae le lava le fa’asoa ia ua ‘aisi atu i tamaiti o lo’o i fafo, aua o le tele o taimi e mana’omia ai le tupe pe a fai mea fa’alelotu, fa’alavelave, fa’alenu’u ma isi vaega e pei ona o tatou i ai i lenei vaitau.
“E pei o le tupe lava mea uma.