‘Ou te le’i pepelo’

Tusia Lanuola Tusani Tupufia ma Fa’aliliu e Maiava ,

175 Hits

TU’UA’IA: Le Tagaloa Pita

TU’UA’IA: Le Tagaloa Pita

Na matuā te’ena e lē sa avea muamua ma Minisita o le Kapeneta, o Le Tagaloa Pita, lona faia o se ta’utinoga lē-moni i le taimi o Faiga Palota Lautele a le atunu’u. 

“Lea ua molia a’u ona fai mai ua ‘ou saini pepelo ma faia se ta’utinoga le-moni,” o le saunoaga lea a Le Tagaloa ananafi. “A’o lea lava ‘ou te fai atu, ‘ou te le’i tala-pelo, na ‘ou sainia lava le ta’utinoga lea ma lo’u talitonuga atoatoa, o le tautua, o le monotaga lava lena sa ‘ou fai.”

O le ta’utinoga o lo’o finau ai, o mana’oga ia o le Tulafono o Faiga Palota, lea e mo’omia ai Le Tagaloa ina ia faia sana monotaga i lona nu’u o Sili. 

O lo’o tu’ua’ia Le Tagaloa ona o le faia o se ta’utinoga le-moni e tusa ai o Faiga Palota, lea lava na i’u ina fa’aleaogaina ai le avea o ia o se sui-tauva. 

Ina ua tula’i i le Fa’amasinoga Fa’aItumalo ananafi,  na saunoa Le Tagaloa, e tautau lava mo lona nu’u i tausaga uma i so’o se ‘auala. Na ta’ua, o lona fa’auigaina o le monotaga, o le vaega o le ‘au’aunaga ma le tautua mo le nu’u.

“O le tautua, e tele atu i lo le monotaga,” o lana fa’amalamalamaga lea.

“Mai lava i le taimi na ‘ou mata’i ai (i le Suafa Le Tagaloa), sa fai lava la’u tautua masani e le i lalo ifo o le $50,000.00.

“I le Fa’amasinoga i le aso, o lea ua molia a’u fa’apea ua ‘ou tala-pepelo i le sainia ma le faia o se ta’utinoga le-moni, ae ‘ou te fai atu ia te ‘Oe, ‘ou te le’i tala-pelo. Na ‘ou sainia lava le ta’utinoga lea ma le malamalama’aga, o le tautua, o le monotaga lava lea sa ‘ou fai.” 

Na toe fa’aopoopo atu Le Tagaloa, e le fa’atagaina e lona nu’u ona faia o sana monotaga ma fa’ailoa atu fo’i, e leai se taimi e le’i tautua ai mo lona nu’u e tusa o tu ma aga masani fa’aleAganu’u.

“Ua outou saunoa mai, o le ‘ese’esega o le tautua mo sui-fa’atutu mo itumalo tu-taulaga, e tatau ona tautua (i le nu’u po’o le ekalesia) mo le tolu masina. A o le a le uiga o lea mea mo le tautua a le matai i tua i afio’aga ma alalafaga?” o lana fesili lea sa fia malamalama ai.

“O suiga o le Tulafono mo Faiga Palota, o lona uiga, o tagata e pei o le Ao o le Malo ma a’u nei, o le a le-mafai lava ona tauva i faiga-palota, lea ‘ou te talitonu, o le agaga lena o le suiga ua faia e Sui o le Palemene.”  

O le loia o Sarona Ponifasio, o lo’o tula’i mo Le Tagaloa, ua 78 tausaga o lona soifua.

O le Sui-Komesina o Faiga Palota, o Faimalomatumua Mathew Lemisio, le loia mo le Ofisa. O le Afioga a Vaepule Vaemoa Va’ai o le Fa’amasinoga Fa’aItumalo o lo’o fa’atautaia lea mata’upu. 

O le isi matai mai Sili sa molimau i le fa’amasinoga ananafi, o Mata’utia Iefata.

Na fa’ailoa e Mata’u, o le tu lea ma aga a lona nu’u, latou te le-mo’omia lava le faia o se monotaga a Le Tagaloa.

Peita’i na ta’ua, afai e tu’uina atu e Le Tagaloa se seleni po’o se isi lava mea e avea ma ona sao mo le nu’u, latou te le-ta’ua lea mea o se monotaga.

E fa’aigoa le mea lea, o se fesoasoani.

 “E ‘ese’ese lava fa’auigana o le monotaga lea, ae ia te a’u lava ia, o se fesoasoani, o se sao mo mea-fai a le nu’u, ae le fa’amalosia,” o lana fa’aaliga lea.

“A leai lava se sao, e le afaina ma e le fa’asala ai fo’i ona o le leai o se fesoasoani. Ae le -mafai lava e le matou nu’u ona fa’apea atu i papa e fai sana monotaga.

Matou te tautua iai. Ae le taofia ai Lana Afioga, pe a fia tu’uina atu o  sana fesoasoani e pei ona masani ai. Ae le-faia sana monotaga, a ‘aumai, o se meaalofa po’o se fesoasoani.” 

O le Aso Faraile ua tolopo iai e le Afioga a le Fa’amasino, le lauina o le fa’ai’uga o lea mata’upu.

© Samoa Observer 2016

Developed by Samoa Observer in Apia