Manatu o le Fa’atonu - O se Tala uiga ese o le tulaga faamanuiaina

Tusia Mata'afa Keni Lesa ma Faaliliu e Seagaitumua Tupuola ,

106 Hits

O tala o le faamanuiaina e afua mai le Aiga-e suamalie i taimi uma i le faitau.

E mafua ona o se ituaiga lea o mea e una’ia ai, faa-loto-tele ai ma e mafua ai ona talitonu se tasi e faapea-e leai se mea e faigata.

O le uiga o le faamanuiaina i se tasi itu-e eseese mai le tagata i le tagata. Ma i le tele lava o taimi, o se upu lea e mana’omia le olaga atoa e ‘ausia ai. O le pogai lea e masani ai ona faasino i e o tutupu a’e ma tagata matutua. 

Ae peitai-e tusa ai ma le mea ua tatou vaaia e uiga ia Samoa talu ai nei, e le faapea e tatau ona avea oe ma tagata ua matua ina ia faamanuiaina ai.

O se faata’ita’iga tu-matila o le tala a Lupeoaunu’u Vaai lea sa faaalia i le itulau i luma o la outou nusipepa i le Aso Faraile talu ai. O lea tama’itai e aunoa ma se masalo o se faata’ita’iga faatupu manatu lea.

I lenei matua ma’ale’ale e 12 tausaga, o lenei teineitiiti talavou ua fuafua mo mea tetele o le a o’o mai. O se ituaiga lea o tala o le manuia e tatau ona una’ia ma lu’itauina ai. 

O Lupe o se teineititi talavou faigofie e a’oga i le St.Mary’s Primaru School. O ana mataupu e sili ona fiafia i ai ua manino mai o le Matematika, Gagana Peretania, Social Studies ma le Basic Science.

E tusa ai ma mea ua faailoa mai ia i matou, e fiafia i le aoaoina tau le siosiomaga ma ua na faavaeina se vaega tau le siosiomaga i totonu o lana a’oga. O se mea uiga ese lenei. 

I se taimi a’o tauivi lo tatou atunuu ma le anoano o lu’itau e aofia ai tamaiti laiti, o Lupe o se sulu lea o le faamoemoe. O ia lea o le tino vaaia o se ituaiga e sili ona manaomia o tamaitai Samoa e tutupu a’e ma se faamoemoe ma se taunuuga.

O lona uiga e faapea e le tatau i tamaiti Samoa ona tilotilo mamao mo ni tagata e avea ma faata’ita’iga. E to’atele i latou o loo iinei, ma teleni na totō mai totonu o aiga ia o loo i ai le malosi e fai ai mea sili e una’ia ai suiga i atiina a’e a le lalolagi.

I se taimi e le’i mamao tele atu, na tatou vaaia ai foi tala e faasino i lea lava tulaga faamanuiaina e pei o Briana Fruean, Dr. Erna Takazawa ma isi lava tamaiti. Masalo –ona pau lava le fesili e faapea-o fea o i ai tama?

I le taimi nei la mo i latou e le o silafia, na manumalo Lupe i le faailoga o le Pine Auro mo lana tala “O le Leo o se Motu’ i totonu o le Tauvaga o Tusiga-Tala a Tamaiti i le tausaga talu ai, o le “Leo o Tamaiti o Tupulaga o le Lumana’i.

O loo i Lonetona le Tamaitai mo le faalauiloaina o lana tusi. Ioe, a mafaufau i ai, o se tusitala talavou mai Samoa o loo faalauiloa lana tusi i totonu o Lonetona?  Sole-o le mea lea tau faalepo poo miti, a ‘ea?. Ae peitai-e le ona pau ai lena. Ua manino mai le naunau o Lupe e vaevae lana tusi i ni vaega ina ia mafai ai ona tusia se tala i tausaga uma lava se’ia aulia le 2020.

Ae o le a sona lagona i lea tulaga? “Ua ‘ou matua fiafia lava,” o lana faaaliga lea. “Sa leai so’u manatu o le a tupu se mea fapenei ia te a’u.”

O Lupe i se tasi itu o le 11 o ona ausaga na ulufale ai i le tauvaga o le 2015. O lea tulaga ua una’ia ai lona tulaga faamanuiaina ma ua sili atu ati ona faaosofia.

“Na matua faate’ia atu ina ua ‘ou iloa ua ‘ou manumalo i se pine auro mo la’u tusi, o lana faaaliga lea. “Na ‘ou tusi lenei tala e tusa ai ma lo’u lagona, mafaufau male faalogo mai tala mai le tina o lo’u tina, sa faigofie mo a’u ona tusi e peiseai e au mai lo’u loto.

Ou te faamoemoe o le a fiafia i ai tagata ma e mafai ona aoaoina ai matou  mai lea tulaga ma fesoasoani e faasaoina la tatou Saoa ma lo tatou paneta.”Ae mo le malaga i Lonetona’ ua matua fiafia lava o ia.

“Ua ‘ou matua fiafia lava ma popole i lenei mea, o lo’u taimi muamua lenei ua ‘ou malaga ai mo se taimi um ii luga o se vaalele, ma le alu i Lonetona,” o lana faaaliga lea. 

“Ou te faamoemoe o le a matou faa-uo ai ma tamaiti mai nofoaga eseese ma atunuu ma a’oa’o faafitauli eseese o feagai ma tamaiti o la’u tupulaga-ma ala latou te manatu e mafai ona matou toe faaleleia ai, atonu o se mea foi lea e mafai ona matou faia.”

E pei o le mea suamalie i luga o le keke, talu ai o tusi o le Leo o se Motu e aafia ai le suiga o le tau, puipuia o le siosiomaga ma le a’oga, o le a lauga foi Lupe se faapotopotoga faava-o-malo i le faagasologa  o lea taualumaga tau le ‘ausia o Sini Tau le Suiga o le Tau, Laufanua, Malosi ma le Faatinoina i totonu o Lonetona.

Tamaitai e ma alii, afai e le lava lena e una’ia ai o tatou tupulaga talavou ina ia faatūtū le vaai i le vanimonimo e tusa ai ma latou miti, Ou te le iloa la pe o le a le mea o le a una’ia ai.

O Lupe o se tamaitai talavou uiga ese lea. Ae o lana tala o se matua tala Samoa moni lava. Na tupu a’e i luga o nei laufanua, a’oga ia tatou a’oga ae o lenei ua na una’ia faaiuga a le lalolagi ona ua tuuina atu i ai lona leo.

I se matua  o le ‘alu’alutoto.

O se mea lenei e matua una’ia ai. O se tala  faafiafia-loto o le manuia lea e tatau ona faasoa. E le tagata i lea, o lea faatoa tau amata le tamaitai. E anoano isi mea o le a o’o mai-o le mea lea-ia mata’itu lenei avanoa. 

I le taimi nei, malo lava fai o le faiva Lupe e ui ina e la’ititi. Ua e faa-mimita i matou uma lava. E momoli atu foi la matou faamalo i ou matua, aiga, a’oga, i latou na lagolagoina oe ma isi lava tagata uma sa faatino le latou pitolaau ina ia ‘taunuu lana miti.

Ia outou maua se Aso Lua uiga ese Samoa ma ia faamanuia atu le Atua!

© Samoa Observer 2016

Developed by Samoa Observer in Apia