“O LE FAAVAE MAU”

By Petaia Setu 12 June 2016, 12:00AM

O fea o taoto ai le moni? Se a se faamaoni o iai? E mafai ona fesiitai le faavae? Se ā foi le uiga e toe Iloilo ma saga teuteu ai pea le faavae? Fai mai le isi mau, E fesuia’i faiga ae tumau lava faavae.

A o le manatu o Paulo o lo tau faapupula ia Timoteo, E le mafai ona taofia le folafolaga a le Atua i se le talitonu o nisi. E le vaoia le moni o le Atua i ni manatu faaletonu poo ni faiga fesuia’i! O le faavae  mau a le Atua e tu lava lea. 

O le faavae tumau, o le faavae ua mauaa; ua mausalī. E faavavau; e faavavau lava, Amene. 

O le faavae a le Atua o loo tautala iai le aposetolo, o le Ekalesia lea. O le faalapotopotoga na amata e le Atua. Na ia faavaeina. O loo iai ni faailoga i lea faavae. O se maka (seal) lava sa faailoa ai le uiga poo le faamoemoe o le faalapotopotoga. Ia poo se faailoga foi sa faalauiloa ai lē e faapogai ai le ekalesia. O upu ia e faamatala ai faailoga :

I ) Ua silafia e le Alii ona lava tagata

Sa tala faanoanoa se tasi tamā ona ua leai se povi e tasi o lana fagaga tele sa iai, ua o uma i tua ina ua malepe le uaea. Taimi nei ua fai lafu povi uma aiga o le nuu. Fai mai si toeaina, “O fagaga uma nei, e tasi lava la’u vaai o’u iloa uma a’u povi” E iloa lelei e le toeaina nei a na manu uma. Ioe, e le tauilo tagata o le Atua. O loo silafia lelei e le Atua lana ekalesia. A ‘ua iai fefinaua’iga ma ua faasesēina atu ai isi ua liua lo latou faatuatua i le aati o upu a Umenio ma Fileto (f.17).

O loo finau i la’ua nei e leai se toe tu mai i tala atu o le oti. Ua uma ona tupu. E alia’e i le taimi o le papatisoga poo le vaitaimi foi o laiti le fanau. O le faatoeaina a Paulo ia Timoteo, ia le finau outou i na upu e leai se aoga. Auā e au ina faasesēina atu ai ma e o faalogologo iai. A o le Atua , ua leai lava se mea e tasi e lilo pe natia i luma o ona fofoga. E oo lava i o outou lauulu e manino lava i lana silafaga ati (Mataio 10:30). Na te silafia loto uma lava ma manatunatuga o tagata, o upu foi, i le ma galuega uma lava.

O loo ua toe faamanatu mai i lea faailoga o le faavae ona po a o iai le nuu o le Atua i le vao. Na tutū faatasi ai nisi o le nuu e ‘au ma Koru e tetee mai ia Mose ma Arona. Ona faapea atu lea o Mose ia te i latou, “O ā taeao, e faailoa mai ai e Ieova poo ai ona tagata” (Numera 16:5). O loo faamanino lelei mai e Iesu lea mau a le Feagaiga Tuai i le Mataio 7:22, “E toatele latou te fai mai ia te a’u i lea aso, “Le Alii e, Le Alii e, matou te le i perofeta ane ea i lou igoa, o lou igoa foi na matou tulia ai temoni, o lou igoa foi na matou fai ai vavega e tele? “.

Ona ou ta’utino atu ai lea ia te i latou, “Ou te le iloa lava outou; inā ō ese ia outou ia te a’u, o outou o ē fai amio leaga”. Samoa, o tagata o le Alii, e fau ai le faavae a le Alii i le lalolagi nei. E le matagofie lou lotu, lotu, lotu, ae emo ane e le filifilia oe e le Alii e fai ma vaega o lana faavae mau, a ea? O le a se uiga o le soona masau solo i le vaaiga o mata ae faafetoai mai e Iesu i lana faamasinoga, “Ou te le i iloa lava oe!”. Oka! gau akoa! Fai mai Iesu, “Ua ou iloa i latou ua ou filifilia” (Ioane 13:18).

“Ua ou iloa a’u mamoe” (Ioane 10:14) Ia manatua Samoa, e kerisiano tatou uma, ae le ‘ānoa tatou uma. O le ekalesia tatou uma, ae le filifilia tatou uma. Auā foi ua silafia e le Alii ona lava tagata. (Mataio 22:14) 

II ) Ia o ese I le amio leaga I latou uma o ē ta’uta’u le suafa o Keriso

 O le vaega lea na te faamatala nafa tausi o le faavae. Manatua le fouvalega a Koru ma nisi o le nuu lea sa mua’i ta’ua i luga. O Mose sa faatonuina le faapotopotoga, “Ia outou ō ese mai fale ie o iai tagata amio leaga, ‘aua foi ne’i papa’i  atu i sina a latou mea, ina ne’i fano outou i a latou agasala uma” ( Numera 16:26). O lea foi fuaitau a le Feagaiga Tuai, o loo manino lelei i upu a Iesu o i le Luka 13:27, na ia faapea atu ai i le toatele o le ‘au ola faafoliga,

“Inā ō ese ia outou ia te a’u, o outou uma o ē fai amio leaga” O lona uiga, e le faatagā fili pe soona ilo faaasoloatoa maa o le faavae. E le fetaui iai ni maa māmā. E le aoga foi ituaiga foi ia e ‘ō’ō totonu. E le manomia se maa ‘ele. O maa uma faapena e faigofie ona nuti ma oia ai le fale (f.14,18). E manomia ni maa ua faaōlioli; maa malolosi etali atu i le malosi faalenatura. Maa ua tapenaina ma ua lava saunia. E le afaina pe laitiiti, a ia ola; e moni lona maa.

Ioe, o se maa ola (I Peteru 2:5). Le atunuu e, o le ata atoa lena o Keriso ua fau e le aposetolo i le ola galue o Timoteo. Sa muā;au. Sa malo i tau. O le Ta’ita’i. A o ia foi o le Faata’ita’i, i faiva o le faifeau ua faata’i. 

Le au uso e, ‘aua tou te fematea’i. ‘Aua foi le fai finauga i upu e leai se aoga. Ia to’a le tōfā; ia mamao le faautaga. O upu ua outou masani ai, ‘E ‘ō’ō le vao’. ‘E mau foi lē faalele, ese lē maitau. I le manatu o le tupu o Tavita, e tasi lava le faailoga e iloa ai le “toa”.

‘Na o le tagata na te iloa pulea lona loto’. O le galuega mae’ae’a a lenei toeaina i le faifeau talavou, o se sulu faasino ala foi lea mo tatou. O nei faailoga e lua ua faamatala ai e Paulo le faavae, ua alia’e ai ni vaaiga maumautu se lua e uiga i le Ekalesia. 

O le vaaiga muamua, o le ekalesia o loo aofia ai i latou ua i le Atua. O ē ua tuuina atu e i latou i latou lava i le Atua. Ua le toe pule i latou ia i latou; ua le o ni totino foi o le lalolagi, ae ua pule ai le Atua. Ua topano lo latou ola i le Atua, o totino a le Atua. O le faavae mau a le Atua, e tu lava. 

Vaaiga lona lua, o le ekalesia o loo aofia ai tagata uma ua liliu ese mai le agasala. O ō latou foliga ua faasagasaga i le amiotonu. E iai taimi e pa’ū ai, ma faapei ai ua mamao ese se mea o taula’i iai le faamoemoe, peitai o loo sa’o pea le taula’iga o le vaai. E foliga mai ua le o atoatoa i se mea e tasi le tino, ma le mafaufau ma le agaga. Manatua, e tele maa faapea i soo se fale e pei ona tã’ua ituaiga maa eseese ia mataala iai. 

Toe faalogo ia Paulo. Soo se tagata ua tā’ua o le kerisiano, po o oe ua filifilia i le ekalesia a Keriso – Ō ‘ese i le amio leaga. Ne i e manatu o le pa’epa’emā ma le iila o ou laei ma au teuga i le lotu e te sao ese ai mai le vaega lea. E le o le mălõ o le fusiua ma le malualii i le peleue, leai. E le o le tino, upu ma foliga. O le Atua iā Samuelu, “‘Aua e te vaai i le tino” (1 Samuelu 16:7). O Ie’u iã Ionatapa, “Po ua tonu mai ea lou loto.....? (II Tupu 10:15). Ioe, o le loto ua iai le faamaoni ma le alofa atu i le Atua – o lenã! E filifili lenã e le Atua. O le maa tu lena. O le faavae mau lena e manaomia e le Atua e pei o la Paulo ia Timoteo – Faamŭmū. 

Amene  

E-mail: [email protected]

Phone – (0685) 25125

Mobile – (0685) 7737063

By Petaia Setu 12 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>