Tusi i le Faatonu

12 June 2016, 12:00AM

E muamua ona ou tapui le tapu a Tupō le Aloali’i ma ou faatulou atu aua e faigata oe Samoa o le Ao Mamala. 

Tulouna Paia fa’ale-Malo, tulouna Paia fa’ale-aganu’u -tulouna fo’i paia fa’a-le-Talalelei, tulouna - tulouna lava. 

Ae ua laga so’u leo, i le ava tele ma le fa’aaloalo lava, i le faamanatuina o le 54 Tausaga -talu ona Tuto’atasi si o tatou atunuu o Samoa. Sa ou matamata ai i le T.V. i le faafiafiaga a le Autalavou EFKS a le afioaga o Faatoia i le Vaimauga. Sa latou faamatalaina  i le latou faafiafiaga, pese poo le siva faaleaganu’u, le Toga po’o le ‘Ie Toga, ua faaigoaina o le  “ Pipi’i ma le Eleele”. 

Ou te talitonu e ui ina mau eseese le atunuu i le ulua’i Ie Toga po’o le Toga, measina, i Samoa, ma isi ona igoa - Suafa ua faaigoa ai, ae o le ulua’i igoa po’o le Suafa o lo’o i luga, ou te ta’u atu. O la’u mea totino lava lena, o la’u tala i le Vavau lena, o lo’o i lo matou nu’u. O lo’u faasinomaga, o lo’u fatu. O la’u measina ou te me’eme’e ma ou nene’e ai- ia Samoa ma le lalolagi atoa, ou te talitonu ua silafia uma e Samoa, ma le lalolagi atoa. 

O le a ou le faamatalaina atu lona talaaga atoa, ae ua na’o nisi mau po’o pine fo’i, e faamaonia ai- aua le faafofoga a Samoa, ma lau autalavou. Mau po’o pine o le fanua po’o le vaega eleele o le matou aiga, o lo’o iai pea le tulaga o lo matou aiga, faapea foi lo matou nu’u, o i totonu lava sa lalaga ai le Pipi’i ma le eleele. O le fale e le moea le ogamanava po’o itu, ae na’o tala-ma  e iai le mafuaaga ma lona faamatalaina. 

O le Ie Toga lea, e iai lona igoa muamua sa igoa ai -ae le’i maua lona igoa lona lua, Pipi’i ma le eleele- ou te le ta’u atua, seia vagana ai i si pine po’o mau e faamaonia ai. 

Aua ua lauiloa le au kirikiti a le matou nu’u. O le Matagilemoe mai Sauano i Fagaloa. Tasi lena pine e o’o mai i le aso- o lo’o iai pea le fanua lena i leisi o’u gafa maualuga Aiga, ae o lenei fo’i fanua o lo matou aiga, na maua foi lona igoa o le “Pipi’i ma le eleele lava, o Fusi-i leā, e o’o mai i le asō o lo’o iai pea le fanua lena i lo matou aiga. 

O lo’o iai fo’i ma isi mau, e faamaonia ai, ou te le ta’u atua fo’i vagana ua lagalaga ni manatu. Ae maise ai o le Toga lava lea na maua ai ma le igoa Suafa o lo matou nu’u i Sauano. E iai lona faamatalaga, ma nisi muagagana faa-samoa, sa maua uma lava ona o le Pipi’i ma le eleele” i fanua po’o eleele o aiga o lo matou nu’u e o’o mai i aso nei. 

Ma o le tele o pine po’o faamaoniga e mai le Pipi’i ma le eleele. O lo’o i totonu uma o lo matou nu’u, aemaise ai fo’i nisi Suafa Matai Tāua. O tulaga maota ma laoa, o lo’o iai i lo matou nu’u e o’o mai i le aso o lo’o iai pea, o lo’o iai lona faamatalaina. A e fia talitonu, susū mai, afio mai, e te talitonu ai. Le pipi’i ma le eleele, matu mai vai moe i le fuefue, tasi ae Afe (miliona).

O le tala i le Vavau lena a lo matou nu’u, afioaga o Sauago i Fagaloa po’o Anoama’a i Sasa’e foi mai anamuā anamuā lava, ou te le fefe e ta’u atu. 

O lo’o iai pea ona pine e o’o mai i aso nei, silasila i la’u Toga lena, “Pipi’i ma le Eleele”. O lo’o i o’u faalupega i le tusi faalupega a Samoa lomiga lona lua. O lea ua ou tusi atu ai ma lo’u alofa tele i le Autalavou EFKS a Faatoia, fatu pe tusi sau pese po’o sau siva, i sou lava tala faasolopito, po’o sau ā mea totino. Po’o se tala foi o le Vavau o lo’o i lo outou nu’u, e te mimita ai ma su’e ai au tupe, ae aua, aua lava e te lotea fua au mea totino, mea sina. Ua e silafia ma malamalama i le iuga o le tagata, lima tago vale, pe mana’ona’o fua i mea a isi, aemaise ai fo’i o lou aafia ai i le tulafono. 

Ae afai fo’i o lo’o iai lea tala i lo outou afioaga, ou te fia malamalama ai fo’i la, ae o lena ua ou faamalamalamaina atu a’u ia, ae le’o le tala atoa. Afai e te fia talanoa ia te a’u ta talanoa, tusi mai. 

Faia ma le ava tele ma lo’u faaaloalo. 

Afai ua sala le gagana, pe pao papa se leo i lau faafofogaaga Samoa. Faapea fo’i le Autalavou EFKS a le Afioaga o Faatoia, malu ave i fale i la outou Tofa Faatamali’i. 

Sainia A’oa’o Fesoasoani EFKS Tiavatia Konelio Fauo’o Tielu

Sauano Fagaloa po’o Anoama’a i Sasa’e

12 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>