O LA’U TALA FO’I

162 Hits

1. Matauina i Tala Fou fai mai ua teena e le Palemia tuuaiga-ae faasaga mai sasa nusipepa! O lea la ulutala e faasino i se tala na lomia i le Nusipepa e faapea na le malilie le Aufaafiafia mai Leona Amerika Samoa ina ua taofia e le Palemia le latou faafiafiaga i le sauniga faamanatu talu ai nei o le Malo Tuto’atasi o Samoa.

O le mau la a Tuilaepa-fai mai o le nusipepa na nofo ma fai lenei tala ina ia taulia ai le latou nusipepa. O le mau la a le Palemia fai mai o ia lipoti a le nusipepa e sese! Fai mai la le Palemia-sa la feiloa’i ma Fa’iivae ma na faatoese ane ia te ia ona ua fai sina umi o le latou faafiafiaga. Ona fai mai lea o le Palemia-ia manatua lelei-e tutusa lelei lava nusipepa i Samoa nei ma nusipepa a Tutuila-“e fiaola uma lava…!

O latou ia o loo faatupuina le vevesi. Ia afai la o le Komiti o le Tuto’atasi na o’o atu ia i latou ina ua latou taunuu mai i Samoa nei-‘e tatai ona fai se latou faafiafiaga….’! O le mea sili la-o lea ua iloa na valaaulia Leone e le Komiti o le Tuatoatasi e faafiafia i le faagasologa o le faamanatuina o le Tutoatasi talu ai nei!

Ae o le faapea mai la o le Palemia o nusipea ia o loo faatupuina le vevesi ina ia taulia ai le latou nusipepa-ona o le fia ola-O le fesili-‘e mafai e le Palemia ona ta’u mai se aso lava e tasi- na o atu ai le Samoa Observer ia te ia ona o le fiaola?

Afai la e leai se aso faapea-o lona uiga-e ala ona le fiafia ona o le faailoa e le Samoa Observer o mea uma-mea lelei ma mea leaga-e tusa ai ma le aia tatau a tagatanuu uma ona Samoa-e tatau ai ona latou iloa mea o loo tutupu i totonu o le atunuu! Aisea? Aua afai o ni mea leaga e pei o faiga pi’opi’o a le faigamalo-ia manatua la-“o tagata lautele o le atunuu e sili ona afaina ai! O le a sou taofi? 

2. Matauina foi i Tala Fou se fono a tagata lautele ma le aufaipisini e fuafua mo le taofia o le faafaigaluegaina o tamaiti! E le taumate la-o se taumafaiga lea e taofi tamaiti mai le faatauina atu o oloa i luga o alatetele i le ao ma le po-ae le o i a’oga.

O le fesili la-afai la ua fai e nei tamaiti lenei galuega ae le o i a’oga-ona o le matitiva ma le le tagolima o latou aiga-faamata la e le o se mea tonu ma sa’o mo le Malo e tatau ona fai-o le tuuina atu lea o se fesoasoani mo ia tagata?

Atonu e tatau ona o le fanau i a’oga-ae o le fesili-o a mea a le fanau o le ‘ai pe afai e matitiva o latou aiga? Fea o i ai le anoano o tupe a le atunuu sa soona faamaumau nei -e ala i faiga pi’opi’o a le faigamalo? Faamata e o nei tamaiti e faatau atu nei oloa-pe ana fesoasoani i ai le Malo?

O fea le anoano o tupe a tagata faigaluega o loo tipi mai o latou totogi mo Taui o Faalavelave Faafuase’i-ae litaea lava ona alu lea ae tuu ai le anoano o tupe o lona afu na tipi ae leai se faalavelave faafuase’i na aafia ai? Aisea lava ua le avane ai na tupe e amata ai se fesoasoani mo aiga o nai tamaitai matitiva ia e feoa’i solo e faatau atu oloa i le ao ma le po i luga o ala tetele ae le o i a’oga? O le a sou taofi?

3. Matauina i Tala Fou se ulutala fai mai-“Ua manumalo Apia i se mea e tasi mai Suva”-ma o lea ulutala e faasino i le siitia mai i Apia o le Ofisa o le “Pacific Immigration Director’s  Conference (P.I.D.C.) lea sa i Suva i Fiti-ma o le a se’e atu i le Fogafale 5 o le Maota o le Malo.

O lea la tulaga fai mai ua aloa’ia ai le maliega mo lea Ofisa. O le Palemia o Tuilaepa ma sui auai o le PIDC o Vaosa Epa ma Damien Jacklick. Fai mai la o le tele o amioga solitulafono-o lea ua manaomia ai e pulega tau femalagaiga ni pulega lelei!

Ia –afai la o le fia maua o se lavea’i ona o faiga solitulafono-o le upu moni-“O le a Tautala lava Aso”-aua afai o lea e sasao le afi o faiga pi’opi’o i totonu o Samoa ae toe aumai i ai ma mea tau femalagaiga a le Pasefika-ia manatua la-o lea foi sa lapelapea Samoa i le faatauina atu o ana sitiseni ma tusi folau i tagata mai fafo!

O le a sou taofi?

© Samoa Observer 2016

Developed by Samoa Observer in Apia