UA ‘AI ULU TUANA’I TAISI-TRANSLATED-“INGRATITUDE IS THE WORLD’S REWARD.”

517 Hits

Tatou te faafetaia pea le alofa ma le agalelei o le Atua-ua tatou aulia manuia mai ai lenei Aso Sa i le manuia.

E ui foi ina sa feagai nisi o i tatou ona o ni mala ma puapuga-aemaise ai o le maliu ma le oti-ae talitonu le faamoemoe- e ui ina tiga ma matuitui pe a manatu i le mafutaga ma matua pele, uso ma tuafafine aemaise ai o le fanau, ae talitonu atoatoa le Tusitala-o nisi ia o mea moni o le soifuaga nei e tusa ai ma fuafuaga a le Silsili Ese-e tofotofoina ai lo tatou faatuatua-talu ai o le tele o tatou tiga ma puapuaga-e atili ai ona atoatoa ma lava  lona mana e faamafanafanaina ai i tatou uma!

Ia malo lava le soifua Samoa! Ae alo maia- o le tatou talanoaga masani foi lenei ma le aufaitau o lenei nusipepa, aemaise ai o le mamalu o le atunuu-o loo fiafia pea e faitau i lenei tusitusiga. Ae ui o lea- a’o lei amataina la tatou talanoaga- e ao lava ina faamanatu atu pea i le atunuu ma le mamalu o le aufaitau o lenei nusipepa-o lenei tusitusiga-e le o se tala fatu fua-e le o se tuuaiga foi pe o se faaleaga i se tasi;  e le o se faaoloataua foi-ae o le fia faalia lava o mea o loo tutupu i totonu o lo tatou atunuu ma le pogai ua mafua ai-i se isi ituaiga o le tusiga o tala-e faaaoga i ai muagagana a lo tatou atunuu- ina ia faigofie ai ona malamalama gofie i la outou faitau! Aisea la e mafua ai ona faailoa atu nei mea?

O le tali- o latou aia tatau lea i le avea ma tagatanuu o Samoa- e tou te silafia ai mea o loo tutupu i totonu o lo outou atunuu-ona faailoa mai lea o outou finagalo-pe o le a se faiga e mafai ai ona tatou fo’ia ai faatasi ia mea leaga uma ua tutupu ma o loo tutupu mai pea i totonu o lo tatou atunuu!

Ia-o lena ua faaalia i luga le ulutala o le tatou talanoaga mo lenei Aso Sa-ma e talitonu le Tusitala- o se alagaupu faigofie ma e malamalama lelei i le toatele, ae afai lava e moomia se isi faapulapula teisi-o le a ‘ou taumafai atu. Fai mai le ulutala o le tatouTalanoaga-UA ‘AI ‘ULU, TUANA’I TAISI’-Afai e faamalamalama-ona faapea lea:

O le amio a tamalii o Asau i taimi o le oge-latou te faafetaia tagata e maua atu ai a latou ufi-ae a o’o i le taimi o le fuata-‘ulu-ona latou teena lea o tagata na maua atu ai a latou ufi” A toe faaupu la ina ia manino teisi-“E te mana’omia ma talia fiafia le agalelei o isi tagata- ae a maua loa ou manuia-ona e le manatua loa lea o le tagata na alofa mai i le taimi o ou puapuga!

A tuu la i lona ata lautele e malamalama atili ai-ona faapea lea-“O le lē alofa o le taui lea o le lalolagi nei. A tatou tilotilo i tatou o tagata lautele o Samoa ia i tatou lava i le taimi nei-o le upu moni-e le masino fesoasoani ua fai e le atunuu i lenei faiga-malo!

O soo se fono e fai mai i Samoa nei- e tapa mai i le atunuu ina ia fesoasoani atu! Fai lea taaloga –lakapi poo taaloga afeleti-tapa mai i le atunuu e fesoasoani ai. Fai lea sauniga faalauiloa a le Malo i lea nuu ma lea itumalo-tapa mai i le atunuu!

A faaupu la le tulaga moni ua i ai nei le atunuu talu ai nei faiga-ua matua pala vivi lava. A tatou tilotilo i aitalafu i fafo-o le atunuu foi lea e totogiina. O le eletise-o lea e totogi e le atunuu le suauu e vili ai le eletise toe totogi ma pili o latou moli.

A tatou tilotilo i le afu maligi o tagata totogi lafoga ma le faitau miliona ma miliona o tupe o latou totogi ua maumau i faiga pi’opi’o a le malo ma taupulepulega leaga a tagata faigaluega ae leai se mea o faia i ai-o le a la le uiga o lea mea?  O le a la le mea lea ua o’o ai le faigamalo?

“O LEA UA ‘AI ‘ULU TUANA’I TAISI.”Ua galo i le faigamalo-o le atunuu na tofia i latou i o latou tofi! Ua matua galo le alofa o le atunuu! Ia o lea ua tatou alo atu mo le faiga-paltoa i le tausaga fou! O lea foi ua toe talosaga mai i le atunuu!

O lona uiga ea o le a fai  le atunuu ma titi se’ese’e o lenei faiga-malo a le HRPP? A tatou tilotilo lelei i lea faiga-o le fesili-“O se mea tatau lea mea o le avatu e le atunuu o le ‘ula ae nofo ma futifuti? A tatou tilotilo i le Tau o le Soifuaga-o se mea tatau ma amiotonu lea mea o le totogi e le tagata figaluega o lana lafoga mai lona totogi-ae toe totogi e ia ma le isi lafoga pe a alu e faatau se mea’i mo le aiga?

A faapefea la ona le matitiva le atunuu pe afai o le faamoemoe lea o le faiga-malo-ia matua faa-mativa le atunuu ina ia tumau ai pea lo latou umia o le faiga-malo? Silasila i le  fanau iti i luga o ala tetele i le ao ma le po o feoa’i solo e tau faatau atu ni oloa aua le tausiga o le aiga!

O ai e mafua ai? O le tali o le Malo. Ana alolofa moni la i le atunuu- ua leva ona latou aveeseina le VAGST! O le mativa la o le atunuu- e mafua mai le taugata o le tau o le soifuaga e pei ona faatulaga e le faiga-malo! E faapefea la ona ola le tagata e leai se galuega e tausi ai lana fanau?

Ia o lea ua tatou alo atu i le faiga-palota i le tausaga fou. O lea foi ua tulai mai sui faatutu mo itumalo eseese- ae leai lava ma se tasi o faapea mai-o lana faamuamualea  o le Tau o le Soifuaga! E le matitiva fua le atunuu- ua matitiva  ona o le faiga-malo! Aisea ua le mafai ai ona aveese le VAGST?

Ua ‘ai ‘ulu galo loa taisi sa avatu e le atunuu! Afai la e na o manuia lava o le faiga-malo lea o loo saili-ia manatua la- o le “le alofa o le taui lea o le lalolagi atoa! Sa oge ma mole manava ina ua faatoa tulai mai-ona tapa mai lea i le atunuu  lea na o atu ma ufi- ae o le a le mea lea ua tupu?

Ua “ai loa ulu” a le Malo-pe ua maua o latou manuia- faagalo loa le atunuu sa o atu ma taisi ufi i le taimi o lona puapuaga. Ae ui o lea Samoa –afai e moni ua outou matitiva- e mafua ona ua ‘ai ‘ulu tuana’i taisi’-ua maua loa o latou manuia –galo le atunuu?

O le fesili la- faamata e ono maua se manuia o Samoa i le lumanai mai nei ituaiga o faiga-malo? Afai e leai-‘e pule oe’-pe pule lava Sitafune i le La o lona vaa- ae ia manatua –o lau palota na fai- o le ola lena poo le oti o lou aiga ma tagata uma lava e faamoemoe ia te oe.

Afai ua galo ina ua maua o latou manuia-e faavavau lava ona saili na o latou lava manuia, se’ia vagana ai foi ua manaomia se isi fesoasoani a le atunuu-ona faatoa manatua foi lea o le atunuu. Ae ia manatua-o le mea e sili ona leaga ma inosia i luma o le Atua-“o le taui atu lea o le agalelei i le agaleaga! Ia manuia tele le Aso Sa Samoa ma ia faamanuia atu le Atua!

© Samoa Observer 2016

Developed by Samoa Observer in Apia