O le tina ole faioa

390 Hits

by Theresa Meaole

 
E moe ae le ma-moe,

Taia pea I taliga manatu lelei mo se faamoemoe.

Augata lagona I mea faafiafia o le lalolagi,

Nei afaina le aiga I ai o le matagi.

E tetee le mafaufau I vaivaiga o le tino,

Ina nei taoto ao manuia o lona aiga o lea lilo.

 

E ala usu I le tafa o ata,

Molimau tina na asia le tuugamau o le atalii o le tagata.

Galue malosi e le faalogologo tiga,

Tusa poo lea le vaivai ma le lelava.

Faamaoni ma galue punouai,

Se manuia o lona aiga mo le lumanai.

 

Seei mai I le ietoga ua le ole lea,

Ou lima I le atolaufala oka e te onomea.

Lau sui faasolo ua e lauiloa ai,

Le kukaina o taumafa oka e lasi I le vaai.

Faafitauli I le aiga e te le faatamala,

O le tautai lava oe I aso leaga.

 

Le ulu o le aiga tina e te le foi ai,

E te fautua I pupuag e aliae mai.

Lau fanau e te le solomuli ai,

O le faamalosiau oe I taimi o le vaivai.

Lau tautua e te le faavaivai lava,

Manatu I le matai nei ai I le ala.

 

O au galuega ma faiva alofilima,

O le puna lea o oa mo lou aiga.

E te faaputuputu oa mo a taeao,

Tina o lau lea vaai mamao.

Faalupe oe I le pae ma le auli,

E te faamafolafola mea maanuminumi.

 

“Sau ia oe lau pele lou au’,

Le leo malu lea o le tama ma lana tauvalaau.

Ina sei e pai atu ma avatu le mafanafana,

Aua o oe o le ola I totonu o soo se mafutaga.

Fesouaina I fita e te faatoatoa,

Ou nafa e te le faatamala aua o oe o le faioa.

© Samoa Observer 2016

Developed by Samoa Observer in Apia