Sili le Aiga nai lo mea uma

By Fetalai Tuilulu’u 12 May 2017, 12:00AM

O le matafaioi masani lava ia o so’o se tagata Samoa o le faamuamua lea o manaoga o aiga aemaise o fanau aua so latou lumanai manuia

Ma po o le a le tele o mau mea i le olaga ae e faamuamua lava aiga nai lo nisi lava mea o le olagama e tusa lava pe tau faamata’u mai le tau o le soifuaga e le ‘alo ai lava le ata o le laau.

Mo le tama ia Sefulu Nofoa 39-tausaga le matua mai le afioaga o Papaloloa ma Moataa o lanai a lea faamamafa ma le faamuamua e mo lona aiga ma lona atalii e toatasi.

“Vaaia le tele o suiga o lenei olaga pe a faatusa atu i aso ua mavae” o lana tala mai lea i le Fofoga o Samoa

“Tele foi luitau o feagai pea ma tagata i aso uma aemaise ai o e taugata o le soifuaga ua iai nei o le mataupu laualuga lava lena

“O nisi o taimi e le gafatia ai se tau o se oloa mai se faleoloa, a ua galue lava i e faatoaga aua e maua mea uma ma le saoloto leai se tupe e alu ai.

“Ae o lenei olaga ua tupe mea uma ae o nei mau tupe e tele e alu le aogalava i le tele o faalavelave a aiga ae faapefea fanau?

“O se itu foi e vaai iai le Malo i le fetuutuuna’i ai le tau o le soifuaga ua iai nei aua o le mea moni e le’o matou le aiga o faitio e toatele nisi o lo’o faitio ai foi iai 

“Pau le tulaga o lo’o faamama-avega o le galueaina lea o le faatoaga aua a maua lava se meaai mo fanau ua lava lea.

E le’o manofonofo ai foi le tama ia Sefulu i le galuea’ina o lanai a matafaioi o le faigaluega mo se seleni mo lona aiga

‘Ou te faigaluega i le Paradise Finance ma e feololo lava sina seleni e maua mai ai ma a sau lava le totogi ia ua iai lava le mea ua uma ona faataatia e alu ai

“O faalavelave faale-aiga, pili o le suavai ma le moli faatasi ai ma le pili aoga o le atalii ia ua uma atu foi lena seleni

“Ae o meaai lava ia o mea lava ua maua i lima ma fanua ua lava lena ma totoe mo le ola ai i aso uma.

I lana mau, e sili ai lava le galue lava o le tagata ia mo lona ia aiga ae aua le ola faalagolago fua i nisi

“Faamoemoe lava le tagata ia ia te ia aua a faamoemoe i isi ua oti atoa le faamoemoe ma a e galue lava mo lou aiga ma lau fanau, e sili atu ai lena nai lo nisi mea

By Fetalai Tuilulu’u 12 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>