Teena e le Alii sa Minisita muamua e lē nofo sala

By Lanuola Tusani Tupufia 12 May 2016, 12:00AM

O Le sa avea muamua ma Minisita o le Kapeneta ma o se sui faatu mo le Faiga-Palota Lautele, o Le Tagaloa Pita Alailima, na ia faaalia lona le nofosala i se moliaga e faasaga ia te ia i totonu o le Faamasinoga Faa-Itumalo.

O lea talosaga o se tali atu lea i se moliaga e faasaga ia te ia-na faaulu e le Ofisa o le Komisi o Faiga Palota, na tuua’ia ai o ia i le faia o se ta’utinoga sese a’o aga’i atu i le Faiga-Palota Lautele 2016.

O le fatu o lea finauga e faasino i se mana’oga tau auaunaga i le nuu poo se monotaga o loo i totonu o le Tulafono o Faiga-Palota-lea o loo manaomia ai se sui faatu ina ia tuuina atu sea auaunaga mo le tolu tausaga.

O le Loia, o Sarona Ponifasio-o ia lea sa fai ma sui o Le Tagaloa, fai mai e leai se finauga ‘anoa o i totonu o lea mataupu ae o se mataupu faale-tulafono.

Na faailoa atu e lea tama’ita’i i le Faamasinoga e faapea o lana paaga na fai lana ta’utinoga ma le talitonu atoatoa ua uma ona ia tuuina atu se auaunaga e le tumau i lona nuu ma e tusa ai ma aganuu a lona nuu.

Ae ui o lea, na faavae le faaiuga a le Faamasinoga Sili e tusa ai ma le lu’itau tau le vaitaimi o le agavaa i taimi amata o lenei tausaga-lea e le’i faamalieina ai e Le Tagaloa le mana’oga mai le Ofisa o Faiga-Palota. 

I lea taimi, o le finauga a Le Tagaloa e faapea o le monotaga e faatino e matai e le aloa’ia tele ma o lona nuu o Sili-na te le manaomia lona faatinoina o lea auaunaga. O le faaiuga a le Faamasinoga Sili e faapea sa le faamalieina e le Minisita muamua o le Kapeneta ia manaoga ma ua mafua ai le faaleaogaina o le avea o ia ma sui tauva mo le faiga-palota.   

O lea faaiuga a le Faamasinoga na fai i le aso 25 o Aperila ma tuuina atu ai se faauigaina faapitoa o le monotaga ma e le aofia ai isi lava auaunaga tau tupe,” o le faaaliga lea a Mrs Ponifasio.

 “O la’u paaga e fai ana isi lava saofaga tau tupe e le faatauanauina-e avea ma tautua i le nuu. “Na ia faamalieina manaoga o loo i totonu o le Tulafono o Faiga-Palota…ma o le manatu moni lava lea o le itu tete’e e faapea na te lei faia se ta’utinoga sese, ae ona pau lava o le faauigaina a le Faamnasinoga.”

Sa fesiligia e le Alii Faamasino o le Faamasinoga Faa-Itumalo o Vaepule Vaemoa Vaai ni manatu faaaliga o le loia o loo gafa ma moliaga, o Iliganoa Atoa. 

O le tali-fai mai le tamaitai o faatonuga na tuuina atu ia te ia e tasi lava le moliaga mo le itu tete’e.

Fai mai le Faamasino o Vaepule o se tasi o mataupu na lagā e le itu tete’e o le matua faamalamalamaina atoatoa o le monotaga. E le faia e le Faamasinoga soo se mea e faasino i le faaiuga mai le Faamasinoga Sili,” o le faaaliga lea a le Alii Faamasino o Vaepule 

 “Ou te le o vaaia soo se mataupu e faamuamua ae o loo faaaogaina e le loia a le itu tete’e se talosaga mai le faitoto’a i tua e toe fofoga ai lenei mataupu…ma taumafai e faaleaogaina le mataupu.”

Na tolopo e le Faamasino o Vaepule le mataupu se’ia aulia le aso 11 o Iulai 2016 e fofogaina ai.

By Lanuola Tusani Tupufia 12 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>