Fa’ailoga o le Matua (Vaega 2)

By Fa’aliliu e Maiava 12 May 2016, 12:00AM

Toe mafaufau tasi lava… Ua tā’ua so’o fa’apea: “Leai se mea i le soifuaga nei e le’i fa’aleleia e le tagata-soifua se’i vagana ai lava, le tagata.” O le fa’anoanoaga lea, ona o lo’o fa’aauau pea le le-mafai lava ona avea isi o tatou ma tagata matutua, a ua ola  lava e pei o ni tamaiti ma teineiti laiti.

O le tasi o fa’ailoga o le tagata ua matua, o le loto-pulea lelei. A o le tasi lea o mea aupito faigata ona tatou fa’atonutonua, o o tatou laulaufaiva ma ‘upu e tautatala ai.

Ua mafai ona tatou fa’alalata manu-fe’ai ma manu-tetele pei o elefane, o tafola ma leona, peita’i, e le’i mafai lava ona tatou fa’alata ma fa’atonutonu le tama’i-maso i o tatou fofoga, lea e mafai ona avea ma a’upega mata’utia e fa’atiga ma fa’aleaga ai mafutaga ma so’otaga ma isi.

“E le pu se tino pe ta’ei ponaivi i ni ‘upu, ae na o le fatu e matua afaina.” O le la’asaga muamua la, o le mafaufau. Nofo lelei i lalo ma mafaufau i ‘upu o le a e tautala ai: Pe moni, pe fa’amaoni? Ni ‘upu alofa pe fa’atiga-loto? Pe talafegai pe leai fo’i? 

O le la’asaga lona lua, ‘aua le tautala so’o. E la’ititi atu avanoa e te fa’atiga ai i isi tagata – e aofia ai ma ‘Oe – pe a le-tautala so’o. O nisi taimi, e sili atu ai lou fifilemu. Manatua le tulafono, “Leai se paga a le malie pu’upu’u.“ E tele atu lou sao pe a le-tautala so’o. O tagata e tele mea e fia talanoa iai, e le tele ni ‘upu latou te fa’aaoga. 

O le isi fa’ailoga o le tagata ua matua, o le fuafua leleia lea o ou fa’amoemoega ma fa’amuamua o le olaga nei, a ia ‘aua ne’i ma’umauina lou taimi na o mea fa’afiafia ma mea le-mautu. Ae tatau ona fa’aalu lou malosi, ou taimi ma lou iloa e fa’aleleia ai soifua o lou aiga, o uo ma tagata o tou soifua fa’atasi.  

O tagata ua matutua, e soifua mo se mea mautu ma lelei ae lē-fa’amuamua latou lava. E fiafia e foa’i, ae le na o le talia o mea uma. “E ‘uma atu le ola nei, pau mea ua to’esea mai ia tatou, o mea sa tatou taumafai e taofiofi mamau iai.’

O tagata matutua ma malolosi, latou te le mo’omia ni taimi fa’apitoa e fa’afiafiaina ai.  E malamalama lelei latou na, e maua le fiafia mai le fa’afiafiaina o isi tagata. Pau lena o le ‘auala tatou te maua ai le fiafia moni, o le fa’afiafiaina o isi tagata.    

Manatua, na fa’ailoa manino mai e Iesu le fa’ata’ita’iga tonu o le tagata matua, ma ‘aumaia lona malosi e mulimuli ai i fa’ata’ita’iga sa ia Fai. E na o Ia lava e mafai ona a’oa’o atu ina ia e taunu’u i le atoaga o le tagata soifua matua, na fausia e Le Atua ia soifua ma manuia i le ola nei.

Na fetala’i Iesu: “’Ou te le’i sau e fa’apologa ‘outou a ia ‘au’auna ma avatu lo’u ola mo isi.” Tatalo nei ia Iesu e fa’amagalo ‘Oe ona o lou iai pea i ou ala tuai ma sese. Tatalo ia ta’ita’ia Ia i lou ola e amata nei, ma aso uma o totou o lou soifua. Toe mafaufau tasi lava…

By Fa’aliliu e Maiava 12 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>