O le fa’aiuga o le vaiaso ua mavae, na fa’ae’e ma fa’apaiaina ai mamalu o le Suafa Leaupepe o le Afio’aga o Foailalo Savaii i le Susuga ia Mamea Ulafala Seupule, le Paia lava lea auᾱ le Afio o Letelema’ana ma Leaupepe, le Alo Lilomaiava le mamalu I le Falelua ma Gagaemalae.

O Leaupepe Ulafala Seupule e mai le afio’aga o Satalo Falealili, Matautu Falealili ma Safaatoa Lefaga, a’o se maupaolo (tulou) i le Afio’aga o Foailalo, peita’i ua inu malie le aiga o si ona Faletua ia Losivale Mailo Fa’asoesa Letelemaana i le tautua matavela a lenei foi tamali’i, ua afua ai ona fa’ae’e i ai measina totino tautoto.

I le saunoaga a le Afioga ia Leaupepe na ia fa’amatalaina ai o le tuᾱa lava o si ona toalua, le Fetalaiga ia Mailo Faasoesa Letelemaana, o le tuua foi o le Afio’aga o Foailalo, na naunau lava ia fa’ataunu’u lana saofa’i.

Ua na’o Leaupepe Mamea Ulafala ma lona Faletua ia Losivale o le fanau a le Fetalaiga ia Mailo, ua fa’asuafaina i lenei suafa, mai le fanau e to’aono.

 Na ia ta’utino ma lona loto atoatoa lana tautua o le a taumafai i ai, e tali sapaia ai le fa’aaloalo ua i ona aao.

“Na ou tautino i luma o le nuu i le taimi o le aliitaeao e faapea, e lei leva se taimi na ou tautua ai i Foailalo i faiva fa’ataulealea, peitai atonu e aogᾱ lo’u matai i le suafa, o le ᾱ tilofia ai nisi tulaga lelei e pei o ni atinae e mafai ona faatino mo le manuia o tagala lautele o le afioaga,” o le saunoaga lea a Leaupepe Ulafala

“O le a ou finau malosi mo ni atina’e e faatino ai la’u tautua i lo’u nu’u aemaise o le fa’aeaea a le aiga o si ona toalua.”

E to’atele nisi na seei fa’atasi mai ma le Afioga ia Leaupepe Ulafala i lenei suafa, ma sa fa’apaiaina uma i le tausaga ua mavae, peita’i ona o le malaga a le Afioga ia Leaupepe i nisi o fuafuaga i ona matafaioi tauave i Niu Sila, na afua ai ona lē auai i lenei fa’amoemoe, peita’i o lea fa’atoᾱ maua sona avanoa ua talafeagai ma fa’atasiga fa’alēaiga, e patipatia ai le Toetu o le Alii Fa’aola i lenei tausaga 2018.

Na momoli lana Fa’afetai fa’apitoa i ona au aiga, uo ma i latou uma na afifio atu e opogi lona fa’amoemoe i le fa’aiuga o le vaiaso ua mavae.

“Mo au lava ia e faafetai tele i le Afioga ia Letelemaana Fagaese ma le Aiga Potopoto i le amanaia o lenei tagata faatauvaa e matai i se tasi o matai tᾱua o le latou aiga.”

O le susuga i le faafeagaiga o le Ekalesia EFKS Susuga Rev Pulemau ma le Susuga i le Faifeau Ekalesia Metotisi Rev Selau na fa’apaia ma faamanuia  i le nofo, a’o le Fetalaiga ia Lua Tavita o se tasi o tinomatua o le Falelua ma Gagaemalae na fetalai e fa’apaia le faafotu o le va’aᾱlii i le Afioga ia Leaupepe

O Leaupepe Mamea Ulafala Seupule ua fa’amauina o ia o se tasi o tusitala lauiloa i Samoa, o le amataga o le tausaga nei 2018, na fa’amauina ai le tatala aloaia o lana tusi fa’alupega ua fa’apupu’uina ai fa’alupega o Samoa atoa e aofia ai ma Tutuila ma Manu’a.

Na seei i le tofi o le Fa’atonu o le Nusipepa a le Malo le Savali, ma o lo o avea nei o ia o Ofisa Sinia Autu mo le Aganu’u ma le Va i Fafo i le Matagaluega a le Palemia ma le Kapeneta. Ua lata i le 10 tausaga o lana auaunaga i le Matagaluega a le Palemia ma le Kapeneta, sa galue foi i le Matagaluega o le Soifua Maloloina ma le Matagaluega o Tina ma Tamaitai i tausaga ua mavae.