‘Ea-‘ea le Palemia i le ulua’i malaga a le helikopa

341 Hits

O le afiafi o le Aso Lulu, na fa’atino ai se fa’aaloalo a le kamupani helikopa a Samoa e malaga-maimoa ai le Ali’i  Palemia, Tuila’epa Sa’ilele Malielegaoi i le ulua’i malaga a lea kamupani  fou i totonu o le atunu’u.  

E lima minute na alu ai lea ti’eti’ega e maimoaina ai se vaega o le taulaga o Apia. 

O lo’o fa’agasolo nei fa’atinoga o mana’oga mo’omia uma e aofia ai laisene tau-pisinisi, o pemita ma mana’oga tau-femalagaa’iga i le ‘ea, ina ia vave amata ai le ‘au’aunaga i totonu o Samoa. 
 
O le iai o lea va’alele helikopa (ituaiga o le Eurocopter AS350) i Samoa nei, o le a mafai ai ona fa’atinoina le tele o galuega mo’omia, e aofia ai galuega lavea’i, o su’esu’ega ma le fe’avea’ia o gasegase ma isi mana’oga fa’apena, e le gata i totonu  lava o Samoa, ae fa’apea fo’i i isi motu tua’oi e pei o Amerika Samoa, o Tokelau fa’apea Uea ma Futuna. 

© Samoa Observer 2016

Developed by Samoa Observer in Apia