“E faagasolo pea le Soifuaga”- Afualo

216 Hits

O LAU FOFOGA FIAFIA PEA : Afualo Dr. Wood Uti Salele.

O LAU FOFOGA FIAFIA PEA : Afualo Dr. Wood Uti Salele.

Sarafina Sanerivi

Faaliliu e Seagaitumua Tupuola

 

O le sui faatu o Salega Sisifo lea na faato’ilaloina ma sa avea muamua ma Sui Usufono o le Palemene-o Afualo Dr. Wood Salele-e le o ita.

O le leiloa o lona nofo ia Toomata Aki Tuipe’a lea na ia maua palota e 648 i le 408 a Afualo, fai mai lea tamalii lotomau o le Tautua Samoa Party e faagasolo pea le soifuaga ma e anoano mea e tatau ona fai e ese ai mai polokiki. E eseese tofiga a le Atua mo i tatou uma lava.

O a’u o se tagata ua lava le aoaoina, tusa lava pe o le a le mea o le a tupu mai, ae tumau pea lava ona i ai se nofoaga mo a’u i soo se nofoaga iinei, o se nofoaga lea o loo mana’omia tele ai la’u fesoasoani.”Ae mo le taunuuga o le faiga-palota, fai mai a ia ua matua faate’ia o ia.

“O se taunuuga lea sa le mafaufauina,” o lana faaaliga lea. “Ou te iloa e le na o i matou sui faatutu sa tauva i le faiga-palota faatasi ai ma le mana’o ina ia manumalo, ae peitai-matou te le’i vaaia lea tulaga ua aga’i mai.” Sa filo Afualo i se vaega toaitiiti o sui faatutu o le Tautua-e aofia ai ma le Ta’ita’i o le Pati o Palusalue Faapo II-ia ua leiloa o latou nofoa. “O loo matou faamoemoe mo le mea sili,” o lana faaaliga lea. 

E tatau pea ona matou faatali mo le faitauga mulimuli o palota faapitoa.”O loo mautinoa foi e ia o le a matua tele ni talosaga i le Faamamasinoga-ia o le a faaulu i le vaiaso a sau. I le taimi nei, fai mai Afualo o le latou vaaiga tausili i le taimi nei- o le fai lea ia mautinoa ua ia i latou se itu agai e matua malosi lava. “E tatau ona matou maua se itu agai na te fuafuaina ma fesiligia faaiuga na fai e le faiga-malo” o lana faaaliga lea. O loo i ai pea le Vaega a le Tautua.

Ou te matua faafetaia Olo, A’e’au ma Ili mo le tula’i mai mo le Tautua. O le uiga o lenei mea- o loo i ai pea le faamoemoe. O le a tumau pea ona latou i ai i le Palemene e avea ma sui o le Tautua –ae peitai-o le a le aloa’ia i latou e avea ma itu agai.

“E talitonu foi Afuala e faapea o faiga pi’opi’o ua afaina ai le taunuuga o le faiga-palota.” Ina ua talosagaina ina ia tuuina mai ni faamatalaga molimau, fai mai Afualo o talosaga ia o le a faaulu  i le vaiaso fou o le a faailoa mai ai le tala atoa.

E le’i filifilia e le Atua le vaega toatele o sui fou. O se faaiuga lea e faavae i luga o le pusa moa ma tupe.” Ia te a’u lava ia, fai mai Afuala ua na lagona le tulaga faaeaina ina ua avea o ia ma sui o lona itumalo i totonu o le Palemene. “E le o le muta’aga lea o le lalolagi mo a’u, e faagasolo pea le faaaliga faapea foi ma le soifua,” o lana faaaliga lea.  “Ou te faailoa atu ia te outou, e anoano galuega o loo i ai e mana’omia a’u e le Atua ina ia ‘ou faia. E mafai ona ‘ou faaaogaina meaalofa mai le Atua mo isi galuega.”O lona ta’ua lava o lea tulaga-fai mai a ia o le a tilotilo i le faaauaina o lana miti- o le tusia lea o se tusi.

“Ua leva ona ‘ou mafaufau i lea tulaga ma atonu o le a ‘ou faia lava,” o lana faaaliga lea. “O le a ‘ou sasae atu lo’u agaga ma faaaoga la’u meaalofa tau le poto mai le Atua faatasi ai ma lo’u poto masani i le matātā tau polokiki e tuliloa ai la’u miti.

“Ou te mana’o e fai se tusi e uiga i le taualumaga tau faiga-palota i totonu o Samoa ina ia mafai ai e le fuaga o lalovaoa ma tamaiti ona faaaoga e avea ma upu faasino taua pe a fai a latou suesuega poo pe a latou fia aoaoina pe na faapefea ona fai faiga-palota i totonu o Samoa.. Na te lei auiliilina foi isi o ana mea e mafai ona fai i le lumana’i.

E mafai ona ‘ou toe fo’i atu e avea ma faia’oga sinia i le Iunivesite o le Pasefika i Saute poo se Iunivesite i fafo poo e mafai foi ona avea a’u ma tagata e faia suesuega. E anoaono mea o i lea nofoaga mo a’u e fai.” E tusa ai ma ona manatu faaalia mulimuli, fai mai Afualo o loo tumau pea ona i ai le faamoemoe mo le Tautua Party e susulu ai i le lumana’i.

”Ua outou iloa atonu o le taimi lenei o le H.R.P.P.ae o le tulaga moni lava o mea- e faapea e leai se tasi ma e leai se mea e tu-maualuga e faavavau. E leai se mea e faavavau.” E tusa ai ma lea itu, na ia faaaogaina le “tulafono o le itiiti o tupe e toe maua mai mai le tamaoaiga e faamanino ai lana finauga. 

“E mafai ona e faaputuputu au ala-manuia uma e fausia ai lau pisinisi i se tulaga aupito i maualuga, ae i nisi laasaga, o le a tumau pea ona i ai se tulaga e liliu mai ai ae mulimuli ane ua pa’ū  i lalo. “Ma e tusa ai ma lo’u mnatu, o le H.R.P.P. i le taimi nei ua na ‘ausia le tumutumu, ma ou te talitonu o lea tulaga i le lumana’i, tusa lava pe faaopoopo i ai nisi sui auai-ae o le a latou vaaia lava le vaega e toe liliu mai ai ma titŏ i lalŏ.E pei lava o soo se isi malo tele.” O Afualo Dr. Wood Uti Salele ua  58 tausaga lona soifua ma ua faaipoipo o ia ia Rosemarie Wood Salele. 

 

* O le Tulafono o tupe maua faaitiitia o loo faalia ai e faapea i taualumaga uma tau le gaosia e toe faaopoopo ai ni vaega se tele o se vaega lea e tasi tau le galueaiina, ae taofiofi pea isi vaega uma i taimi uma-o le a faaitiitia ai i se tasi laasaga tau tupe maua i mea ta’itasi tau le siitaga o totogi.


© Samoa Observer 2016

Developed by Samoa Observer in Apia