Talosagaina e tagata Lelata ni puipuiga lelei mo latou mai taimi o lologa

Tusia Deidre Tautua-Fanene ,

61 Hits

O se va’aiga mata’utia le tulaga sa i ai lologa, o le isi matou fale sa fa’aleagaina uma ma o le mafuaaga lea na ala ai ona o ese nisi o le aiga sa nonofo ai i nofoaga maualuluga.

Ua fa’aleagaina uma la’u fa’atoaga ma le pa, ma toititi lava o’o le vai I totonu o lesi fale fogafalelua.

Ae o nisi o tamaiti mai lea nofoaga sa latou osofa’ia nisi o fale o latou sa oese ma ave a latou meatotino – Gordon Bartley.

O le tetele o timuga ma le malolosi o matagi i le po o le Aso Faraile o se tulaga sa mafai ona mafaufau toto’a i ai  Gordon Bartley, 74 le matua o le soifua.

O lenei tamāe to’atolu lana fanau ma sa ola ma tupu a’e i Lelata.

Sa ia ta’ua o le a’afia ai o Samoa i le afā o Gita o se itu ua tatau ai i le malo ona faia nei loa se gaioiga talafeagai.

“Ua o’o i le taimi ua tatau ai loa i le malo ona fa’amae’aina le pa lea sa latou folafolaina i le mamalu o le atunu’u i le mae’a ai o le afā o Eveni i le tausaga e 2012,” o lana saunoaga lea.

“E lelei o lea ua maitau atu o lea ua amata ona fausiaina le pa lea e i Vaisigano e taofia ai lologa, ae o le itu e pitosili ona lelei ai pe ana fa’apea o lea fo’i ua fausiaina se pa fa’apea mo Lelata.

“E leai lava ma se galuega ua amataina i tafatafa o le vaitafe o lo’o tafe I tua atu o le matou fale.

“O le vaitafe lea, o lea e tafe mai i Magiagi lea e ea ane i Vaisigano.

“Ana fa’apea ua fausiaina e le Matagaluega o Punaoa ma le Siosiomaga le pa lea i augutu o le vaitafe, fa’apenei e leai ma se isi o lo’o aumau i Lelata e a’afia.”

Sa ia ta’ua fo’i i le tausaga e 2012 i le afā o Eveni sa fa’aleagaina uma ai lava le tele o meatotino i itu uma lava o Samoa ma na a’afia atu ai ma lona nofoaga, ae masalo e telē fo’i se a’afiaga o le afā o Gita pe ana fa’apea e umi.

“Mata’utia le tetele o lologa iinei, o lesi o’u fale sa fa’aleagaina uma aemaise ai isi aiga o lo’o nonofo latalata mai,” o lana tala lea i le Samoa Observer.

“O lo’u fa’atoaga ua leai se mea o totoe ua fa’aleagaina atoa uma.

“E o’o i lesi fale fogafalelua toeititi lava o’o ai le vai i totonu.”

O lona naunautaiga i le malo ina ia fai nei loa se gaioiga ma amata loa ona fausia le pa sa latou folafolaina ona o le taimi lona lua lenei ua mafatia ai tagata Lelata mai ni fa’alavelave fa’apenei  aemaise lava nofoaga o tagata.

Sa ia ta’ua fo’i sa ia fa’atonuina nisi o lo’o mautotogi i se tasi o ona fale ina ia oese ona o lea nofoaga o lo’o tulata i le vaitafe ne’i te’i ua a’afia ai latou soifua pe a o’o ina pa le vaitafe.

© Samoa Observer 2016

Developed by Samoa Observer in Apia