Fesoasoani i taimi o mafatiaga

Tusia Deidre Tautua-Fanene ,

59 Hits

Sui o le Polokalame o lo’o ta’imua ai le vaega a le A.D.R.A. Tuioti Autagavaia Sakaria Taituave fa’apea ai ma sui o le vaega a le Ofisa o Fa’alavelave Fa’afuase’i i le tausiga o nai tagata sa sulu atu mo se fesoasoani.

Sui o le Polokalame o lo’o ta’imua ai le vaega a le A.D.R.A. Tuioti Autagavaia Sakaria Taituave fa’apea ai ma sui o le vaega a le Ofisa o Fa’alavelave Fa’afuase’i i le tausiga o nai tagata sa sulu atu mo se fesoasoani.

Ua mae’a ona faia ni nofoaga e sulufa’i ai e o lo’omana’omia se fesoasoani aemaise i latou ua a’afia i lologa.

O nei nofoaga e aofia ai le vaega ale Adventist Disaster Relief Agency (A.D.R.A.) i Lalovaea.

I le po o le Aso To’ana’i sa mafai ai ona resitala ai le 163 o tagata sa mana’omia se fesoasoani ona o a’afiaga o le afā o Gita.

I le taimi sa taunu’u atu ai le Samoa Observer i lea lotoā, fa’atoa mae’a lava ona fai le taumafataga a tagata e to’a 100.

Sa ta’ua e le alii o lo’o va’aia lea vaega mo le A.D.R.A., Tuioti Autagavaia Taituave o le taimi lea o lo’o latou galulue fa’atasi ma le vaega o fuimu ma fa’alavelave fa’afuase’i, ofisa o lf’alavelave fa’alenatura, ma nisi lava ofisa e fesoasoani i nei aiga.

“E tatau ona asia nofoaga o lo’o i ai nai nei tagata,” o lana saunoaga lea.

“Afai e alu le asiasiga i latou nofoaga ma mautinoa ua sefe latou ona toe fo’i lea matou te o lava e momoli.

“O lo’o i ai sina fesoasoani mai le malo ma le fesoasoani mai le matou lava ia fa’alapotopotoga.

“O lea lava e fa’aaoga matou seleni e fa’atau ai meataumafa o le taeao ma le aoauli, ae o lea fo’i lava e i ai nai tagata o lo’o nonof lava iinei ona e le’o mautinoa po’o le a le umi o le a iai iinei.”

Sa ia fa’aalia fo’i o lo’o mafai lava ona latou taliaina nisi o tagata o le a mafai ona oatu.

“Pau tagata e mafai ona matou aumaia iinei o tagata o lo’o mana’omia tele le fesoasoani i se nofoaga e nonofo ai, e le taulia ai le to’atele e omai lava na’o le a’ai.

O nisi o tagata sa mafai ona mauaina se fesoaosani mai le vaega a le A.D.R.A. i Lalovaea.
O nisi o tagata sa mafai ona mauaina se fesoaosani mai le vaega a le A.D.R.A. i Lalovaea.

“O lea fo’i o lo’o le aufaigaluega ale vaega o fa’alavelave fa’afuase’i e fai a latou ripoti ma latou fa’amautinoina mai po’o le a le umi o le a nonofo ai nisi o’i latou iinei.

O le pule o le polokalame ale A.D.R.A., Valelia Ausage, sa fa’asoasoanina taumafa fa’apea ai ma nofoaga e nonofo ai i latou sa sulu atu mo se fesoasoani.

“O le to’atele o latou nei o lo’o a’afia o latou fale i lologa ona o le vaitafe.

“O nisi ua mafai ona toe fo’i e fai a latou tapenaga ae uma fo’i ona toe omai lea e momoe iinei.

“Ua uma ona fai ai le malū o le taeao ma le taumafa o le aoauli ma o lea o le a se’i va’ava’ai atu po’o le a se tulaga o le po.

“E mana’omia fo’i se fesoasoani ae o lo’o fa’alogologo pea po’ole a le tulaga o le a o’o iai.

Sa fa’alia e le faletua o le tele o a’afiaga o le lologa ua fa’aleagaina ai fale.

“O le tele o lfale ua a’afia uma i le vai o le ala lea ua sulu mai ai iinei ona ua leai se mea e mapu ai.

“E fa’apea fo’i ia Eveni o le to’atele lava o le a’afiaga o lologa aemaise lava mai le vaitafe i Vaisigano.

“O le itu lea e va’ai atu ai o lo’o mana’omia lava e le to’atele le fesoasoani aemaise lava i nofoaga e i ai Vaisigano ma Lelata.

“O lea e taumafai le aufaigaluega e ave le fa’amuamua mo i latou o o’o mana’omia tele.”

© Samoa Observer 2016

Developed by Samoa Observer in Apia