Toe tō manātu tagata i mafatiaga o le afā o Eveni

Tusia Deidre Tautua-Fanene ,

40 Hits

O aiga ma nai tagata o lo’o aumau i nofoaga o Lelata, Ma’agao ma Fa’ato’ia ua toe tō manātu i mafatiaga sa i ai i le afā o Eveni i le tausaga e 2012 i le po o le Aso Faraile a’o agi malosi ai le afā o Gita.

 O le talitonuga o Robin Tauili’ili, 28 tausaga e fa’apea o le pa ai o le vaitafe i Vaisigano o le mafuaaga lea o lologa.

 “O le nofoaga atoa lava lenei e fai lava si ma’ale’ale pe a o’o nei i lologa i taimi uma lava e pa ai le vaitafe ona o le tetele o timuga,” o lana tala lea i le Samoa Observer.

 “O le fa’afitauli lea e i ai e le tafe sa’o le vai i le auala laupapa, ae e alu atu poloka uma le alavai ona o le tele o lapisi ma la’au e sau le vai ma aumai.

 “O mea uma la nei e polokaina le tafe sa’o a le vai, e tusa la ua le sa’o ai loa le tafe a le vai i le nofoaga e tatau ona tafe ai, ae uma ifo ua sau i luga iinei ona o le tau su’eina o se auala e tafe aga’i i ai.”

Sa fa’ailoa e Tau’ili’ili le laki o le latou aiga ona e le’i a’afia i lologa.

 “To’atele o aiga e fou ia i latou nei fa’alavelave fa’alenatura, ae o lenei tulaga na tupu mai ua toe manatua uma ai e’i latou ua leva ona nofoia lenei nofoaga le afā o Eveni i le tausaga e 2012.

 “O le matou fale e i tua tonu lava o le vaitafe, ae fa’afetaia le Atua ona e le’i afaina matou i le to’atama’i o le vaitafe.

“O le fa’atolu ai lea na pa le vaitafe lenei, ae pei lava o anapo lea sa sili atu lona ogaoga.

O le tasi nofoaga sa matua’i fa’atama’ia lava e lologa o le Apia Park.

Sa matua’i lolovaia uma lea nofoaga fa’asolo atu ai lava i Moata’a.

Ona o lenei tulaga sa i ai le malae ta’aalo i le Aso To’ana’i ma o le mafuaaga tonu lava lea sa le mafai ai ona fa’atautaia ni ta’alog se’i ma’ea ona toe fa’aleleia ma fa’amamaina le malae. 

© Samoa Observer 2016

Developed by Samoa Observer in Apia