Leai se tulaga e fa’apopoleina ai i le mataupu sa tula’i mai i Tafa’igata

Tusia Deidre Tautua-Fanene ,

53 Hits

Tuilaepa Sailele Malielegaoi.

Tuilaepa Sailele Malielegaoi.

Ua ta’ua e le ali’i palemia Tuilaepa Sailele Malielegaoi e leai se tulaga e fa’apopoleina ai le atunu’u e tusa ai ma le mataupu sa tula’i mai i le Falepuipui i Tafaigata i le vaiaso na te’a nei.

O le fa’amatalaga o lenei mataupu e fa’apea a’o loma ai le afā o Gita i le po o le Aso faraile sa logoina le matagaluega o leoleo mo se fesoaosani e le Matagluega o flepuipui.

E to’a 90 leoleo sa mafai ona tali atu i lea vala’au ona e fa’apea o lo’o fuafuaina se solaaga tele a ali’i pagota mai Tafaigata. 

“A o’o i le taimi e tutupu ai ni fa’alavelave fa’alenatura e a’afia ai le atunu’u o le taimi fo’i lea o lo’o fuafua ai i latou o lo’o a’afia i le tulafono e osofa’i,” o le saunoaga lea Tuilaepa.

“Ae peita’i sa mafai ona tali atu le matagaluega a leoleo ma galulue fa’atasi ai ma le matagaluega o le falepuipui i lea taimi e tausi le filemu ma fa’atulaga lelei lea mataupu.”

O le So’oupu a le Mataglauega o Leoleo, Auapa’au Logoitino Filipo sa mafai ona tali mai i fesili sa fesiligia ai e le Samoa Observer ma sa ia ta’ua ai sa mafai ona tali fa’anatinati atu le matagaluega ina ua ma’ea ai ona tu’uina atu ripoti e uiga i ia fuafuaga.

“sa mafai ona matou tali atu ina ua ma’ea ona tu’uina mai se ripoti mai le falepuipui i Tafaigata e tusa ai ma se solaaga ua fuafuaina e se vaega o pagota o lo’o i Tafa’igata,” o lana saunoaga lea.

“O lea ua uma ona soālaupule lea vaega ma o le taimi nei o lo’o galulue fa’atasi matagaluega ia e lua e fa’amautinoaina le saogalemu ai le falepuipui.”

Sa ia faailoa mai fo’i le fa’aaogaina e alii leoleo lea avanoa e su’esu’eina ai totonu o le falepuipui.

“Ina ua fai su’esu’ega sa maua ai ni fuala’u fa’asaina o mriuana e ova atu ma le 30 sikareti fa’apea ai ma tinoitupe.

“E to’atolu ni ali’i pagota o lo’o faia ai nei su’esu’ega ma o lo’o fesiligia fo’i e uiga i lenei mataupu.

“Pau lea o se tali ua mafai ona tu’uina atu ae o lea lava e fai galuega a leoleo ma ofisa o le falepuipui.”

Ina ua fesiligia Auapa’au po’o ai o lo’o masalomia i le fuafuaina o lenei solaaga ae pe na māua ai fo’i ni la’au malosi i totonu o le falepuipui e lei mafai ona tali mai le so’oupu.

“E le’i iai ni la’au malosi sa mauaina ma o lo’o fa’aauau pea su’esu’ega e tusa ai ma lea mataupu.

“Ia e malamalama e i ai vaega e patino i le mataupu lenei e le mafai ona tu’uina atu ai se tali.”

I le fa’atalanoaga ale Samoa Observer ma Tuilaepa sa ia ta’ua ai e laititi lava le taufa’amata’u sa tula’i mai i lea mataupu.

“Ou te le talitonu i na mea.”

Pau le itu sa ta’ua e le ali’i palemia o lana matāfaioi o le fa’asauni lea o le atunu’u ina ia nofo sauniuni ai mo le afā.

Sa ia fa’ailoa fo’i o le mataupu lea e uiga i le falepuipui sa logoina ai ia e le matagaluega ona o ia o le Minisita o Leoleo, ma sa ia fa’atonuina ai le matagaluega e fai a latou gaioiga e tatau ona fai.

Sa fesiligia fo’i pe le ua alagatatau ona toe fa’afo’i mai le vaega o falepuipui i lalo o le fa’amalu ale matagaluega o leoleo,

Ae na tali Tuilapea, “E leai se mea o le a suia ai faiga fa’avae a le malo ua uma ona fai ona ona o se tulaga fa’apea. E tatau ona tatou manatua o so’o se suiga lava e tatau lava ona i ai ni fa’afitauli e tula’i mai ai.”

“Ae peita’i o le a le gata ai fo’i i’i fa’afitauli,

“Ia tatou manatua o matagaluega nei e lua e eseese, e ese le matagaluega a leoleo e puipuia le tulafono ese le vaega e latou te va’aia pagota.”

Sa toa’tele ali’i leoleo sa vaa’ia i Tafaigata i le taeao o le Aso Faraile ina ua asia e le Samoa Observer.

© Samoa Observer 2016

Developed by Samoa Observer in Apia