‘Ave-pasi lē-mafaufau

245 Hits

NA A’O’OGA PE LEAI? Le pasi a Moamoa a o tu i luga o le ‘auala-tele mo fanau-a’oga o le A’oga Tulagalua a Vaimea, i le isi itu o le ‘auala.

NA A’O’OGA PE LEAI? Le pasi a Moamoa a o tu i luga o le ‘auala-tele mo fanau-a’oga o le A’oga Tulagalua a Vaimea, i le isi itu o le ‘auala.

Ripotia e Vatapuia Maiava

Fa’aliliu e Maiava

 

O se tulaga ua avea ma fa’atiga i le mamalu feafioa’i o le atunu’u  i luga o ‘auala i Samoa nei.

O le aga’i lelei atu i luga o le ‘auala ae fa’afuase’i lava ona tu se pasi i luma atu ma poloka atoa ai le ‘auala.

E fai lava ma le iloa lelei e le ‘ave-pasi, o lo’o iai se laina-ta’avale i ona tua. Ae faifai-malie ai lava e ao lana pasese pe tu’u fo’i nisi.  A o le mea aupito fa’atiga-ulu, o le fai-so’o, ma fa’aauau ai lava fa’apena i taimi uma. 

O e silafia le mea o talanoa atu ai? E fa’atiga-loto ia ‘Oe?

E sa’o-lele le fa’aaliga. Ua silafia lelei uma e le atunu’u.

A o le mea e aupito leaga, ia mae’a ona faia o vaega fa’apitoa i luga o ‘auala, mo pasi-la’upasese e tutu ai, a’o lea lava e le amana’ia. 

O le ituaiga ‘ave-ta’avale le-mafaufau lea, ua tele ina tuai ai le mamalu o le atunu’u e faigaluega, o fanau i a’oga ma toe fo’i i aiga, e a’afia ai soifua o tagata i aso uma, a’o isi fo’i taimi, e tutupu ai fa’alavelave pe a le lava le onosa’i a isi ‘aveta’avale, pe a taumafai e pasia se pasi e ala i le fa’aaogaina o le isi itu o le ‘auala. 

O ananafi na fa’ao’o mai ai i le Samoa Observer, lagona le-fiafia o nisi o le mamalu o le atunu’u ona o lea fa’afitauli ma ‘aumai ai fo’i ni o latou finagalo i le mea e tatau ona fai, e fo’ia ai le tupu so’o o lea tulaga. 

Na ta’ua e Saofa’i Fuimaono, o se ‘ave-ta’avale la’ititi mai Faleula, ua leva tele ona tupu o lenei fa’aletonu.

“E le popole lava ‘ave-pasi nei i tulafono o le ‘auala, o le mafuaga lea o le solipala ma le-ano iai,” o lana fa’aaliga lea. “E silafia lelei lava e tagata uma – e o’o i ‘ave-pasi, e tatau ona afe i tua ma soso i ‘autafa i nofoaga ua fa’atulaga mo pasi, pe a ao pasese, pe nonofo fo’i nisi”.

O le tima’i a Fuimaono, e tele lava a’afiaga ma fa’alavelave e ono tutupu i tagata-feoa’i. 

 “O le a le mea e tupu pe a tu fa’afuase’i se pasi pei o le mea e tupu so’o, ae soso’a mai tua e se ta’avale o mulimuli mai? E ono a’afia uma ai ta’avale o mulimuli mai tua.”

“E tatau ona mafaufau lelei le ‘ave-pasi, e taugata atu le fa’alavelave e ono tupu, i lo le tala e tasi lea e maua mai le pasese o le tagata e to’atasi.

“E le gata i lena, a tutu-fa’afuase’i pasi i le ogatotonu o se ‘auala pisi, e matua tele se poloka o le a iai  ma fa’atali uma ai le to’atele se’i uta a latou pasese ma nonofo lelei i lalo fa’atoa fa’aauau le malaga, i le tele o taimi o le aso.”

 “E le malie, aua e fai nei, luma teisi atu, ae toe fai fo’i le mea lava lea e fai i aso uma aso uma.” E faitio fo’i Fuimaoni i tagata o lo’o taumafai e pu’e le pasi.

“O le to’atele o tagata e savalivali lelei lava le ‘auala i o latou lumafale ma taumafai e taofi ai pasi, ae le-saogalemu. E tatau ona savavali i le nofoaga fa’apitoa e pu’e ai le pasi ma fa’atalitali ai, e fo’ia ai le ono tutupu o ni fa’alavelave tau-ta’avale.” 

“Ua tatau i le Pulega o Fela’ua’iga i le Lau’ele’ele (LTA) ona amata fa’amalosi atili a latou tulafono.”  Na ta’ua fo’i e Saulaulu Moananu, e fa’atiga loto tele lea mea. “E matua tiga lava lo’u fai’ai pe a fai e ‘avepasi le tulaga lena ae maise lava le taimi e fai ai ‘auala, pei o galuega o lo’o faia nei i Vaitele,” o lana fa’aaliga lea. “E poloka loa e pasi ‘auala lea o lo’o fai, e matua poloka ai lava ta’avale aua e leiloa po’o fea a o iai isi ta’avale. E ono tupu ai se fa’alavelave i se aso ma ‘ou te faitioina lava le mafaufau fa’avalevalea o le tagata Samoa. 

Ae talitonu Saulaulu, o le Pulega lava o Fela’ua’iga, le LTA o lo’o iai le fofo o le mata’upu lea. “Pau lava le faiga e fofo ai le fa’afitauli lea, o le vaega a le LTA, e tatau ona fa’amalosia ma fa’amamafa tulafono o le ‘auala. “Ua tatau i le Pulega o Fela’ua’iga i le Lau’ele’ele ona amata fa’asala ‘ave-pasi nei e solia so’o le tulafono aua a fa’atino le mea lena, o le a fai ma fafagu i ‘ave-pasi uma.”

Na fa’amalamalama fo’i e Fili Brewster o le Vaega mo Fa’alavelave Fa’afuase’i a le Matagaluega o Puna’oa ma le Si’osi’omaga e fa’apea, o le fa’afitauli lava lea ua ripotia so’o atu i le latou Ofisa. ’Ou te matua le-malamalama lava i mafaufau o ‘ave-pasi nei (pe a fa’apea e iai) aua, lea ua mae’a ona fa’ailoga e le malo, nofoaga mo pasi e tutu ai,” o lana fa’aaliga lea.  “O la’u galuega e mo’omia ai le fealua’i solo ma o le tele o taimi ‘ou te fa’atopetope atu ai i nofoaga ‘ese’ese, e fa’alavelave lava le tele o pasi nei.

O taimi uma fo’i ‘ou te poloka ai pe a tu se pasi, e matua tele lava se taimi e ma’umau ai. “O nisi taimi ‘ou te iai i le ofisa i tua atu o le taulaga, a vala’au mai la i se fono e faia i le Ofisa i Apia, e masani lava ona tuai ona o pasi. E le iloa lava e ‘ave-pasi nei le a’afiaga o soifua o le atunu’u ona o le fa’aletonu o latou.” “Moni o lo’o fai la latou galuega, peita’i o lo’o fa’alavelave tele i isi tagata femalagaa’i.”

E talitonu Brewster, ua tatau i ‘ave-pasi ona mafaufau i le ‘ese’esega o le pasese o le tagata e to’atasi ma le fa’asalaga e ono o’o iai, ona o le solia o tulafono o femalaga’iga i luga o ‘auala. E le’i maua o se avanoa a’o se fa’aaliga fo’i mai le Pulega o Fela’ua’iga i le Lau’ele’ele i le aso ananafi.

© Samoa Observer 2016

Developed by Samoa Observer in Apia