Ua lu’i le ta’ita’iga a le Palemia

12 February 2016, 12:00AM

Tusia - Lanuola Tusani Tupufia 

Faaliliu e Seagaitumua Tupuola

 

Ua lu’i e le Taitai o le Tautua Samoa o Palusalue Faapo II le Palemia o loo vaaia le malo i le taimi nei, Tuilaepa Sailele Malielegaoi, ina ia tuuina atu lana taitaiga i luga o le laina.

Ua na talosagaina le Palemia ina ia faataga le Vaega e Puipuia Aia Tatau a Tagata (H.R.P.P.) e fai se latou palota pe o latou manaomia pea o ia e avea ma o latou ta’ita’i. O ananafi na tuuina atu ai e Palusalue lea lu’itau-i le faagasologa  o le talanoaga a le Tautua Party i vaiaso uma ma tusitala o tala fou a nusipepa.

“Afai ua na matua mautinoa ua tofia o ia e le Atua, ia tuu atu la e ia lea tofiga ina ia tofotofoina,’ o le faaaliga lea a Palusalue. “Afai e lototele o ia-semanu ua na tuuina atu le pati e fai lana palota ma fai le tonu poo ai o le a avea ma taitai.

“O le taunuuga o lea palota o le a faamaonia ai lana faaupuga lea na te aumai soo e uiga i le tofiga a le Atua.O lona uiga-o le a faafofoga sui ai o le pati i le Agaga ma o le a faailoa atu e le Agaga ia i latou lo latou taitai fou e tatau ona i ai. Ona tatou faatoa iloa tonu ai lea o le mea o loo tupu nei.’

Na teena foi e Palusalue lipoti e faapea e leai se tasi o palota ma le Palemia mai Lepa

Fai mai Paluslue o loo i ai se sui faatu a le Tautua Party mai Lepa ma ua sauni o ia e palota ma le Palemia. Na te lei faaalia pe o i lea sui faatu  i le taimi o le talanoaga ma sui o nusipepa.E tusa ai ma le Radio New Zealand International, na faamaonia e Palusalue e faapea o lea sui faatu o Tu’ula Kiliri.

Na resitala e le sui faatu o le Tautua Samoa lona filifilia mo le Faiga-Palota Lautele mo le 2011. 

Ae peitai-sa le mafai ona tauva o ia ma le Palemia  ma sa faaleaogaina e tusa ai ma le tautua i le nuu poo le mana’oga tau monotaga ina ua mae’a se finauga faale-tulafono i totonu o le Faamasinoga i lea tausaga.

Na faailoa atu e Palusalue j le taimi nei i le RNZI ua agavaa lo latou sui faatu ina ua mae’a ona faatino se tautoga faatauto i luma o se loia ma le Komesina o Faiga-Palota.

I le taimi nei, fai mai le taitai o le Itu Agai e faapea a manumalo le Tautua i le Palota, o le a latou faia ia mautinoa le faatapulaaina o le taimi o le Palemia i le lua nofoaga faa-Palemene Sa le mafai ona maua se fesootaiga ma Tu’ula mo sona manatu faaaliga.

O lana finauga e faapea ua leva na’ua ona Palemia Tuilapea ma ua faasolo ina le kea ma faaalualuŏ. Na ia toe ta’ua lana mau e faapea ua matua le paoa o Tuilaepa ma ua le toe kea i le soli o le tulafono o le faiga-palota i le taimi na te tuuina atu ai meaalofa i lona itumalo i le faagasologa o le sauniga o lana matai i le lua vaiaso talu ai.

Na lagolagoina e  Afualo Dr. Wood Salele Palusalue ma lana mau mo se vaitaimi faatulagaina mo le Palemia.Fai mai a ia e tatau ia Samoa ona mulimui i malo o le Taupulega ma le faatapulaaina o taimi mo le Palemia.

.”O i tatou o se atunuu temokalasi ma e tatau ona tatou mulimuli i isi atunuu ia e i ai a latou tapulaa mo le tolu o paeaiga,” o lana faaaliga lea. “I le taimi nei, e mafai e la tatou Palemia ona ia umia le tulaga e o’o atu i ni paea’iga se lima ae le faapena le Iunaite Setete lea e lua peaiga ma Saina lea e tasi le paeaiga e sefulu tausaga.

“Afai la o i ai se poto o totoe mo le H.R.P.P.-e tatau ona latou lauiliuina lenei tulaga. O le faapea mai o tagata e leai se isi lava na te mafai ona taitai le atunuu e le o se mea moni. 

E mavae atu le tasi ae tulai mai le isi…ae le mafai ona tatou faia lea tulaga ona o le tulaga fiapule to’atasi lea ua tatou i ai nei. E fai mai o le temokalasi ae o le tulaga o loo faatino ai o le matua itu faafeagai lava.” Sa le mafai ananafi ona maua mai se manatu faaalia mai ia Tuilaepa.

12 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>