O la’u tala fo’i

338 Hits

1. Matauina i Tala Fou fai mai ua molia e le Tautua le Malo i le Faamasinoga Sili-ma o lea itu na faamaonia  e le Ta’ita’i o le Itu Agai –o Palusalue Faapo II ananafi.! E tusa ai la ma le faaaliga a le Taitai o le Itu Agai-o lea moliaga fai mai ua soli e le Malo le Mataupu 32 o le Faavae.

O lea la tagi ua talosagaina ai le Faamasinoga ina ia faaleaogaina le malo tausimea lea na tofi e le Palemia-ina ia mafai ai e le Ao o le Malo ona tofia se Palemia ma le Capeneta e vaaia le malo i le taimi nei. O loo manino lelei i lalo o le Mataupu 32 e faapea a faamavae se Minisita-e tatau foi ona faamavae uma isi MInisita e avea ma galuega fai faatasi.

O le Minisita la lea na faamavae muamua e pei ona ta’ua e Palusalue-o le Minisita muamua o Tupe o Faumuina Tiatia Liuga-lea na faamavae i le lua tausaga talu ai ona o le tele o tuuaiga e faasaga ia te ia-e aofia ai le taimi sa avea ai o ia ma Minisita o le Faalapotopotoga o Eleele a Samoa poo le SLC.

O le taofi la o Palusalue-sa tatau foi ona faamavae ma isi uma Minisita ina ua faataape le Palemene i le lua vaiaso talu ai. E le o mautinoa la poo afea o le a fofogaina ai e le Faamasinoga lea mataupu. O le fingalo faaalia la o le Faipule o Salega o Afualo Dr. Wood Salele-e manaia tele pe ana ta’ita’i le Malo e tusa ai ma lana faata’ita’iga.

Ia atonu ua talafeagai le fuafuaga ua fai e le Tautua Samoa Party-ae tasi lona-aisea ua fai na o lena moliaga ae faapefea se moliaga e faasaga i faiga pi’opi’o a le Malo ia ua mae’a ona faamaonia lelei e le Pule ma Su’etusi Sili ma le Komiti a Alii Ofisa o le Palemene-ae o lea lava e taofiofi e le Palemia –ma e le o tuuina atu i le Faamasinoga e saili ai le amiotonu ma le faamasinoga!

O le upu moni- o le mataupu lenei Iifaiga pi’opi’o a le Malo-sa tatau ona faamuamua e le Tautua Samoa Party-leaga o lea lava e faafitifiti mai le Palemia! Afai la ua fai mai le Palemia e leai ni a latou faiga pi’opi’o o faia-o lona uiga la- e faavalevalea le Pule ma Su’etusi Sili-toe valelea uma ma Sui Faipule o le atunuu ia na tofia i le Komiti Filifilia a Alii Ofisa o le Palemene-lea foi na ia toe faamaonia atili le sa’o atoatoa ma le tonu o le Lipoti a le Pule ma Su’etusi Sili!

O le a la le uiga o ia upu……”E leai ni faiga pi’opi’o a le HRPP? Faapefea Tusi Folau Samoa ia na faatu atu i tagata Saina ma le gaosa e faitau miliona ma miliona a le SLC? Faapefea le maliu o Levaula ona o lona taumafai e taofi faiga pi’opi’o a isi Minisita e to’alua o le HRPP-ia na ave I ai galuega tau eletise uma na te faia-ae ave I le isi le faiga o auala ma isi o masinI mamafa a le Malo?

O manatua le afi moli eletise na faatau e le MInisita o Galuega mai se tasi o Fale Talimalo-ona toe faatau atu lea I le EPC? O le a la le uiga o lea fesili”-“O a matou faiga pi’opi’o? O le a la le ta’u sa’o o ia faiga? Faiga Pi’opi’o poo Faiga Pi’opā? O le a sou taofi?

2. Ua fautuaina foi e le Taitai o le Tautua Samoa Party le Palemia-e avane lona tulaga Taitai  e fai i ai se palota a lana vaega ina ia iloa ai pe o manana’o lava lana vaega e avea o ia ma ta’ita’i! O lea la lu’itau a Palusalue i le Palemia na faailoa faalaua’itele ananafi i le faagasologa o le talanoaga i vaiaso ta’itasi uma a le latou Pati ma nusipepa!

3. Matauina foi i Tala Fou fai mai ua lu’i le ta’ita’iga a le Palemia e le Ta’ita’i o le Tautua Samoa Party.

Fai mai la Palusalue afai e talitonu le Palemia na tofia o ia e le Atua-ona lafo lea o lea mataupu i lana Vaega. Afai foi e telē lona loto-ona tuu lea Iilana Vaega e faia le filifiliga poo ai e tatau ona avea ma Ta’ita’i! O le taunuuga la o sea iloiloga a lana Vaega-o le a faamaonia ai ana faamatalaga fai so’o e uiga i tofiga a le Atua. O se faiga faapena faatoa mafai ai e sui o lana Vaega ona faalogo i le musumusuga a le Agaga o le Atua. O le a sou taofi? 

4. O loo teena foi e Palusalue le faaaliga a le Palemia e leai se Palota a Lepa e faia-ma ua na o ia lava e toe fo’i mai e aunoa ma se tasi na te lu’ia o ia. Afai la o le a palota le Palemia ma se tasi mai lona itumalo i le faiga-palota o loo loma nei-o se mea mata’utia la pe afai e leai se palota e faia-ae o lea o loo i ai le isi sui faatu mo le Palota e tatau ona la tauva. Afai foi ae moni e leai se palota a Lepa e faia-o fea la aia tatau fai mai latou te puipuia? O le a sou taofi? 

© Samoa Observer 2016

Developed by Samoa Observer in Apia