Nofosala Fofogamua Hawaii Lavea
Ua nofosala nei le falepuipui mo le tausaga ma le ono masina Fofogamua Hawaii Lavea ona o lona faia o ni pepa matai sese.
O le tausaga e 2012 i le masina o Ianuari na ia fa’aseseina ai pepa matai numera 292.
Na fa’ailoa e le Fa’amasino i a Vui e fa’apea; Masalo a tuu i le tatou gagana o le fatu ma aano o tatou tu ma aga faa-Samoa, e silafia foi e lau tofā Fofogamua, ua tatou malamalama uma iai, o le tofi matai.
“O le matai e faia faaiuga i totonu o lona aiga ma i totonu o le saofaiga a matai o alii ma faipule o nuu ma alalafaga.
“O matai foi e faia tonu i mataupu poo fonotaga a le Itumalo, tainane le Palemene lea e faia tulafono a le atunuu. I lo’u taofi e leai se tofi e sili atu i le tofi matai.
“O i e faavae ai pulega lelei o afioaga faatasi ma le atunuu atoa.
“O lou faia la o se pepa matai sese, e olegia ai lou nuu, lou aiga, lou itumalo, le tulafono ma tagata lautele o le atunuu. E le mafai ona tu’u māmā lea tulaga e le Faamasionga.
“O se solitulafoo matuiā ma ogaoga.
“I lo’u manatu o se solitulafono e talafeagai iai le faasalaga ua faataatia mai e le Palemene o le tatou atunuu, le saofaiga autu lea o matai e pulea le atunuu.
“O le faasalaga ua faataatia mai e le Palemene e tusa ai ma le tulafono, o le faasalaga faa-falepuipui.