Sauni e Palota i Faiga-filifiliga a le Atunu’u

12 January 2016, 12:00AM

Ripotia Sarafina Sanerivi

Fa’aliliu e Maiava

 

Ua toe 53 nei aso alo le atunu’u i Faiga Palota, ae  o lo’o tapenapena malie pea le mamalu o Samoa, e fa’atino a latou filifiliga e faia i le aso o le palota. O nisi, ua mae’a ma mautu sui o le a palota iai e avea ma o latou sui i le palemene o Samoa.

Na fesiligia e lau Samoa Observer, nisi o le mamalu o le atunu’u ananafi, i le mafuaga o le a palota ai mo sui ua latou filifilia.

O le ali’i-talavou o Rainer Brown, e 21 tausaga o le soifua – e faigaluega o le Ofisa Tau Maketi mo Galuega i le Matagaluega o Alamanuia, Pisinisi ma Leipa na fa’aalia, ua sauni ma le agaga fiafia e fa’atino mo le ulua’i taimi, lona vala’auina e palota. 

 “O a’u o le tagata-nu’u Samoa ma o la’u aia-tatau lea e palota ai,” o lana fa’aaliga lea.

Na ta’ua e le talavou mai Lalovaea e le mana’o e fa’ailoa le sui o lo’o fuafua e palota iai e fa’apea, ua leva ona mafaufau i lenei fa’amoemoe. 

“’Ou te palota mo se sui ‘ou te iloa e maua ai suiga lelei mo le matou itumalo ma o se tasi fo’i e naunau e tu’uina mai le fesoasoani i o tatou tagata,” o lana fa’amatalaga lea. “’Ou te manatu e tatau i tagata uma ona mafaufau lelei i sui o le a palota iai a’o faia a latou filifiliga. 

“E le na ona fa’ataunu’u o le palota ae palota mo le sui e te iloa e tula’i mai ma e fai ni suiga fou.” 

Ua fautua mai fo’i Rainer mo tupulaga talavou o le atunu’u, ina ia palota “mo le tagata sa’o.” 

“E tatau lava i tupulaga uma ua agava’a ona palota, ona palota uma. O lo tatou sao lea i fa’ai’uga-fai a lenei atunu’u. Ia manatua, e taua palota uma ma e tatau ona tatou palota uma mo se manuia o Samoa.” 

Na vi’ia e Rainer galuega ua fa’atinoina e le HRPP.

“Manaia tele galuega ua latou fai, i le tele o atina’e mo lo tatou atunu’u ma ‘ou te talitonu ai, e tatau ai ona toe tula’i mai,” o lana fa’aaliga lea.

E fa’apena fo’i lagona na fa’aalia e Nua Mata’ia’i o Moata’a, lea na ta’ua, ua tonu lava i lona mafaufau i le taimi nei, le sui e ‘ave iai lana palota i lea aso. Na ta’ua e lea toea’ina 53 tausaga, “o le a palota mo se tasi e le tele ni ana folafolaga e faia.” 

Na ta’ua e le tama lea e faigaluega i le Vaega a Lemana i Taumeasina, o le mea masani lava lea mai aso ua mavae, o le tele o sui-tauva e matua folafola le fa’atinoina o le tele o mea mo le itumalo ae uma ane, e na o le fa’amalieina lava o latou mana’o.

“E ‘ave la’u palota i le sui ‘ou te talitonu, e savali i ana ‘upu, ma o le mea lea na ‘ou ta’ua ai, ‘ou te palota mo le tagata e leai ni ana folafolaga e faia aua, e le matua popole tele pe a le fa’atinoa ia folafolaga sa faia.”

Na fa’amanatu mai fo’i mo le mamalu o le atunu’u, ia ‘aua na ona palota ae filifili lelei i tagata e talitonu, o tagata tonu mo afio’aga ma alalafaga ma le atunu’u aoao. 

Na ta’ua fo’i, “e manaia tele” ae iai o se suiga o le malo.

“E lelei tele pe a iai o ni suiga, ae ia suia i tagata e lelei mo lo tatou atunu’u, ma e le afaina fo’i se suiga o le malo.” 

Ae talitonu lava Nua, e matua manaia tele galuega ua fa’atino e le malo o iai nei mo le atunu’u.

O le isi sui-fou fa’atoa palota,o Marine Su’a o Fasito’o-uta, lea na saunoa, ina ua mae’a ona resitala aloa’ia mo le palota, sa leai lava sona manatu e palota.

“I le amataga lava, na ‘ou resitala ona sa ‘ou popole ne’i fa’asala a’u pe a ou le-resitala,” o lana fa’aaliga lea.

‘Ae na ta’ua, ina ua toe mafaufau atu ma manatua ai lona fiafia a’o se mitamita fo’i o se tagata-nu’u Samoa ma e tatau lava ona palota mo se “manuia o Samoa.”  

Na fa’aalia, sa una’ia malosi lava o ia e se fa’amatalaga a Barbara Boxer, o se Senatoa talavou Amerika mai Kalefoni lea e fa’apea, “So’o se tagata-nu’u o le atunu’u lenei, e tatau ona fa’amautuina, e taua tele ma aoga a latou palota, e tutusa lelei ai ma palota a so’o se Ofisa Sili o se fa’alapotopotoga po’o se sui o le Konekeresi, po’o le Peresetene fo’i.” 

“Na ‘ou iloa ai, e taua lava palota uma ma e aoga mo fa’ai’uga-fai a lo tatou atunu’u ma o le mafuaga lena e mautinoa ai, ‘ou te alu e fai la’u  palota.” 

Ma ta’ua e Marine, e le’i matua mautu lona mafaufau i le taimi nei peita’i, e iai se tasi o sui-fa’atu o lo’o naunau e ‘ave iai lana palota i le aso o faiga-filifiga a le atunu’u.

“O le to’atele lava o tagate o lo’o manatu e faigofie le faiga o le palota, ae leai. O le uiga o se tala, e faigofie lava le faiga o le palota a’o le filifiliga po’o ai le suafa e ‘ave iai, e le faigofie. O le mea lena e le o matua mautu ai lo’u mafaufau po’o ai o le a ‘ou palota iai ae o le mea moni lava, ua ‘ou sauni e palota mo le mea ‘ou te matua talitonu, e lelei mo Samoa.” 

Ae mo Lagaga Max Williams, e 62 tausaga mai To’omatagi, e le o matua fiafia talu ai, e le’i mafai ona resitalaina lona suafa mo faiga-palota.

“Na ‘ou fanau ma ola a’e i Samoa nei ae na ‘ou malaga i Pago ma le matou aiga,” o lana fa’aaliga lea. 

Na ta’ua e Lagaga, na tuai ona aga’i e resitala ona fa’atoa toe taliu mai i le atunu’u i le masina talu ai.

Ui i lea, na ta’ua lava, e fiafia lava e ‘auai fa’atasi ma le atunu’u aoao e filifili le isi vaega e tauavea le malo aua le atunu’u.

 “’Ou te iloa ua matua tele lava le suiga lelei ua iai si o tatou atunu’u, i atina’e fa’apea le tamaoaiga lautele… e fa’afetaia ai o tatou ta’ita’i ona o le galuega lelei.”

E talitonu fo’i Lagaga, e tatau ona toe fo’i mai le HRPP e ta’ita’i le malo ma o tatou tagata ma filifilia pea Tuila’epa e avea ma Palemia.

O Lagaga Max Williams, o se tagata-nu’u Samoa ua toe taliu mai i le atunu’u e amata se pisinisi ma lona aiga i To’omatagi. 

12 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>