Toe fo’i Tutaia i le Parataiso i Lefaga

399 Hits

Maria Tutaia ma lona tausoga o Raz Gilchris i le mata’aga i Matautu, Lefaga

Maria Tutaia ma lona tausoga o Raz Gilchris i le mata’aga i Matautu, Lefaga

Fa’aliliu e Maiava

 

Sa i Samoa nei le fa’amatua a le ‘Au-Netipolo a le Silver Ferns a Niu Sila, le tama’ita’i Samoa o Maria Tutaia mo se pu’ega-ata tele mo se tasi o tusi-fa’alauiloa. A’o i Samoa, na maua lona avanoa e asiasi ai i le faletalimalo o le Toe Fo’i i le Parataiso, le faletalimalo mata’ina i le matafaga i le itu i sauté o le atunu’u, e pulea e lona aiga potopoto.

Na vala’aulia fa’apitoa Maria na te taualugaina fa’afiafiaga fa’aleAganu’u sa faia i le faletalimalo i le Po Fa’apitoa o Ana Fa’afiafiaga. 

O le ‘Au-Fa’afiafia lea e ‘auai nisi o ona tausoga ma ona tei laiti o lona ‘au-aiga. 

O le taimi mulimuli na taualuga ai e Maria se fa’afiafiaga, o le tausaga e 2010 a’o iai fa’atasi ma le ‘Olopeleki i le malae o Eden Park, i sa’iliga-tupe mo le ali’i-lakapi Samoa o Ben Lei’a na pipili ona o lakapi. 

“Matou te matua mitamita ma fiafia ia Maria ma ana taumafaiga manuia i ta’aloga ma o se avanoa manaia tele ua mafai ona matou toe feiloa’i ma fa’atasi ai ma le aiga,” o le fa’aaliga lea a Ramona Su’e Pale, le uso o lona tina, le Fa’atonu fo’i o le Faletalimalo.

 “Na siva lava Maria mai tua atu o le vaega o tama ma matou iloa ai lava o lo’o seki a le tama’ita’i le siva ma fa’ai’u ai i le faiga o fa’amalosi-tino. Moni e le ni taga-fa’aSamoa, ae na matua patipati ma alalaga le to’atele i ana siva ma taga na fai.”

“Matou ‘ou mimita lava ia Aunty Ramona ma le matou aiga atoa ona o lenei faletalimalo,” o le fa’aaliga lea a Tutaia. “O lo’u fa’atoa o’o mai lea talu ona tatala le fale lenei ma ua ‘ou matua te’i lava i le matagofie tele ua iai. O lo’u aiga tonu lenei ma o lea la ua ‘ou o’o mai ma va’ai iai, o le a ‘ou taumafai e ‘aumai uma tagata ‘ou te iloa i’inei. ‘Ou te toe fia vave fo’i mai i Samoa nei.”

© Samoa Observer 2016

Developed by Samoa Observer in Apia