“O ona po e toto ai, ma ona po e lia’i ai”

Tusia Rev. Petaia Setu ,

215 Hits

(Failauga.3:2)

E lua lava tau o Samoa; o le tau timuga ma matagi, ma le tau o mūgālā. Ua iai foi tau a Samoa i masina ma aso o le tausaga. E femolimaua’i mea uma na faia i le natura ma mea tasitasi o le foafoaga. O le taimi o lea mea ma lea mea atoa foi ma lona uiga.

O le mau a le Failauga, o le mea ma lona tausaga i mea uma (f.1). O le taimi e lūlū ai, ma le taimi e selesele ai. O le vaitau e tatanu ai, ma le vaitau e lalaga ai i luga. O ona po e toto ai, ma ona po e lia’i ai.

 O lea ua tatou laasia le faatausiusiuga o lenei tausaga. O le vaitau o le toe vaai tua ma le loto faafetai, i le tele o galuega fītā ma tausinioga faale taumafai sa tauivi mai ai i lenei tausaga umi. Soo se mea ua faia, e iai lona faamoemoe.

E masani ona tatou tulimatai le vaitaimi lenei o tausaga uma o le vaitau o le seleselega, aemaise lava i le itu tau a’oa’oga. E mapu ea ai le taumafai. E a’e ai faatautaiga. O le vaitau e gase iai le ola su’esu’e ma le loto finafinau. E sili ai foe a le tautai. A o itu aso foi e mapu’e ai mafua; e selesele ai fua. O aso o tolaulauga. O vaitaimi o ’ula ma aso o fiafiaga, auā ua afu lelea le tausaga. O lā le fai Salamo, o lē sa lūlū ma loimata, e selesele ma le fiafia (Sal.126:5). O le mea ma lona tausaga i mea uma …o ona po e totō ai, ma ona po e lia’i ai.

Fanau e, ua tautai a’e!

Ua malie toa! Ua malo tau!

E le nā ma le lāina le anoanoa’i o faafitauli ma faigata ua iai le suiga o le lalolagi. O le suiga o le tau, aemaise foi o le taugata o le soifuaga. O ona po e totō ai? Talofa e, ua le mātū le eleele i le afusisina o matua. Lāina i le ao ae sautia i po. E tautua i le tunoa e velasia i le tainafi i aso uma. A suatia le aulapa uta e mafo’efo’e ma ma’ila’ila, e manu’anu’a ma fulafula. A suati le aulapa tai e inu sami ma sino i le lagi. Aisea? O le tau totō.

O le lūluga. Ua tatanu. E toto ma faatalitali. E lulu ma onosa’i. E tatanu ma le tagi. Talofa e, e moe i loimata, ae faatuatua i talosaga. O le mea ma lona tausaga i mea uma. Ua lailoa matua. Ua gasea i tautua. Ae mulia’i, e ‘ai ma le foa mea a Losi e pei o ia upu a le atunuu. Ioe, e maua ane foi lelei ma faamanuiaga, ua iloga ona lailai le tautua, ua ila foi tagata. E ui lava e faatauvaa nei mea i le manatu o le Failauga, a o lona lava talitonuga, e matagofie mea uma ua faia e le Atua i o latou lava tausaga. (f.11) Ua tausili foi le sailiga ma le galue a le tagata i lona malosi ma lona mana’o, ae le mailoa e le tagata le galuega ua faia e le Atua mai le amataga e oo i le gataaga, i le mea ma lona tausaga i mea uma.

O ona po e lia’i ai? Ioe e tua le afu sisina i le ‘ai mălie. O le sautia ma le laina ua faafiafiaina. Ua siva le ma’ila’ila! Ua ata ne’a le faatu pe’a! Ua galo le tainafi i le faataupati! Ua see ma loimata le saasaa a le mativa, i āu o mea nei o matua ua ‘ai’aiuli ai le tagiilima.

Ua suamalie tiga sa inu ai, a lea ua tini le uto e pei o le upu i faiva i vai. Ua tatou ea i le tau laumea. Ua li’ai! Ua selesele! Ua lalaga! Ua moni lava Tavita, Ia faamanuina le suafa o Ieova (Sal.103:1).  O le mea ma lona tausaga i mea uma, Ia faamanuina le suafa o Ieova. Matua, faafetai galulue ma le le faalogologo tiga. Viia le Atua i lo outou onosai. Aua o lo outou onosai e maua ai lo outou olioli. Malo tatalo. Faafetai anapogi. Mapu ane la’ia i afane. Ua malie toa! Ua malo tau!

Samoa e, e le faatusalia lau auaunaga ma lou soifua galue i le loaloa o lenei tausaga. O le tau faa Tuiefu, ua afu lelea le tausaga. E iai le vaitau o timuga ma matagi, e iai foi tau o mugala. O le Tui’efu, o le tau o fuata. O le tau e laga ai ufi, aemaise lava o ufi tau. O le tau e faasoa ai le faapolopolo. E nanamu ai galuega a le galue fanua. E tofusia ai le afu. E tali ai le malosi

E leai lava se galuega e le i save’ua e le Failauga. Ua ma’ea tofusia foi e le Poto fua uma o galuega taitasi. Ua va’ili foi lenei ma lena o le fatuaiga tausi ma faatufugaga a le tagata soifua. O outou faiva alofilima ma a tatou anava tausi sa fai ma maa lei i le auaunaga faa taitai a Solomona. Sa mata’itu foi auga o tau ma natura o mea uma ua faia. O lana molimau, e faatauvaa, e faatauvaa lava mea uma.

O lona uiga, e le liliuina e se poto moto poo se atamai na nono, mea taitasi uma o le foafoaga paia, o le mea ma lona tausaga, i lona lava natura sa mamanuina ai e le Atua Silisili Ese. Auā foi ua uma ona tuu iai e le Pule Foafoa le matagofie i mea uma i o latou uiga ma latou tau. A vevela, e vevela. A maalili, e maalili. A faamili, e faalaufasi. A totō, e faatalitali. A oo i lona fuata, e tali i le galala. Ioe, o le taimi galue, ma le taimi selesele i galuega.

A o ai ea ua manatu ua atoatoa? O upu masani a toeaiina, e leai se faiva e ‘asa ma se maumau. E aku ē! Ae e iai lava le aku e sesē.

Malo lava galulue Samoa. Faafetai i lou titi fai tama. La lea ua tatou pale mai i le vaitau o seleselega. Pe se a se fua sa faapolo mo lenei tausaga. Pe ni mālie po o ni tāma’i? Se i tali le galala o matua, o fanau, o aiga, le malo, le ekalesia, a o le sila tapuai a lo tatou Tamā o i le lagi?

E afua ona see mălie le saasaa, ona ua mălie le galala. Ua sala ina tafitifiti le aiuli, auā o lelei uma lele ua tofi. Samoa, o le fua na lūlū, o lena e selesele. E le totōina lelei ae faatali i masei. O mea lelei na te aumaia mea lelei (Mat.7:16-18).

Samoa, o le faapolopolo e silisili ona lelei a le Atua sa toto i Peteleema i le vaitau lenei ua ta’ua o le Ativeni(Advent). Na li’ai  luga i Korokota ina ia faaolaina oe ma lau fanau ma lou aiga. Ioe, ina ia saoloto oe ma a’u, ma faaolaina Samoa ma le lalolagi atoa.

Ia manatua, o le mea ma lona tausaga i mea uma. O ona po e totō ai, ma ona po e li’ai ai le mea ua totōina.

 

Amene

7737063/7783782

© Samoa Observer 2016

Developed by Samoa Observer in Apia