Talia ma le fiafia mea ua maua

Tusia Vatapuia Maiava ,

123 Hits

Laufofoga fiafia o le tinā ia Su’e Maluina mai le afioaga o Lealaoali’i i Faleasi’u.

Laufofoga fiafia o le tinā ia Su’e Maluina mai le afioaga o Lealaoali’i i Faleasi’u.

O le to’atele lava o tagata, e sa’ili lava so latou fiafia i mea taugata ma mea fe’ilafi o le olaga nei. 

Ae peita’i o le finagalo o le tinā ia Su’e Maluina mai le afioaga o Lealaoali’i i Faleasi’u, po’o le a lava le faigata o le olaga, e maua lava lona fiafia ma si ona aiga.

O Su’e o lo’o aumau ai nei ma lona to’alua ma ona alo i lo latou fale i Lealaoali’i. 

E le’o iai se isi o faigaluega o lo’o latou aiga i le taimi nei e maua ai se seleni e tausi ai lo latou aiga. 

Ae e ui lava i lea, na fa’aalia mai e Su’e, o lo’o o latou maua lava le fiafia. 

“O si o matou aiga, e lima vaivai lava ma ausage.

“E feagai fo’i ma le tele o fa’afitauli i le olaga nei. O le taimi lenei, o lo’o maua le suavai lelei, ae ua atoa nei le fa o tausaga talu ona leai se eletise i so matou fale.

“O lea lava matou te fa’aaogaina le moli matagi i le taimi nei. 

“Ae ui lava i lea, o lo’o maua lava lo matou ola fiafia ma le filemu. O le tele ia o fa’afitauli o loo feagai nei ma a’u, le tina o le aiga.

“E fai o le tausiga o si a’u fanau, ia ae fa’apena foi i le tama o le aiga. E pei o nisi taimi ua leai ai se sikaleti a le toeaina, ona fa’amisamisa solo lea. Ae e le’o avea lava lea ma ala e aveesea ai le mafanafana o le matou mafutaga i totonu o le matou aiga.

“E pei o a’u lava lea e tu malosi auā le fa’amaoopoopoina o si o matou aiga.

“E taumafai lava la e sa’ili’ili manuia mai nisi o fanau ma aiga aua le tausiga o si o matou aiga. 

“A maua mai foi la tupe i le fanau ua fai aiga, e alu lava i le fa’atauina o suka ma isi mea fa’apena mo si o matou aiga.

“O le ala foi lea e fa’afetai ai i nai fanau, e ui lava ina utiuti le fa’asoa, e fesoasoani mai lava i le tausiga o si o matou aiga.”

Na ta’ua e Su’e e ui lava ina faigata ma lima vaivai si ona aiga, o le mea sili lava o le ola fiafia ma e fa’afetai lava i le Atua i lana fo’ai i lea aso ma lea aso. 

“O lo’o agalelei mai lava le Atua i lana foa’i ma alofa mai e aumai mea o lea aso ma lea aso.

“E fa’apena lava le olaga, o aso ua lelei o aso foi ua masei, ae a tatou talia ma le fa’afetai mea ua tatou maua, e alofagia lava i tatou e le Atua.”

© Samoa Observer 2016

Developed by Samoa Observer in Apia